Na Turak i Pablo so
Taga-Roma
1
Ikkanak i Pablo a imbut i Jesu Kristo. Pinilinak i Dios a apostolna a mangibalaggaw si Mapiya a Bagana. 2 Iyaw a Mapiya a Baga a netambana sinoy kepay megafu so profetanera e ana so neturak a sapit i Dios. 3 Iyaw a Mapiya a Baga e patamu si Anak i Dios. Patamu si akkatolena, gaka baggina i David. 4 Meantu si akka-Diosna, nepaitana i Dios a baggineno Anaknga a pinantotolena megafu si pakapangwana. Baggina i Jesu Kristo a Afutam. 5 Megafu sike Jesus, inindannaka i Dios si pribilehiyu a mattabali si apostol a mangigiya so bakkan a Hudyuwera so amminan a talubbunan a mangurug anna makimoray sikwana. Akwangku amminan iyaw a maddayaw sike Kristo. 6 Mesapat kayu pay sitan a taga-Roma a napili a meyannung sike Jesu Kristo.7 Antuweyaw yo turakku sikwayu amminan sitan Roma. Iddukan nakayu i Dios anna pinili nakayu a mattabali si tolenera.
Idasalku sike Dios a Amatam anni Afutam a Jesu Kristo a ibali-balinda a massimpat sikwayu anna indan dakayu si piya.
Na Dasal a Appabala-balat
8 Palungu si amminan, mabbalatak sike Diosku a sinerbiyangku patamu sikwayu amminan, gumafu se yo angngurug diyaw e nebalaggaw so interu a talubaggan. E madingngag i Dios ino appabala-balatku gumafu sike Jesu Kristo. 9 Se i Dios a nangikakwangku a pinasserbiyan megafu si pappakaammuweno Mapiya a Baga meafu sike anaknga, ammuna a kada tiyempu a maddasalak e idasallan takayu. 10 Maumirak a maddasal sike Dios a nu urena e makaumangakun sikwayu. 11 Se anappangku a maita takayu takesi meballek sikwayuweno simpat a maggabwat si Espiritu i Dios takesi mapatuyaggang kayuna si angngurug diyaw. 12 Na kanggammangku sapitan, maddidinnuffun etam a patuyaggan ino angngurug na sittata sikwatam. 13 Wawwayik, kanggammangku a maammuwan diyaw a maumid a ginagguriyatku a maggannon sikwayu (udde oddu yo kiya-kiyan a naffuwad sikwak). Kanggammangku pay a mangangga-anggam sitan si mangurug ira sike Kristo kakunna yo inangwak so korwan a luga-lugar na bakkan a Hudyuwera. 14 Ana karguk a mangibalaggaw si Mapiya a Baga meafu sike Jesu Kristo si amminan mesapat yo Griyego anna bakkan a Griyego anna inoyera a nakkalakammu anna amme nakkalakammu. 15 Nabu, dirangku a mangibalaggaw si Mapiya a Baga meafu sike Jesu Kristo sikwayu pay a taga-Roma.
Na Pakapangweno Mapiya a Baga meafu sike Jesu Kristo
16 Ammek ikaatal a ibalaggaweno Mapiya a Baga meafu sike Jesu Kristo se iyaw yo pakapangwa i Dios a matabbut ino kada tata a ana angngurugnga, palungu so Hudyuwera anna pay so bakkan a Hudyuwera. 17 Anna iyaw a Mapiya a Baga e mepaita nu kasanna a ibilangnga i Dios ino tolayera a matunung si aggitana megafu si angngurug sikwana mamefu so palunguna makiyad so uddina. Se kunna so neturak a sapit i Dios, “Na tolay a nebilang a matunung si aggita i Dios megafu si angngurugnga e matolena.”b
Nalliwat Amminan a Tolayera
18 Se yo dokal a allang i Dios e nepaammu a naggabwat si langit metulyat si amminan a amme manolay meantu si uray i Dios anna inoyera a mangwa si maral. Na akakwanda e maffuwad si pangibalaggaw si kagakkuruwan. 19 Se yo damana a maammuwan meafu sike Dios e mabaggaw sikwara gumafu se nepakaammu iyaw sikwara. 20 Makiyad sin pinaratu i Dios yo talubaggan, yo pakapangwana a awan pakiyaranna anna yo akka-Diosna maski ammera maita e naintindiyanin anna naiten megafu si kiya-kiyan a inangwana. Antu awanin a maipangakiranda. 21 Se maski ammura i Dios, ammera dinayaw baggina onnu nappabalat sikwana. Imbes, yo agginonotanda e awan serbina anna ammera maintindiyan ino kagakkuruwan. 22 Kunda a mangngammuwera udde illawera kena. 23 Pinassantalireno kadayawan i Dios a awan katayanna anna dinayora inoyera a kakunna yo tolayera a matay onnu pappitut ira onnu aggayam ira a ana appat a takkirera anna aggayam ira a makkara-karayap. 24 Antu pinurayan ira i Dios a akwandeno kaatatal a kanggamman na agginakammanda. Na kebalinanna, nangwera si madakkut a panggamman anna kaatatal a kiyan si baggi na siggatatan. 25 Pinassantalireno kagakkuruwan meafu sike Dios si siri. Anna dinayora anna sinerbiyandeno pinaratuwera i Dios ammat si Namaratu a i Dios a medayawna amu-amu! Amen.
26 Gumafu so maral a akakwanda, pinurayanderan i Dios a akwandeno kaatatal a panggamman na baggirera. Maski yo bafabbayera ammera akwan nu nenay yo fustu nu sintaw makidurug ira si kakunnara a bafabbayera anna bakkan si lallakiyera. 27 Anna kunnapay yo lallakiyera, ammera kanggam a makidurug si bafabbayera imbes kanggammandengke a makidurug si lallakiyera. Nangweno lallakiyera si kaatatal a aggangwera si korwan a lallakiyera. Nabu, mepangngat a makastiguwan ira so maral a akakwanda.
28 Anna gumafu se ammera maiteno kaawan ino pattakkilalara sike Dios, pinurayanna i Dios ino maral a agginakammanda anna mangwa si kiya-kiyan a ammera nad akwan. 29 Napannuwera si kada garannud a kamarallan, kaaguman anna panggamman a mangwa si maral. Maimal ira, mamapatayera, makipakwera, mangillokuwera, mannonot ira si pakamarallan ino korwan ira anna panggammanda a mammimi meafu si korwan ira. 30 Massisinnapit ira si maral, ikalussora i Dios, paatatallandeno korwan ira, mabbalagasayera. Mannonot ira si tan-oddu a pangwera si maral anna ammerengke makimoray si gagginafandera. 31 Illawera, awan angngurugga, awan piddukda anna allakda si korwan ira. 32 Ammureno katunungan i Dios a yo mangwa-angwa sitaw e mepangngat a matay. Ammera lamang akwan iyawera udde mangga-anggam ira nu akwan payeno korwan ira yo akakwanda.