3
Nenay kad antu nakalamangan na Hudyuwera so bakkan a Hudyuwera? Onnu nenay yo kaawan na pabbanggit? 2 On, oddu yo pammakapiyan para si Hudyuwera. Palungu si amminan, yo sapit i Dios e netalak so Hudyuwera. 3 Gakkurug a ana korwan a Hudyuwera a ammera makurug sike Dios. Udde ammeyu nad nonotan a i Dios e ammenana makurug gumafu se yo korwan e ammera a makurug. 4 Ammenengke! Maski nu kada tolay e masiri, i Dios e maumid a akwanneno sapitanna. Se kunna so neturak a sapit i Dios meafu sikwana,“Takesi matakkilalangka a matunung so sapitnuwera,
anna mangaffutka nu nunutan dakan.”a
5 Udde maski nu yo kamarallantam e mangipaita si kinamatunung i Dios, ammetam masapit a amme matunung i Dios a mangastigu si madammat sikwatam. (Iyaw yo agginonotan na tolayera.) 6 Iyawera a pattitinnulyatan e awan kagakkuruwanna. Nu ammena matunung i Dios, kasannana kad a nunutan amminan a tolayera? 7 Nu megafu si passalasirik e annanot a maiteno kagakkuruwan para si kadayawan i Dios, saay kad kepay a kastiguwannak a tata a sinaliwat?
8 Nu kunna sitan, saay se ammetam a sapitan, “Mangwa etam si maral nu mapiya pay yo kebalinanna iyaw?” Kunna sitan kanu yo ituntu-tunturumi, kunneno mamaraparal sikwami. Kastiguwan ira i Dios e antuweyan yo mepangngat.
Awan Tolay a Matunung
9 Ikkanetam a Hudyuwera e amme mas mapiya ammat so bakkan a Hudyuwera. Netundumin sikwayu a amminan a tolayera, Hudyuwera onnu bakkan a Hudyuwera e nalliwat. 10 Se kunna so neturak a sapit i Dios,
“Awan tata a matunung, maski kepay tata,
11 awan tata a ana pintindina meafu sike Dios,
anna awan tata a manggam a mangammu sikwana.
12 Amminan e nattalekkud sike Dios e nattabali si tolayera a awan serbina.
Awan a mangipaita si simpat,
awan maski tata.”b
13 “Na sapitanda e madakkut kakunna yo bukkat a attanamman,
usandeno sapitdera a mangilloku si korwan ira,
anna manaral ira a manilla gita na irawera a mamapatay.”c
14 “Na sangirera e napannu si pangimamod anna malow a sapit ira.”d
15 “Malan ira a mamapatay si tolayera,
16 anna nu sintaw yo tanganda, dara-darallanda anna passufriyandeno korwan ira,
17 anna ammera ammu a makipanolay si piya si korwan ira.”e
18 “Awan a pangilawara sike Dios.”f
19 Ammutam a nu nenay yo kunneno katunungan, mesapit iyaw so inoyera a nakaiyaddan ino katunungan, takesi awan maski tata tolay a massapitna a awan liwatna. Amminan a tolayera e manabbagnga sike Dios. 20 Se awan a tolay a matunung si aggita i Dios megafu so pakimorena si katunungan. Yo katunungan a mangipaita sikwatam nu kasanna etam a sinaliwat.
Na Kinamatunung megafu si Angngurug
21 Udde sitoye, nepakaammuna i Dios ino pangibilangnga si tata tolay a matunung si aggitana, bakkan si pakimoray si katunungan. Yo neturak si katunungan ira i Dios a neyaddana sike Moises anneno nesapit ino profetera e nanestigu meafu sitaw. 22 Ibilang i Dios ino tolayera a matunung si aggitana megafu si angngurugga sike Jesu Kristo. Se awan a padduman na Hudyuwera anna bakkan a Hudyuwera, 23 gumafu se amminan e nalliwat anna ammera nakaangwa si mapiya si aggita i Dios kakunna i Dios a yo taddanera e mapiya. 24 Udde gumafu si simpatna a nepaitana sikwatam, amminan a tolayera e nebilang a matunung si aggitana megafu sike Kristo Jesus a nattabbut sikwatam. 25 Baggineno newalli i Dios a sakrifisyu, takesi megafu si akkapatena so kurut e mapakoman ino liwat na amminan a mangurug sikwana. Inangwana iyaw i Dios takesi ipaitana a matunung baggina. Sin palungu a tiyempu, naggaggad baggina anna pinasensiyanneno tolayera so liwa-liwat a naangwara. 26 Nepruweba sito maddaggun a tiyempu a baggina ingkepay e matunung anna ibilangnga a matunung si aggitana yo tolay a ana angngurugnga sike Jesus.
27 Nenay kad antu a mepannakkotam sitoye? Awan! Anna saay pay se mappakkaw etam? Gumafu kad si pakimoretam si katunungan? Bakkan! Nu bakkan gumafu si angngurugtam sike Kristo. 28 Se matunung etam si aggita i Dios megafu si angngurug anna bakkan a megafu si pakimoray si katunungan. 29 I Dios e bakkan lamang ino Dios na Hudyuwera udde Dios payeno bakkan a Hudyuwera. 30 Gumafu se ana lamang a mittata a Dios, ibilangngeno Hudyuwera anna bakkan a Hudyuwera a matunung si aggitana megafu si angngurugga sike Jesu Kristo. 31 Gumafu se nebilang etam a matunung si aggita i Dios megafu si angngurugtam, ammena kanggam a sapitan a arintam ino katunungan. Si kagakkuruwanna, nu ana lamang a angngurugtam e gakkurug a maparulottam ino katunungan.