Na Turak i Pablo so
Taga-Efeso
1
Ikkanak iyaw i Pablo a apostol i Kristo Jesus meantu si uray i Dios.Iyaweno turakku sikwayu a tolayera i Dios so Efeso a makurug si angngurugga sike Kristo Jesus.
2 Idasalku sike Dios a Amatam anni Afutam a Jesu Kristo a ibali-balinda a massimpat sikwayu anna indan dakayu si piya.
Nangwa i Dios si Mapiya megafu sike Kristo
3 Madayaw i Dios a Ama i Afutam a i Jesu Kristo! Gumafu si pakisittatatam sike Kristo, neyaddana sikwatam amminan a mapiya a naggabwat si langit megafu si Espirituna. 4 Liye kepay naparatuweno talubaggan, pinilina etamun i Dios gumafu si pakisittatatam sike Kristo takesi mesina etamma si amminan a maral a akakwan anna awan pakaliwatan si allanganna. Gumafu se iddukanna etam i Dios, 5 nanonotna sinoy kepay a ampunanna etam a anakngera megafu sike Jesu Kristo. Iyaw e kaangga-anggam sike Dios anna urena. 6 Inangwana iyaw tapenu dayawantam baggina gumafu si kakkapallat a simpatna sikwatam a nepaitana a pangiyadda sikwatam gumafu si pakisittatatam si iddu-iddukanna a Anak. 7 Tinubbutna etam i Kristo megafu si dāna sin natay baggina so kurut anna si kunna sinay e pinakomannan ino liwa-liwattam. Nedemmu iyaw gumafu si simpatnengke i Dios 8 a nepaitana a pangiyadda sikwatam. Megafu si angngammuna anna pintindina, 9 nepakaammuna sikwatam a amme ammuweno tolayera sinoy, udde dinesisyonanna i Dios a akwan. Antuweyaw yo kanggamman i Dios anna planuna a akwan megafu sike Kristo. 10 Nu dumatang ino fustu a tiyempu, planu i Dios a ammunganneno amminan a ana si langit anna sito lubag si pakapangwa i Kristo. 11 Medemmuna amminan meantu si uray i Dios kakunna yo pappilina sikwami a Hudyuwera takesi mattabali kami a tolenera megafu si pakisittatami sike Kristo. Akakwanna i Dios amminan a kiya-kiyan meantu si planuna anna urena 12 takesi ikkanetam a Hudyuwera a palungu a nainnanama sike Kristo e manolay etamma a maddayaw sikwana si kadayawanna. 13 Anna kunnapay yo nedemmu sikwayu a bakkan a Hudyuwera sin nadingngag diyaweno kagakkuruwan, yo Mapiya a Baga nu kasanna kayu a matabbut. Si angngurug diyaw sike Kristo, tinakkilalan nakayu a akwana megafu si pangiyaddana sikwayu si Espirituna a netambana sin nabayagin a tiyempu.
14 Na Espirituna e antu yo garantiya a iyaddanana sikwatam ino mapiyera a netambana sikwatam a tolenera makiyad si interu a matabbut etam i Dios si maral. Dayawantam baggina si kadayawanna.
Na Dasal i Pablo
15 Nadingngagku a ibali-balin diyaw a mattalak sike Afu Jesus anna iddukan diyaw inoyera a meyannung sike Dios, nabu 16 ammek ibbattan a mappabalat sike Dios para sikwayu kada idasallan takayu. 17 Idasalku sike Dios a Ama na kadayawan i Afutam a Jesu Kristo a nangadda sikwayu si Espirituna a mangadda si angngammu anna mangipakaammu meafu si baggina ingkepay takesi maammu-ammuyu ingke baggina. 18 Arangngangku sike Dios a baggawanneno nonot diyaw takesi maammuwan diyaw nu nenay yo innanaman diyaw so payagnga sikwayu, nu kasanna a kabastanteno iyaddanera meantu so netambana so tolenera. 19 Idasalku pay a mapureban diyawneno amme magukud a pakapangwengke i Dios a ana sikwayu a mangurug. Iyaw a pakapangwa a ana sikwatam e mapparefu a pakapangwa 20 a nepaitana i Dios sin pinantotolena i Kristo sin natay anna pinattuttudna so diwananna a makipanangngal si langit. 21 Manangngal i Kristo si langit si amminan a afu-afuwera anna inoyera a ana pakandama anna pakapangwa anna panangngalan si langit anna sito lubag. Na pakandamana e antu yo kaatannangan si amminan a pakandamera, bakkan lamang si maddaggun a tiyempu udde kunnapay si dumatang a tiyempu. 22 Inindanna i Dios i Kristo si pakandama a manangngal si amminan anna dinutukanna baggina a mattabali si Afu na amminan a minangikkurug ira. 23 Amminan a minangikkurug ira e kakunna yo baggi i Kristo. I Kristo ino kainteruwan na minangikkurug ira a baggina keppay yo mangibukal si amminan.