Manolay Meantu si Espiritu i Dios
8
Kunnantu, awan a akkastigu so inoyera a nakisittata sike Kristo Jesus. 2 Se yo pakapangweno Espiritu i Dios a mangadda si angat megafu sike Kristo Jesus e nelibre nakayu si panggamman a malliwat anna akkesina sike Dios. 3 Se yo katunungan e ammena maariyeno pakapangwa na liwat si akkatoletam gumafu se makafuy etam si sinaliwat a baggitam udde inangwana i Dios nu nenay amme maangwa na katunungan. Nedundunneno Anaknga ingkepay a nabbaggi kakunna yo baggitam ira a malliwat dengke a tata sakrifisyu a màaku si akkastigu na liwa-liwattam. Si kunna sinay, awanin a paggaggad na liwat sikwatam. 4 Inangwana i Dios iyaw takesi nu nenay yo kaawan na katunungan a akwantam e makwatam a manolay megafu si duffun ino Espiritu i Dios anna bakkan a megafu si maral a panggamman na baggi. 5 Se inoyera a manolay meantu si sinaliwat a baggirera e nonotanda nu nenay yo kanggamman na baggira udde inoyera a manolay meantu si Espiritu i Dios e nonotanda nu nenay yo kanggamman ino Espiritu i Dios. 6 Se nu ipabulunnu yo agginonotannu a magaggaddan na sinaliwat a baggim, yo kebalinanna e akkesina sike Dios, udde nu ipabulunnu a yo Espiritu i Dios a maggaggad si agginonotannu, yo kebalinanna e akkatolay a bulun i Dios anna piya. 7 Antu gafuna, yo tolayera a mannonot a mappagaggad si sinaliwat a panggamman na baggirera e kapakwa i Dios anna ammera makimoray si katunungan i Dios e gakkurug a ammera makwa. 8 Na tolayera a dumandan so sinaliwat a panggamman na baggirera e ammera mapaanggamman i Dios.9 Udde ikkayu e amme magaggaddan si sinaliwat a panggamman na baggiyuwera gumafu se sigigyan ino Espiritu i Dios sikwayu. Seanya yo awan sikwaneno Espiritu i Kristo e amme meyannung sikwana. 10 Udde nu ana sikwayu i Kristo, maski nu matena yo baggiyuwera gumafu si liwat, yo espirituyuweraa e aggatolay gumafu se nebilang kayun a matunung si aggita i Dios. 11 Nu yo Espiritu i Dios a nappanantotolay sike Jesus e sigigyan sikwayu, I Dios a nappanantotolay sike Kristo e mangadda pena si angat so baggiyuwera a matay megafu si Espirituna a sigigyan sikwayu.
12 Kunnantu, wawwayik, ammetam nad a mappagaggad si sinaliwat a panggamman na baggitam ira nu sintaw a akwantam ino maral a panggammantam ira. 13 Se nu manolay kayu si maral a panggamman diyawera, mesina kayuna sike Dios. Udde nu megafu si Espiritu i Dios anna ibbattan diyaweno maral a panggamman na baggiyuwera, manolay kayuna a bulun i Dios amu-amu. 14 Se amminan a negiyeno Espiritu i Dios e anak ira i Dios. 15 Se yo Espiritu i Dios a naarasoyu e ammena kayu panolayan si talaw kakunna yo imbut ira a mattalaw si amurera. Imbes, naarasoyuweno Espiritu i Dios takesi ampunan nakayu a anakngera. Nu ayantam i Dios, “Ama! Ama!” 16 i Espiritu i Dios ingkepay yo massapit si espiritutam ira a gakkurug a anaknga etam i Dios. 17 Anna gumafu se anaknga etam i Dios, maarasotammeno mapiya a kiya-kiyan para si tolenera anna amminan pay a neyaddana sike Kristo.b Se nu gakkurug a bulunna etam si passufrina, bulunna etam si kadayawanna.
Na Paggumwang a Pakadayawan
(2 Corinto 4:17-18; 2 Pedro 3:10-13)
18 Ibilangku a yo passufritam ira sito maddaggun a tiyempu e awan a kakunnana si pakadayawan i Dios a iyaddanana sikwatam.
19 Se inoyera a pinaratu i Dios e maanap irengke para si pappakaammu so anak ira i Dios. 20 Gumafu si liwa-liwat na tolayera, amminan a pinaratu i Dios e nangangkakwa kanggamma sapitan ammeran naparulot ino gakkadda si akkaparatura. Bakkan a gumafu si urera ingkepay udde gumafu si uray i Dios. Maski nu kunna sinay, nangadda pay baggina si inanama 21 a amminan a pinaratuna e malibrena kanggamma sapitan, ammeran maluntut anna makkaparefuneno akkelibrera anna kadayawan a meyannung si anak ira i Dios. 22 Se ammutam a yo interu a pinaratu i Dios e minda-indag makiyad sitoye kakunna yo bafay a maddaying si low na panak. 23 Anna bakkan lamang ino interu a naparatu udde ikkanetam ingkepay e maddaying pay. Naarasotam ino Espiritu i Dios a antu yo palungu a neyaddana i Dios sikwatam a mangurug. Antu, mindag etam so tiyempu nanu matakkilalan etammengke a naampun a anak ira i Dios a yo baggitam e malibrena si liwat anna passufri. 24 Naindan etam sitaw a inanama sin natabbut etam. Nu maitatam nu nenay yo innanamantam, bakkan iyan a gakkurug a inanama. Se awan a mainnanama nu maitanan. 25 Se nu mainnanama etam si ammetam kepay a maita, pasensiyantam a indaggan inay. 26 Kunna payeno Espiritu i Dios a manuffun sikwatam si pakkafuyantam, se ammetam ammu nu kasanna etam nad a maddasal, antu yo Espiritu i Dios ino maddaying para sikwatam, si pakaangwan a ammetam dama a mesapit. 27 Anna ammunan i Dios ino nakamtam. Anna maintindiyanneno sapi-sapitan na Espiritu, gumafu se yo Espiritu i Dios antu yo massapit para si tolenera meantu si uray i Dios. 28 Ammutam a inangwa i Dios ino amminan a kiya-kiyan para si pammakapiyan inoyera a midduk sikwana, amminan a pinilina meantu si gakkadna. 29 Se ammunera i Dios liyena pinaratu yo talubaggan. Anna dinesisyonanna a kakunnaraneno Anaknga tapenu bagginana yo palungu a meyanak si oddu a mawwawayi. 30 Anna inoyera a ammu i Dios sinoy kepay e pinilinera pay. Anneno pinilinera e pinatunungnga pay si aggitana. Anneno pinatunungngera si aggitana e mesapat ira pena si pakadayawanna.
Awan Makapasina Sikwatam si Idduk i Dios
31 Nenay antu yo mekuntam sitawera a kiya-kiyan? Nu i Dios e para sikwatam, yanya yo mattulyat sikwatam? 32 Ammena neyituk i Dios ino Anaknga a massufri udde nedutungnga baggina a sakrifisyu para si liwa-liwattam. Nu nedawawaneno anaknga a makastigu para sikwatam amminan, tattullot a iyaddanana amminan a maawagtam. 33 Yanya yo màakusa so tolayera a pinili i Dios? Awan ingke! I Dios ingkepay yo makapatunung sikwara si aggitana. 34 Yanya yo makkastigu sikwatam? Awan, se i Kristo Jesus e natay para sikwatam. On, nantotolay baggina e ana so padiwanan i Dios. Baggineno gakkurug a mangisapit sikwatam sike Dios. 35 Awan a makapasina sikwatam si idduk i Kristo maski kepay paddiriyat, onnu pakaburungan onnu awan maakkan onnu pakkalubbung onnu tolayera a manantalaw sikwatam onnu bisin onnu patay. 36 Se yo neturak a sapit i Dios e makkun,
“Maipegafu sikwam, ana kami si peligru na patay si amminan a tiyempu.
Nebilang dakami a manilla karneruwera a maparti.”
37 Gakkurug a amminan iyawera a kiya-kiyan e siguradu a mangaffut etam megafu sike Jesu Kristo a midduk sikwatam. 38 Se naanggammannak a maski kepay patay, onnu angat, onnu anghel ira, onnu gumattangngal ira, onnu kiya-kiyan ira a anera sitoye, onnu kiya-kiyan ira a dumatang, onnu pakapangwera, 39 maski kepay si uttun onnu dolam na lubag, awan ingke si amminan a pinaratu a makapasina sikwatam si idduk i Dios a mapure-purebantam gumafu si pakisittatatam sike Kristo Jesus a Afutam.