Na Pangngarigan i Abraham
4
Nenay antu masapittam meafu sike Abraham a aggidiyafuwantam? Nenay nakalakammuna meafu si angngurug? 2 Nu ibilangnga i Dios i Abraham a matunung gumafu so mapiya a inangwana, ana mepannokalna udde bakkan si aggita i Dios. 3 Se kunna so neturak a sapit i Dios, “Kinurug i Abraham i Dios, anna nebilang baggina a matunung si aggita i Dios.”a 4 Na meyadda si tolay a mattarabafu e bakkan a mebilang a regalu udde paga na nappakelanna. 5 Udde yo tolayera e mebilang a matunung, bakkan a gumafu so inangwarera, udde gumafu si angngurugga sike Dios a mamakoma si sinaliwat ira. 6 Iyan yo kanggamma sapitan i David sin kunna a mapiyeno akkatolay na tata tolay a ibilang i Dios a matunung si aggitana bakkan a gumafu si taddanera:7 “Mapiya i Dios so inoyera a napakomanneno maral a taddarera,
anna inarina yo liwa-liwatda;
8 Mapiya yo akkatolay na tata tolay a ammenan kastiguwan i Afu Dios baggina si liwa-liwatna.”b
9 Mapiya i Dios antu bakkan lamang para so Hudyuwera a nabanggit kunsi kunnapay so bakkan a Hudyuwera a amme nabanggit. Sapi-sapitantam meantu so neturak a sapit i Dios a i Abraham e nebilang a matunung si aggita i Dios gumafu si angngurugnga. 10 Kansa iyaw a nedemmu? Liyena nabanggit onnu kapiyena nabanggit? Bakkan a kapiyena udde liyena a nabanggit. 11 Na appabanggit e pemunuwan a anen angngurug i Abraham sikwana a ammena kepay a nabanggit. Na gakkadna iyaw e takesi mattabalina baggina a aggidiyafuwan na amminan a mangurug sike Dios maski ammera kepay nabanggit anna nebilang ira a matunung si aggita i Dios. 12 E kunnapay, i Abraham e antu yo aggidiyafuwan na inoyera a bakkan lamang a nabanggit kunsi kunnapay inoyera a dumandan si makkakunna a angngurug a anen sike Abraham liyena nabanggit.
Naimammatan ino Tamba i Dios megafu si Angngurug
13 Antu netamba i Dios sike Abraham anna so gakanera a erensiyandeno talubaggan, bakkan megafu si pakimorena si katunungan udde megafu si akketunungnga si angngurug. 14 Nu yo tamba i Dios e para lamang so makimoray si katunungan, ammenan antu maawag yo angngurug anna awan serbina yo tamba. 15 Na katunungan e ana daggana a akkastigu i Dios para so amme makimorayera si katunungan. Udde nu awan a katunungan, awan pay a pattulyat.
16 Antu gafuna a yo tamba e maddepende si angngurug takesi megafu si simpatna meyaddana si amminan a gakera i Abraham bakkan lamang so makimoray si katunungan udde si amminan a mangurug pay kakunna i Abraham. 17 Se kunna so neturak a sapit i Dios, “Inangwa taka a ama na oddu a talubbunan.”c Nedemmu iyaw gumafu se nangurug i Abraham sike Dios a mangadda si angat so natayera anna mamaratu si kiya-kiyan a ammena kepay naparatu. 18 Maski awanin inanama a makkaanak i Abraham, nangurug baggina a mattabalina a “ama na amminan a talubbunan.” Se kunna i Dios sikwana, “Odduna yo gakam ira.”d 19 Ammena nakkafuy ino angngurug i Abraham maski ibilangngeno baggina ingkepay a manilla natayin se mattatutin yo dawunna anna i Sara a atawana e lupat. 20 Awan pabbabangnga patamu so tamba i Dios sikwana udde annanot a nattuyag baggina si angngurugnga dengkena dinayaw i Dios. 21 Gakkurug ingke a nangurug baggina a dama maangwa i Dios ino netambana. 22 Kunnantu, gumafu si angngurugnga nebilang baggina a matunung si aggita i Dios.e 23 Iyawera a sapit, “Nebilang baggina a matunung si aggita i Dios” e neturak bakkan a maipegafu lamang sikwana, 24 udde para sikwatam pay. Ibilangnga etam i Dios a matunung si aggitana nu mangurug etam sikwana a nappanantotolay sike Jesus a Afutam. 25 Nedawawa i Jesus a matay gumafu si liwa-liwattam anna nappanantotolay takesi matunungnga etam si aggita i Dios.