Na Kebalinanna yo Kinamatunung
5
Kunnantu, gumafu se nebilang etam a matunung si aggita i Dios megafu si angngurug, ana masinak a pakibuluntam sike Dios megafu sike Afutam a i Jesu Kristo. 2 Gumafu se mangurug etam sike Kristo, mapurebantam ino simpat i Dios anna mammalamuwang etam si inanamatam a mangiballay si kadayawanna. 3 Bakkan lamang iyan, udde mammalamuwang etam pay si passufritam se ammutam a nu massufriyetam, makalakammutam a mattam. 4 Anna yo gagangay e antu yo kebalinan na pàattam a neyannut i Dios anneno gagangay a neyannut i Dios e mangadda sikwatam si inanama. 5 Anna iyaw a inanama e ammenengke etamma a laffayan gumafu se yo idduk i Dios e nebubbu sito nakamtam megafu so Espirituna a neyadda sikwatam.6 Sin awan a nammutam a maduffunan yo baggitam ingkepay so fustu a tiyempu, natay i Kristo para sikwatam a mattulyat sike Dios. 7 Gakkurug a mabilang yo tolay a matay para si matunung a tolay, tantaro anana tata a malalaki a manggam a matay para si mapiya a tolay. 8 Udde nepaitana i Dios ino idduknga sikwatam, gumafu sitaw e natay i Kristo para sikwatam sin sinaliwat etam kepay. 9 Antu megafu so dāna, napatunung etam si aggita i Dios anna gakkurug a matabbut etamma megafu sikwana so akkastigua i Dios si liwa-liwattam. 10 Se sinoy, kapakwana etam i Dios, udde sitoye, nebilangnga etam a kolakngera megafu si akkapatayeno Anaknga. Gumafu sitaw, siguradu a matabbut etamma i Jesus megafu si panantotolena. 11 Udde bakkan lamang iyan udde mammalamuwang etam so inangwa i Dios sikwatam megafu sike Afutam a i Jesu Kristo. Gumafu sike Jesus e napakoli etamun sike Dios.
I Adam anni Kristo
12 Antuweyaw yo nedemmu. Sin nabayagin a tiyempu, tinumallung yo liwat sito talubaggan megafu sike Adam, anna yo patay e dinumatang megafu si liwat. Nabu, amminan a tolayera e matay gumafu se amminan a tolayera e nalliwat. 13 Gakkurug a yo tolayera sito talubaggan e nalliwat liye a neyaddeno katunungan, udde ammena nebilang i Dios ino liwatda a metulyat si katunungan gumafu se awan kepay a katunungan a pakimorayan. 14 Maski nu kunna sinay, mamefu so tiyempu a awan kepay katunungan mamefu sike Adam makiyad so tiyempu i Moises, amminan a tolayera e matay gumafu si liwa-liwatda, maski inoyera a amme nalliwat kakunna yo amme pakimoray i Adam. I Adam e kakunna sike Kristo a gumumwangnga.
15 Udde amme mapparefu iyaw a adwa gumafu se yo libre a pannabbut i Dios e bakkan a kakunna yo liwat i Adam. Gakkurug a oddu tolayera a natay gumafu si liwat na tata tolay. Udde mas dokal yo simpat i Dios, anna maski yo libre a pannabbutna so odduwengke a tolayera megafu si simpat na tata a tolay a i Jesu Kristo. 16 Anneno libre a pannabbut i Dios e bakkan a kakunna yo kebalinan na pakaliwatan i Adam. Se yo pannunut na akkastigu e antu yo kebalinan na pakaliwatan i Adam, udde yo libre a pannabbut i Dios e mattabaliyerana a matunung si aggitana maski nu oddu yo pakaliwatanda. 17 Gumafu so liwat na tata tolay a i Adam, amminan a tolayera e matay. Udde annanotinna yo kebalinanna yo naangweno tata tolay a i Jesu Kristo! Amminan a mangarasaw si odduwengke a simpat i Dios e libreyera a mapatunung a bulunna e mattangngal irana si akkatolay megafu sike Kristo.
18 Kunnantu, yo liwat na tata tolay e antu yo pakakastiguwan na amminan a tolayera, si kakunna keppay a yo tata mapiya a tadda na tata tolay e nattabali amminan a tolayera a matunung anna manolayera a bulun i Dios amu-amu. 19 Gumafu si tata tolay a i Adam a ammena nakimoray sike Dios, oddu yo nalliwat. Si kakunna keppay a yo tata a tolay a i Jesu Kristo a nakimoray sike Dios e oddu yo tolayera a napatunung. 20 Neyaddana i Dios ino katunungan takesi amminan a tolayera e maimunuwandana nu kasannengke inomoddu yo liwa-liwatda. Udde sin inomoddu yo liwa-liwatda, yo simpat i Dios sikwara e tattullot a inomoddu. 21 Nabu, gumafu se amme magaggaddan ino tolayera a malliwat e matayera. Masimpat ingke i Dios sikwatam takesi mapurebantam ino simpatna si pappatunung sikwatam si aggitana. Iyaw yo mangigiya sikwatam a manolay a bulun i Dios amu-amu megafu sike Jesu Kristo a Afutam.