Na Matunung a Pannunut i Dios
2
Kunnantu, awan pangakirannu, maski seanyaka, nu nunutannuweno korwan ira. Se sitaw a aggangwa, nunu-nunutannuweno baggim ingkepay, gumafu se ikka a mannunu-nunut e mangwa-angwa pay si kunna sinay. 2 Kunnu, “Ammutam a yo pannunut i Dios so nangwa si kunna sinayera e meantu si kagakkuruwan.” 3 Nu nunutannu inoyera a nangwa si maral udde akwannuwera ingkepay, siguraduwak a ammemma malillikan ino pannunut i Dios. 4 Arariyannuweno dokal a simpatna i Dios anna mapasensiyengke baggina sikwam. Udde ammem imammatan a yo simpat i Dios e mangigiya sikwam a mabboboli si liwatnuwera. 5 Udde si kataggat na urem anna pammay a mabboboli, annanot a pinadammatnu yo akkastigu sikwam so aw na panguddi a pannunut nu nainsa mepakaammuweno allang anna fustu a pannunut i Dios. 6 Se balattannaneno kada tolay meantu so inangwanera. 7 Para si tolayera a mapasensiyengke a mangwa si mapiya, manggam si kadayawan anna angat a awan patay, manolayerana a bulun i Dios amu-amu. 8 Udde yo korwan ira e nonotanda lamang yo baggira ingkepay anna ammera makimoray si kagakkuruwan. Tuntulanda yo kamarallan. Kastiguwannanera i Dios si madammat ingke. 9 Anana passufriyengke na tolayera a mangwa-angwa si maral, palunguweno Hudyuwera anna payeno bakkan a Hudyuwera. 10 Udde yo tolayera a mangwa si mapiya, dayawannanerengke i Dios anna pappapiyanneno nakamda, palunguweno Hudyuwera anna payeno bakkan a Hudyuwera. 11 Parefu yo pattaratuna i Dios si tolayera.12 Amminan a nakaliwat a amme makaammu si katunungan a neyaddana i Dios sike Moises e mesinana sike Dios anna manunutna udde bakkan a meantu so inay a katunungan. Amminan a nakaliwat a makaammu si katunungan i Dios e manunutna meantu so katunungan. 13 Se bakkan ino maningnga-ningngag si katunungan nu bakkan yo makimoray sitaw a nebilang i Dios a matunung si aggitana. 14 Na bakkan a Hudyuwera e awan sikwareno katunungan udde nu akwanda nu nenay yo kaawan na katunungan i Dios meantu si konsensiyara ingkepay, maski awan sikwareno katunungan, iyawin e nattabali si katunungan para sikwara. 15 Ipaitara si aggalangwara a yo kaawan na katunungan i Dios e anen si nakamda. Na konsensiyara ingkepay e màakusa sikwara nu nakaangwera si maral onnu maddefensa sikwara nu nakaangwera si fustu. 16 Medemmuna iyaw so aw a meantu so Mapiya a Baga, a i Dios megafu sike Jesu Kristo e nunutannaneno neyimad a agginakamman na amminan.
Na Hudyuwera anneno Katunungan
17 Kunnu a tataka a Hudyu. Mattalakka si katunungan anna ipannokalnu yo pakibulunnu sike Dios. 18 Ammum nu nenay yo uray i Dios anna nu nenay yo mapiyengke gumafu se netunturu iyaw sikwam na katunungan. 19 Anna siguraduka a taga-giyaka so inoyera a amme kepay makaammu sike Dios anna sirwat so tolayera a ana si kalammukan, 20 anna taga-tabarang si illawera anna mestru na abbing ira gumafu se natumpalannu si katunungan yo interu a aggammu anna kagakkuruwan. 21 Tunturuwannuweno korwan ira udde maawag a tunturuwannu yo baggim ingkepay. Itundum so tolayera a ammera makkokot udde ikka ingkepay e makkokot. 22 Iyallangngu yo pakikkarallaw udde makikkarallawka. Tulyatannuweno sasan-dios ira udde makkokotka so templurera. 23 Ipannokalnu yo katunungan udde neyatatalnu i Dios megafu si ammem pakimoray si katunungan. 24 Se kunna so neturak a sapit i Dios, “Na ngan i Dios e nesipitteno bakkan a Hudyuwera gumafu sikwayu a Hudyuwera.”a
25 Nu makimoreka si katunungan i Dios, yo akkabanggitnu e gakkurug a ana serbina, udde nu ammeka makimoray, manillaka tolay a ammena kepay nabanggit. 26 Nabu, yo bakkan a Hudyuwera a amme nabanggit udde makimoray si katunungan i Dios e nebilang a nabanggit. 27 Antu yo bakkan a Hudyuwera a amme nabanggit udde makimoray si katunungan e kastiguwan dakayuna, ikkayu a Hudyuwera a nabanggit anna ana sikwayuweno neturak a katunungan gumafu se ammeyu makimoray. 28 Se yo tata tolay e amme mattabali a Hudyu gumafu si panlawan a baggi onnu gumafu se nabanggitin baggina. 29 Imbes, yo gakkurug a Hudyu e inangkakwanneno nakamma gumafu si Espiritu i Dios anna bakkan si meantu so pakimorena si katunungan. Na tata tolay e mapadayawan bakkan si korwan ira udde naggabwat sike Dios.