Na Sasan-Profetera anna Sasan-Mestruwera
2
Udde mappadda pay yo sasan-profetera so Israelitera, kunnapay a anana yo mappadda sikwayu a sasan-mestruwera a amme kayuwengkena maimammatan a manuntu-tunturuwera si ammena fustu antu yo pakegafuwan ino akkadaral na angngurug diyaw. Iyambafaggana maskiyeno i Afu a i Jesu Kristo a nanubbut si liwatdera antu ammena mabbayag e madaral ira. 2 Maski kepay nu kunna sitan, oddu keppay a tolayera a dumandanna so maral a akakwanda anna gumafu sitawera a sasan-mestruwera, massapitna si maral ino korwan ira meafu so kagakkuruwan a netunturu i Jesu Kristo a tuntulantam. 3 Si kinaagumda, illokun dakayu megafu si mammit a aggabiranda. Nabayagin a nakaparan yo pannunut sikwara anneno akkadaralda e ammenana matalantan.4 Akwannana iyaw i Dios gumafu se ammena lud nabbabang a kastiguwan ino liwa-liwat a naangweno anghel ira siin nabayagin a tiyempu e neyekwanera so infiyernu anna nefukukngera so kalammukan ingke makiyad so Aw na Pannunut.
5 E kinastiguwan pay i Dios ino talubaggan siin nabayagin a tiyempu a napannu si tolayera a tumulyat sikwana sin dinaralna iyaw megafu si linang. Awan a tinabbutna nu bakkan i Noah anneno pitu a bulunnera.a Nangipakaammu i Noah so tolayera meafu si matunung a akkatolay.
6 E kinastiguwan pay i Dios ino lubbu-lubbun na Sodoma anna Gomorra. Tinaggabnera makiyad si awan a nabuna udde lallang lamang. Neyusana inoyera a lubbu-lubbun a pangngarigan so medemmuna so tolayera a mattulyat sike Dios. 7 Udde nesalaknga i Lot, tata matunung a tolay. Narraddam ingke i Lot gumafu so kaatatal a inangweno maral a tolayera. 8 Kinaaw a nakiigyan iyaw a matunung a tolay so maral a tolayera. Kurwengke a madidiyat ino mapiya a nakamma si maral a aggalangwera a naitana anna nadingngagnga.b 9 Kunnantu, isalaknga i Afu Dios inoyera a mangwa si urena si pamureba anna kasti-kastiguwanneno maral a tolayera makiyad so Aw na Pannunut 10 metalwaring inoyera a mangwa si kaatatal a panggamman na baggira anna mappadakkut sikwara anna inoyera a mammay so pakandama i Dios a mattangngal sikwara.
Iyawera a sasan-mestruwera e akwanda nu nenay yo kanggamda a akwan anna balagasayerengke. Ammera mattalaw maski massapit si maral metulyat so anghel ira. 11 Maski nu tammatuyag anna mas makapangweno anghel ira ammat so sasan-mestruwera, ammerera akusan anna massapit si maral meafu sikwara sike Afu. 12 Udde iyawera a sasan-mestruwera e massapit si maral metulyat so ammera maintindiyan. Manillera aggayam ira a awan ginanakamda. Madaral irana kakunna yo simaron a aggayam ira a neyanak a magafutna anna matena. 13 So pammadiyatda so korwan ira kastiguwan irana i Dios.
Arigga se kaangga-anggam ino mangwa si maral nu sintaw yo amminan e makaita sikwara. Kaatatallan anna kadarallan si dayaweno akakwanda, manillera mantsa so malinis a barasi. Maanggam ira a nailloku dakayu sikwara a nakiakka-akkan sikwayu. 14 Awan korwan a intu-intufukanda nu bakkan bafabbayera a pifagganda. Na panggammanda si liwat e ammenengke makuntentu. Anna sussuwandeno tolayera a makafuy yo angngurugga a malliwat. Mapoporayera a maagum si nenay yo kanggamda para si baggira ingkepay. Kastiguwannanera i Dios amu-amu. 15 Nimemmak iyawera a sasan-mestruwera a mangwa-angwa si matunung imbes mangwa-angwera si maral. Tinuntuldeno inangwa i Balaam a anak i Bosor a nalliwat gumafu si panggamma si paga so pangwa si maral. 16 Udde neyusana i Dios ino asno a passapitan i Balaam so maral a akakwanna. Nassapit ino gumal a asno a manilla tolay e pinamemmakngeno kapallawan na profeta.
17 Iwawanda iyawera a sasan-mestruwera ino tolayera si pattambara a ammera dama maangwa kakunna yo namma a bitufut a iwawanneno tolayera a innanamanda a makaappa si danum sinay. Kunnapay a iwawandeno tolayera a kakunna yo dulam ira a nepalled na matuyag a leled e innanamanda a muran udde awan uran. Neparanna i Dios ino kalammukan a infiyernu para sikwara. 18 Mappakkawera a mabid udde yo sapi-sapitanda e awan serbina. Usandeno panggamman na baggi takesi metoli inoyera a mamefu kepay lamang a manalekkud so tolayera a manolay si bakkan a matunung. 19 Netambareno sasan-mestruwera sikwara a libreyera a mangwa nu nenay yo kanggamda a akwan. Udde imbut ira ingkepay si maral a aggalangwa a manaral sikwara. Se imbut ino tolayera si sanna a maggaggad sikwara.
20 Nakalillikin so kamarallan na talubaggan ino tolayera a makaammu sike Jesu Kristo a Afu anna Mannabbut. Udde nu muliyera imman so dadan a maral a aggangwara, mas maral ira kepay ammat siin. 21 Mas mapiya nad sikwara nu ammera naammuwan nu nenay kanggamma sapitan a manolay si matunung, ammat mabalin a makalakammureno nakaturak a sapit i Dios a netunturu sikwara e tinalekkuranda iyaw. 22 Mekunnengke so nedemmu sikwara iyawera a gakkurug a lalenut,
“Muteno atu anna akkananneno neyutana,”
anna
“Nadiyutan ino bafuy e muli imman a mabbambang so buyun.”