Roma 10

Wawwayik, yo panggamman na nakamku anna yo dasalku sike Dios e antu yo akketabbut na Israelitera. 2 Se mataddangku a ana makurug a pangikakwara sike Dios udde yo pintindira si passerbi sike Dios e ammena fustu. 3 Se ammera ammu nu kasanna a ibilangnga i Dios ino tolayera a matunung. Kinumananda a mattabali a matunung si pangwara ingkepay anna ammera inarasaweno pangibilangnga i Dios si tolayera a matunung. 4 Se i Kristo ino kaparulotan na katunungan takesi amminan a mangurug sikwana e mapatunung si aggita i Dios.

Na Pannabbut e para si Amminan

5 Antuweyaw yo neturak i Moises meafu si pappatunung so tolayera si aggita i Dios megafu si pakimoray si katunungan. Kunna, “Na tolay a makimoray si katunungan e matolena meantu sitaw.” 6 Udde kunna sitaw yo nesapit so neturak a sapit i Dios meafu si pappatunung megafu si angngurug, “Ammem nonotan, ‘Yanya yo tumulluna si langit?’ ” (na kanggamma sapitan, kanggamda a padolamman i Kristo) 7 onnu “Yanya yo dumassagnga so lugar na natayera?’ ” (na kanggamma sapitan, kanggamda a pagumbwatan i Kristo a naggabwat so pattanamman ira.) 8 Na kagakkuruwan e yo neturak a sapit i Dios e makkun,

“Na tunturu i Dios e aranni sikwam,

masapit anna manonotnu iyaw,”

(antuweyaw yo tunturu patamu si angngurug a ibalaggomi). 9 Nu sapitannu a i Jesus e Afu anna mangurugka si nakammu a pinantotolay i Dios baggina, antu matabbutkana. 10 Se yo tata a mangurug si nakamma, mapatunung baggina si aggita i Dios. E mepakaammuneno angngurugnga si korwan a tolayera, antu matabbutna baggina. 11 Se kunna so neturak a sapit i Dios, “Awan maski yanya a mangurug sikwana e meyatatalna.” 12 Se awan a paddumanna yo Hudyuwera anna bakkan a Hudyuwera gumafu se i Dios e baggina keppay a Afu si amminan a mangurug sikwana anna minaggiyadda si amminan a mayag sikwana. 13 Se kunna so neturak a sapit i Dios, “Amminan a marang si duffun sike Afu e matabbutna.”

14 Udde kasannera a marang si duffun sikwana nu ammera a mangurug? Kasannera a mangurug nu ammera madingngag ino mensahena? Anna kasannara kad a madingngag ino mensahena nu awan a mangibalaggona meafu sikwana? 15 Anna kasanna kad a makabalaggaw yo maski yanya nu ammena a nedundun? Se neturak so sapit i Dios a nakkun, “Mapiya yo paggumwang inoyera a mangibalaggaw si mapiya a baga meafu sike Jesu Kristo.” 16 Udde bakkan amminan a Hudyuwera e nangarasaw si mapiya a baga meafu sike Jesu Kristo. Se kunna i profeta Isaias, “Afu, bakkan amminan e nangurug nu nenay yo nadingngagga sikwami.” 17 Kunnantu, yo angngurug e naggabwat so nu nenay yo nadingngag, anna madingngag ino tolayera yo Mapiya a Baga nu wara massapit sikwara meafu sike Kristo. 18 Udde fuutangku, ammera kad nadingngag? Kagakkuruwanna, nadingngagga, se kunna so neturak a sapit i Dios,

“Nebalaggaweno tolayera meafu sike Dios si interu a lubag,

anneno mensahera e nadingngag si amminan a kaaroyuwan a tarabbunan na talubaggan.”

19 Fuutangku imman, Ammena kad naintindiyan na Israelitera? I Moises yo palungu a natturak nu nenay yo kunna i Dios,

“Pafun takayuna so inoyera a bakkan a talubbunan,

paallangngan takayuna so inoyera a talubbunan a ibilang diyaw a illaw.”

20 Antu ammena nattalaw i profeta Isaias sin sinapitna patamu so nesapit i Dios,

“Naintufukandak inoyera a amme mintu-intufuk sikwak,

Nepakaammuk ino baggik so inoyera a amme maffuut meafu sikwak.”

21 Udde patamu si Israel e kunna i Dios, “Nabayagin a tiyempu a nindaggak a mannuli sikwak ino tolayera a amme makimoray anna mattulyat sikwak.”