Na Pannuli i Afu Jesu Kristo
3
Iddu-iddukangku a wawwayik, antuweyaw yo meka-adwa a turakku sikwayu. So adwa a turak a nimannutunan takayu so iyawera a ammuyun, takesi nanu madandam diyaweno neturakku, makaduffun nad sikwayu a mannonot si fustu meafu sitawera 2 a sinapit ino profetera i Dios siin nabayagin a tiyempu anneno dundun i Afutam anna Mannabbuttam. Neyaddana sikwatam iyan a dundun megafu so apostol diyawera. 3 Maawag a maintindiyan diyaw nu nenay yo mededemmuna so uddi na awera. Katawan dakayuneno tolayera. Akwandaneno maral a taddera a kanggamda a akwan. 4 Sapitandana, “Netambana i Jesus a mannuli, bakkang kad? Ope baggina? Natayin ino aggidiyafuwantam ira udde awan keppay nangangkakwanna mamefu sin naparatuweno talubaggan.” 5 Gakkadda a kalyawan ino kagakkuruwan nu nenay yo nedemmu siin nabayagin a tiyempu sin naparatuweno langit anna lubag si danum anna megafu si danum. Nedemmu iyawera megafu si sapit i Dios. 6 Antu nallinang ino talubaggan anna nadaral si danum. 7 Anna pay si sapit i Dios, nakaparan a mataggab ino langit anna lubag, anna maimfunan makiyad so Aw na Pannunut anna akkadaral na maral ira.8 Udde, iddu-iddukangku a wawwayik, ammeyu nad kalyawan iyaw a sike Afu Dios yo tata aw e kakunna yo tarifu rawun anneno tarifu rawun e manilla tata aw. 9 Ammena pinurayan i Afu Dios a mangwa so netambana a kakunna yo nononotan ino korwan ira. Udde mapasensiya i Dios sikwayu. Ammena kanggam a ana tata a madaral udde kanggamma a mabboboli amminan a tolayera. 10 Udde yo aw i Afu Dios e dumatangnga a amme innanaman kakunna yo paddatang na gumakkokot. Anna sitan a aw, anana yo matuyag a uni e tumallapneno langit. Amminan a ana so kalawatan, yo dakkag anneno bitun ira e madaralna si afuy. Na talubaggan anna amminan a ana sitaw e maawanna.a
11 Gumafu se darallannana i Dios amminan iyawera a kiya-kiyan, maawag a manolay kayu lamang sike Dios anna akwan diyaweno panggammanna, 12 sikwayu a minda-indag anna mappala-palan so paddatang ino aw i Dios, kanggamman diyawengke a dumatangngin ammat si maski sanna. Nanu dumatang, madaralneno kalawatan si afuy, anna amminan a ana so kalawatan e malunagnga si patu na afuy. 13 Udde nattamba i Dios sikwatam. E inda-indaggantam ino netambana a bawu a langit anna bawu a lubag, iyanna yo lugar a pagyanan ino tolayera meantu so uray i Dios.
Na Panguddi a Sapit Ira
14 Kunnantu, wawwayik, sikwayu a minda-indag sitawera a mededemmu, akwan diyaw amminan a damaramayu a makipanolay si piya sike Dios a awan liwatna anna awan pakaliwatanna. 15 E dandamman diyaw, yo pasensiya i Afu e mangadda so tolayera si tiyempu a matabbut. Antuweyaw pay yo neturak sikwayu i Pablo a iddu-iddukantam a wayi meantu so angngammu a neyaddana i Dios sikwana. 16 Antuweyaw yo sapi-sapitanna so amminan a turakngera sin itura-turaknga meafu sitawera. Madiyat a maintindiyan ino korwan a turakngera anneno korwan a tolayera e ammena fustuweno ibarifitda. Kunnapay yo akakwanda so korwan a neturak a sapit i Dios, antu darallanda lud yo baggira.
17 Kunnantu, ikkayu a iddu-iddukangku a wawwayik, gumafu se napalanáng kayu meafu sitaw, mimud kayu takesi amme kayuna a maillokuweno tolayera a mangwa si maral anna amme kayuna mabbabang so matuyag a angngurug diyaw. 18 Udde ibali-balin diyaw a manolay si simpat anna aggammu sike Afutam anna Mannabbuttam a i Jesu Kristo. Madayaw sikwana, sitoye anna amu-amu! Amen.