Na Tolayera a Pinili i Dios
9
Gakkurug yo sapi-sapitangku se gumaddandanak i Kristo. Ammek massalasiri. Umannung yo konsensiyak a yo sapitangku e gakkurug anna natestiguwan ino Espiritu i Dios. 2 Napannuwengke si raddam yo nakamku anna awan tamfutna a raddam gumafu si ka-Hudyuwangkuwera. 3 Se kanggamku a ikkanak ingkepay yo nemamod anna mesina sike Kristo maipegafu si tolek ira a ka-Hudyuwangkuwera a amme mangurug. 4 Israelitera a pinili i Dios a inampunna a anakngera. Ipinaitana pay sikwareno kadayawanna. Sikwara a nakiyanu-anuwan i Dios anna neyadda sikwareno katunungannera. Netunturuna sikwareno fustu a paddayaw anna neyaddana sikwareno tambanera. 5 Sikwara a naggabwat ino aggidiyafuwan ira a naggabwatan ino kada tribu anna meafu si pattabalina a tolay i Kristo, naggabwat baggina si gakara. I Dios a manangngal si amminan e medayaw amu-amu. Amen.6 Kunnantu, ammena kad pinarulot i Dios ino tambana so Israel? Ammena, se bakkan amminan a neyanak so talubbunan na Israel e gakkurug a meyannung si tolayera i Dios 7 anna bakkan amminan a gakera i Abraham e gakkurug a gakanera. Kunna i Dios sike Abraham, “Inoyera lamang a gakera i Isaac yo mebilangnga a gakam ira.”a 8 Kanggamma iyaw a sapitan a bakkan amminan a gakera i Abraham e nebilang a anakngera i Dios, udde yo gakkurug a gakera i Abraham e inoyera a nattabali a anakngera i Dios gumafu so netambana sike Abraham. 9 Se antuweyaw yo netamba i Dios sike Abraham a kunna, “Muliyaknga so tumufad a dawun si kunna keppay a tiyempu anna manaknga i Sara si lalaki.”b 10 Bakkan lamang iyan, udde kunnapay yo nedemmu sike Rebecca sin nabbussit baggina si siping a lallakiyera a i Isaac a aggidiyafuwantam yo amara. 11 Maski liye kepay a neyanak ino siping onnu nakaangwera si maski sanna a mapiya onnu maral (takesi yo gakkad i Dios si pappilina sikwara e tantaro mebali-balin, 12 bakkan si aggangwara udde sikwana a mappili) kunna i Dios sike Rebecca, “Na tammanakam e masserbina so tan-abbing a wayina.”c 13 Se neturak si sapit i Dios a makkun,
“Iniddukku i Jacob,
udde kinalussok i Esau.”d
“Maallakanaknga so kanggamku a ikallak.”e
16 Nu kunna sitan, yo pappili i Dios e ammena maddepende si panggamman na tolay onnu si akakwanna a mapiya, udde gumafu si allak i Dios. 17 Se neturak so sapit i Dios a kunna sike Faraon, “Pinappatul taka para si gakkad ingke a mepaiteno pakapangwak megafu sikwam takesi yo ngangku e mebalaggona si amminan a talubaggan.”f 18 Antu minaggikallak i Dios so inoyera a kanggamma a allakkan anna pataggatanneno nakam inoyera a pilinna.
Na Allang anna Allak i Dios
19 Kunnuna antu sikwak, “Nu gaggaddan i Dios ino akakwantam, saay antu se paliwatanna etam si liwa-liwattam? Awan a makatulyat si gakkadna.” 20 Udde yanyaka kad ingke, tata a tolay a makitinnulyat sike Dios? Na buyun a buwod e ammena fuutan nu yanyeno nangwa sitaw. Ammena sapitan, “Saay se inangwanak a kunna sitaw?” 21 Na gumàurma e ana pakandamana a maurma so buyun anna mangiyusa si parefu a buyun a mangwa si naddadaruma a kiya-kiyan, tata para si kaawan a keyusan anneno tata e para si ordinaryu a keyusan. 22 Si kakunna keppay, kanggamma i Dios a ipaiteno allangnga anna mepakaammuweno pakapangwana udde pinasensiyannengke a inattamman ino tolayera a kaallangnga. 23 Inangwana iyaw tapenu mepaiteno kadayawannengke so tolayera a inallakkanna. Neparanin i Dios sikwara a mangiballay si kadayawanna, 24 mesapat etam a inayanna, bakkan lamang yo Hudyuwera udde maski pay yo bakkan a Hudyuwera. 25 Antuweyaw yo gakkurug a neturak i profeta Oseas a kunna i Dios,
“Inoyera a bakkan a tolek,
pinganangkuwerana a ‘tolek,’
anna inoyera a ammek inidduk,
e pinganangkuwerana a ‘iddu-iddukangku.’g
26 Anneno lugar a nakaisapitanna sikwara, ‘Bakkang kayu a tolek,’
sinay, maayannera a anak ira na aggatolay a Dios.”h
27 Anna antuweyaw yo negirawa i profeta Isaias patamu so Israel, “Maski yo bilang na gakera i Israel e kakunna yo dāt na bebay, bisang lamang sikwara a nabattang e matabbutna. 28 Se kunna i Dios a akwannana e siddaratnana anna pamittannana a nunutan amminan a tolayera sito lubag.”i 29 Kakunna yo nelabbun i profeta Isaias siin nabayagin a tiyempu,
“Nu i Dios a Makapangwa si amminan e ammena neyannut ino korwan a aggidiyafuwantam ira a matolay,
nadaral etam nad a kakunna yo tolayera so luga-lugar na Sodoma anna Gomorra.”j
Amme Nangurug ino Israelitera sike Kristo
30 Nenay antu masapittam? Maski yo bakkan a Hudyuwera e ammera kinumanan a mattabali a matunung si aggita i Dios, napatunung ira megafu si angngurugga. 31 Udde yo Israelitera a makkuman para si kinamatunung si aggita i Dios a meantu so katunungan, udde ammera naparulot ino katunungan. 32 Saay se ammena? Gumafu se ammera nakkuman para si kinamatunung a megafu si angngurug udde megafu si mapiya a aggangwara. Nalaffayan ira sike Kristo a meyarig si tata a batu a pakadamuruwan na tolayera. 33 Se neturak so sapit i Dios a makkun,
“Maningngag kayu, mangiyekwaaknga so Zion si batu a pakadamuruwan na tolayera, tata a batu a pakadamuruwanda,
anna seanya yo mangurug sikwana e ammenana mapaatallan.”k