Na Meka-adwa a Turak i
Pedro
Akkidyot
1
I Simon Pedro iyaw a imbut anna apostol i Jesu Kristo a matturak sikwayu.Antuweyaw yo turakku sikwayu amminan a minangikkurug ira a nakaarasaw sike Dios si kakunna yo angngurugmi gumafu so matunung a angwera i Jesu Kristo a Diostam anna Mannabbuttam.
2 Idasalku a tattullot a massimpatna i Dios sikwayu anna pammapiyannanengke yo akkatoleyu megafu so aggammuyu sikwana anna sike Jesu Kristo a Afutam.
Na Naayan anna Piniliyera i Dios
3 Neyaddana i Dios ino amminan a maawagtam megafu si pakapangwana takesi manolay meantu so uray i Dios. Iyaw e gumafu so aggammutam sike Jesus a baggina keppay yo nappili sikwatam takesi iballayanna etam so kadayawanna anna kapiyananna. 4 Megafu so kadayawanna anna kapiyananna, inindanna etam si kaawan ingke a tambera takesi mesapat etam so akka-Diosna anna malillikantamma yo akkadaral a maggabwat so tolayera sito talubaggan a antu yo maral ira a maumid a panggamman na baggi.
5 Gumafu so amminan a inangwana i Dios sikwatam, kumanan diyaw a idagga so angngurug diyaweno mapiya a aggangwa anna so mapiya a aggangwa e yo aggammu meafu sike Dios. 6 Anna so aggammuyu meafu sike Dios, idaggayuweno paappad si baggi. So paappad si baggi, idaggayuweno pàattam. So pàattam, manolay kayu meantu so uray i Dios. 7 So akkatoleyu meantu so uray i Dios, idaggayuweno pinduk si wawwayiyu si angngurug. So pidduk si wawwayiyu si angngurug, idaggayuweno pidduk so amminan a tolayera. 8 Nu ana amminan sikwayu iyawera anna maumid a akwan diyaw iyawera, ipa-ipaitayu a yo aggammuyu sike Afu Jesu Kristo e ana serbina anna pammakapiyanna. 9 Udde seanya yo awan iyawera sikwana e kakunnana yo tata tolay a ammena kurwa makaita onnu bulag a makalya-kalyawanna a napakomanin i Dios ino liwa-liwatna.
10 Kunnantu, wawwayik, anappan diyawengke a ipaita a gakkurug a inayan anna pinili nakayu i Dios se nu akwan diyaw iyaw, amme kayuna malliwat. 11 Se nu kunna sitaweno akwan diyaw, sibubukkat a arasawan nakayu i Dios a tumallung so pattangngalan i Afutam anna Mannabbuttam a Jesu Kristo amu-amu.
12 Kunnantu, gagguriyatangku a siggamannutun sikwayu meafu sitawera a kiya-kiyan maski nu ammuyun anna taddan diyaweno kagakkuruwanna yo netunturu sikwayu. 13 Si nakamku, fustu lamang a mannutunan takayu sitawera a kiya-kiyan sikwak a natolay kepay 14 gumafu se ammuk a matayakunna meantu so nepakaammu i Afutam a Jesu Kristo sikwak. 15 Akwangku amminan a damaramak takesi siggadandam diyaw iyawera a kiya-kiyan maski kepay natayakun.
Na Testiguwera so Kadayawan i Kristo
16 Na netundumi sikwayu meafu so pakapangwa anna pannuli i Afutam a Jesu Kristo e bakkan lamang a angweno tolayera udde naimammatammiyeno kadayawan i Jesus. 17 Se napadayawannengke i Dios i Jesus sin nadingngagnga i Dios a madayawengke a nakkun, “Antuweyaw yo Anakku a iddu-iddukangku. Pakaanggammangkuwengke baggina.” 18 Nadingngagmi i Dios si langit, sikwami a bulunna i Jesus so bakulud i Dios.
19 Kunnantu, tinaddammi a gakkurug yo sinapit ino profetera meafu sike Kristo. Antu, mapiya nad para sikwayu a maningngag si mapiya meafu so neturakda a kakunna yo allamparan a mabbaggaw so lammuk a lugar. Akwan diyaw iyaw makiyad so pannuli i Jesu Kristo anna ipabaggawna amminan sikwayu a kakunna yo paggibbat anna pallattak na basilelaw. 20 Mas kaawan si amminan, maawag a maintindiyan diyaw iyaw a awan a makabarifit si baggina ingkepay yo kanggamma sapitan ino neturak na profetera so neturak a sapit i Dios. 21 Se awan a neturak a sapit i Dios a naggabwat so nakam na tolayera udde yo Espiritu i Dios antu yo mangigiya-giya sikwara a massapit si sapit a naggabwat sike Dios.