Na Bawu a Angat sike Kristo
6
Nenay antu yo sapitantam? Ibali-balintam kad a malliwat tapenu annanot a madaggan yo simpatna i Dios sikwatam? 2 Ammenengke! Kasannatam a ibali-balin a malliwat nu ammetamun a manolay a sinaliwat. 3 Ammeyu kad ammu a sin nabawtismuwan etam mepaita a nakisittata etam sike Kristo Jesus anna mepaita pay a manilla natay etam a bulunna? 4 Nabu, sin nabawtismuwan etam, manilla netanam etam a bulunna si akkapatena takesi matolay etamma pay si bawu a akkatolay kakunna yo panantotolay imman i Kristo megafu si madayaw a pakapangwa i Dios a Amatam.5 Se nu nakisittata etam sikwana si akkapatena, gakkurug a makisittata etamma sikwana kakunna yo panantotolena. 6 Ammutam a yo dadan a kinatoletam e nepatak so kurut a bulun i Kristo takesi yo pakapangwa na liwat a ana sikwatam e madaralna anna ammetamun nagaggaddan si panggammantam a malliwat kakunna yo imbut ira a nagaggaddan na amura. 7 Se nu matay yo tata tolay, malibre si pakapangwa na liwat. 8 Gumafu se manilla natay etam a bulun i Kristo, mangurug etam a ibali-balintamma a manolay a bulunna. 9 Ammutam a yo panantotolay i Kristo e ammenan a matay. Awanin a pakapangwa na patay sikwana. 10 Sin natay i Kristo, namitta a natay baggina para si amminan tapenu kattanganneno pakapangwa na liwat, udde sitoye, natolay baggina para si kadayawan i Dios. 11 Si kakunna keppay, ibilang diyaw nad yo baggiyu ingkepay a bakkang kayun a nagaggaddan si pakapangwa na liwat udde aggatolay kayu para sike Dios megafu si pakisittatayu sike Kristo Jesus. 12 Kunnantu, ammeyu purayan yo liwat a maggaggad si baggiyuwera a matena takesi ammeyuna akwan ino maral a panggamman na baggiyuwera. 13 Ammeyu purayan a maski sanna a parte na baggiyuwera a malliwat a meyusa si maral a gakkad ira, udde iyaddayu yo baggiyuwera ingkepay sike Dios a maggaggadna baggina gumafu se manilla kayuweno natayera udde nantotolay. Anna italak diyaw sikwaneno interu a baggiyuwera a meyusa si kinamatunung. 14 Se yo liwat e ammena nad a manangngal sikwayu gumafu se amme kayu a matolena nu nenay itunduweno katunungan sikwayu udde si simpat i Dios a nepaitana sikwayu.
Na Kargu a Mangwa si Mapiya
15 Nenay antu? Malliwat etam kad gumafu se natabbut etam si simpat i Dios anna bakkan si katunungan? Ammenengke! 16 Ammeyu kad ammu a nu mappaimbut kayu e imbut dakayu yo nakimorayan diyaw. Nu malliwat kayu, antu yo pakapatayan diyaw a pakesinan diyawna sike Dios amu-amu. Nu makimoray kayu sike Dios, mapatunung kayu si aggitana. 17 Sinoy, nagaggaddang kayu si pakapangwa na liwat. Udde mabbalatak sike Dios se gakkurug ingke a nakimoray kayu so tunturu a neyadda sikwayu. 18 Nalibre kayun si paggaggad na pakapangwa na liwat e sitoye nagaggaddang kayun si kinamatunung. 19 Gumafu si makafuy a nakagagangayan diyaw, mangiyusaak si pangngarigan na akkeyimbut takesi maintindiyan diyaw iyaw. Sinoy, kinanggamman diyaw a akwan ino kadakkutan anna kamarallan a annanot a nammaral kakunna yo imbut ira a dumaladandan si amura. Antu sitoye, kakunna yo imbut ira e ipagaggad diyaweno baggiyu a mangwa si fustu si aggita i Dios takesi mesina kayuna si liwat. 20 Sin nagaggaddang kayu si pakapangwa na liwat, amme kayu nannonot a manolay si matunung. 21 Udde nenay kad yo naappayu so inangwayu a pakaatatallan diyaw sitoye? Na kebalinan na aggangwayuwera e patay. 22 Udde sitoye, nalibre kayun a magaggaddan si panggamman diyaw a malliwat. Manangilawa kayunengke sike Dios a awan pakkuranganna anneno kebalinanna e manolay kayu a bulun i Dios amu-amu. 23 Se yo pappaga si liwat e patay udde inindanna i Dios ino tolenera si libre a pannabbut a manolay a bulun i Dios amu-amu megafu si pakisittatatam sike Kristo Jesus a Afutam.