Na Pangngarigan a Naggabwat si Aggatawa
7
Wawwayik ira si angngurug, awan a pabbabang a ammuyuweno katunungan. Ammuyu a yo tata tolay e sakupan lamang na katunungan sikwana a siggatolay. 2 Meantu so katunungan, yo bafay e maawag a sigga-atawan so atawana sikwana a natolay kepay. Udde nu matay yo atawana, malibre baggina si katunungan patamu si atawana. 3 Nabu, malliwat baggina si pakikkarallaw nu makibulun baggina si korwan a lalaki sikwana a siggatolay yo atawana. Udde nu natayin ino atawana, malibre baggina si katunungan na aggatawa, anna nu makiatawa imman si korwan a lalaki kapiye a natayin ino atawana, ammena malliwat si pakikkarallaw.4 Si kakunna keppay, wawwayik ira si angngurug, nalibre kayun si katunungan a nattangngal sikwayu gumafu se manilla pay a natay etam sin natay i Kristo so kurut. Anna sitoye, meyannung kayu sikwana a napanantotolay tapenu manolay etamma a mangwa si mapiya a asserbi sike Dios. 5 Sikwatam a aggatolay si sinaliwat a baggitam ingkepay, yo maral a panggammantam antu yo mattangngal sikwatam. Inumoddu inoyera a panggamman gumafu so aggammutam si katunungan ira i Diosa. Anneno kebalinanna e yo akkesinatam sike Dios. 6 Udde sitoye, nalibre etam si pakimoray si katunungan tapenu matabbut etam. Manilla natay etam si paggaggadna. E sitoye, serbiyantam i Dios si bawu a pangwa a ammetamun magaggaddan si dadan a panuntulan ino neturak a katunungan. Sitoye, serbiyantam i Dios si bawu a akkatolay si duffun si Espirituna.
Na Katunungan anna Liwat
7 Nenay antu mekuntam? A yo katunungan e liwat? Ammenengke! Udde yo katunungan e nepaammu sikwak nu nenay yo liwat. Ammek nad naammuwan nu nenay yo umifag nu ammena nesapit ino katunungan, “Ammeka umifag.”b 8 Anna gumafu se nasapitna iyan a dundun, yo maliwat a panggammangku a maappa yo kiya-kiyan a akwa na korwan ira e antu yo pakaumifagangku si oddu a pangwera. Se nu awan a katunungan e awan pakapangwa na liwat. 9 Sinoy, nanolayak a awan katunungan, udde sin naammuwangkuweno katunungan, lannat a naimammatangku a nalliwatak. 10 Anna naintindiyangku a nesinaak sike Dios anneno dundun a mangadda nad sikwak si angat nu nakimorayak e antu yo nangisina sikwak sike Dios. 11 Naillokuwak gumafu si nakaliwatangku gumafu se arigku a matolayaknga a bulun i Dios megafu si pakimorek si dundun, udde si kagakkuruwanna e ammek maumid a makimoray si dundun na katunungan, nabu nakastiguwanak a mesina sike Dios. 12 Kunnantu, yo katunungan anneno dundun a naggabwat sike Dios e fustu anna mapiya.
13 Kanggamma kad iyaw a sapitan a nu nenay a mapiya e antu yo pakegafuwanna akkesinak sike Dios? Bakkan. Neyuseno liwat yo mapiya a dundun a nappasina sikwak sike Dios. Mepaita iyaw nu kasannengke kadammat yo liwat. Nabu, gumafu si katunungan, mepaita a yo liwat e gakkurug a maral ingke.
Na Mattitinnulyat si Agginonotan na Minangikkurug
14 Se ammutam a yo katunungan e naggabwat sike Espiritu i Dios. Udde mangwaak si maral a panggamman na baggik, manilla nappaimbutak a nafuwersa a malliwat. 15 Ammek maintindiyan yo akakwangku. Se ammek akwan ino kanggamku udde akwangkuweno ikalussok. 16 Udde nu akwangkuweno ammek kanggam, mepaita a umannungak a mapiya yo katunungan. 17 Antu, bakkan a mangwaak si maral a kiya-kiyan gumafu se kanggamku a akwan ira udde yo panggam a malliwat e antu yo magga-gaggad sikwak. 18 Se ammuk a awan a mapiya a sigigyan sikwak a tata a tolay. Kanggamku a mangwa si mapiya udde ammek makwa. 19 Se ammek makweno mapiya a kanggamku a akwan, udde akwangkuweno maral a ammek kanggam a akwan. 20 Antu, nu akwangkuweno ammek kanggam a akwan, bakkanak ino nangwa sitaw nu bakkan yo sinaliwat a baggik ingkepay.
21 Antu naammuwangku a mededemmu iyaw sikwak a nu kanggamku a mangwa si mapiya, ammek magaggaddan yo baggik a mangwa si maral. 22 Si nakamku, maanggammannak ingke si katunungan i Dios. 23 Udde maitak sito sinaliwat a baggik ino tameta a katunungan a metulyat si katunungan a arasawangku si nakamku, nabu manilla a imbutak na liwat a sigigyan sito baggik. 24 Pakekkallakak a tolay! Yanya yo manabbutna sikwak sitaw a maral a panggamman na baggik a mangisina sikwak sike Dios? 25 Mabbalatak sike Dios a megafu sike Jesu Kristo a Afutam e tinabbutnakun! Si nakamku, damak a pakimorayan ino katunungan i Dios udde si sinaliwat a baggik, manillaak a imbut na liwat.