Na Allak i Dios so Hudyuwera
11
Fuutangku antu, inammayanna kad i Dios ino tolenera? Ammenengke! Ikkanak pay e tata a Israelita a gaka i Abraham anna meyannungak so tribu i Benjamin. 2 Ammena inammayan i Dios ino tolenera a pinilina mamefu sin palunguna. Dandamman diyaw nu nenay a kunna so neturak a sapit i Dios meafu sike Elias. Nakigumallak baggina sike Dios metulyat so Israelitera e kunna, 3 “Afu Dios, pinatereno profetam ira anna dinaraldeno altarnuwera. Ikkanak pelamang ino nabattang e kanggammandak a patayan.”a 4 Udde nenay yo netabbag i Dios sikwana? Kunna, “Ana kepay a piturifu a tolek ira a ammera maddayaw so sasan-dios a i Baal.”b 5 Kunnapay sitoye a maddaggun a tiyempu, ana kepay nabattang a Israelitera a pinili i Dios gumafu si simpatna. 6 Anna nu yo pappilina i Dios sikwara e megafu si simpatna, kanggamma sapitan a bakkan a megafu si mapiya a taddarera. Se nu gumafu si mapiya a taddarera a pinilinera, antu bakkan a nebilang megafu si simpat i Dios a pinilinera.7 Nenay antu? Kaodduwan so Israelitera e ammera naappa nu nenay yo intu-intufukanda antu yo nebilang a matunung si aggita i Dios. Dengke so inoyera a pinili i Dios, naappara udde yo korwan ira e nammayera a maningngag sikwana. 8 Se kunna so neturak a sapit i Dios,
“Inangwanera i Dios a amme makanonot si mapiya.
Nabu makiyad sitoye, manillera bulag a amme makatakkilala nu nenay yo fustu,
anna manillera bangngag a ammera makadingngag meafu sikwana.”c
9 E kunna i David sike Dios,
“Lannat nad a magafut ira sikwara a masselebrar a manilla pappitut a lannat a nasilu onnu aggayam a lannat a nasilu so abbut,
anneno kebalinanna e makastiguwera.
10 Malembangngan nad yo nonotda takesi awanin a maintindiyanda.
Antu nad yo pakasuffriyanda a awan pakiyaranna manilla dungkug a tolay gumafu si madammat ingke a akkitna.”d
Na Akketabbut ino Bakkan a Hudyuwera
11 Antu fuutangku: Sin amme nangurug ino Hudyuwera sike Kristo, nesinera kad sike Dios amu-amu? Ammenengke! Udde gumafu se ammera nangurug, mapure-pureban ino bakkan a Hudyuwera sitoye nu nenay kanggamma sapitan a matabbutna takesi mafuweno Israelitera. 12 Dokal a kapiyanan ino dumatang so bakkan a Hudyuwera gumafu so liwa-liwat anna makurang a angngurug na Hudyuwera. Anna mas mapiyengke iyaw nu yo interu a bilang na Hudyuwera e mangurug sike Kristo.
13 Ikkayu a bakkan a Hudyuwera, ana kanggamku a sapitan sikwayu. Gumafu se apostolak so bakkan a Hudyuwera, ipannokalku iyaw a ipaangwa-angwana i Dios sikwak 14 tapenu pafungkuweno tolek ira ingkepay anna matabbutnana i Dios ino korwan sikwara. 15 Se nu yo pammay i Dios so Hudyuwera e antu yo pammakipakoliyeno oddu a tolayera sikwana, yo panangarasawna imman i Dios so Hudyuwera e mekunnana so panantotolayeno natayera. 16 Nu yo palungu a parte na tinapay e newalli sike Dios, antu yo interu a tinapay e newalli sikwana. Anna nu yo gamut na kayu e newalli sike Dios, kunnapay a yo pangera e newalli sikwana. Kunsi kunnapay sitan makiyad sin yo aggidiyafuwan ira na Israelitera e nebilang a tolayera i Dios, yo gakarera e nebilang pay a tolayera i Dios.
17 Na Israelitera e mekunna pay si kayu a olibu a nemula si mapiya nu sintaw a inoyera a amme mangurug e manilla si korwan a panganera a nagabbung. Anna ikkayu a bakkan a Israelitera e mekunna kayu si kayu a olibu a nattalofu ingke lamang. Anna ikkayu e makiballay si mapiya a neyaddana i Dios so Israelitera nu sintaw a ikkayu e manilla pangera a netubbud so kayu a nemula si mapiya. 18 Ammeyu ibilang yo baggiyu ingkepay a mas atannang ammat so inammayan ira i Dios manilla nagabbung a pangera. Dandamman diyaw iyaw: Bakkang kayuweno mappatolay so gamut ira, udde yo gamut ira a mappatolay sikwayu a antu yo pangera.
19 Tantaro nu wara sikwayu a massapitna, “Nagabbung ino pangera takesi metubburak.” 20 Gakkurug iyan. Naammayan ino Hudyuwera manilla pangera a nagabbung gumafu se ammera nangurug udde nakatubbud kayu gumafu se mangurug kayu. Nabu, amme kayu mabbalagasay, imbes mattalaw kayu. 21 Gumafu se amme kinengan i Dios a gabbungan ino gakkurug a pangera a yo Hudyuwera a amme mangurug, ammena kayu ikengan a gabbungan. 22 Maitatam sitaw a i Dios e masimpat anna istriktuwengke. Madungit baggina so malliwa-liwat ira. Udde masimpat i Dios sikwayu nu ibali-balin diyaw a mangurug a masimpat baggina sikwayu. Se nu bakkan, maammayang kayu pena. 23 E kunnapay so Hudyuwera, nu mangurug ira, metubbudnera, se ana pakapangwa i Dios a mangwa sinay. 24 Nu ikkayu a bakkan a Hudyuwera a meyarig si panga na balang a olibu e netubbud nakayu i Dios so gakkurug a kayu a olibu maski nu ammena dama a maangwa, annanot a malan a itubbud i Dios so kayu a olibuweno gakkurug a panganera iyaw.
Na Allak i Dios so Amminan a Tolayera
25 Ikkayu a wawwayik, ana yo kagakkuruwan a amme nepakaammu siin a kanggamku a maammuwan diyaw takesi ammeyuna sapitan a mas mangngammu kayu ammat so Israelitera. Na taggat na ureno Israelitera e ammena mabbayag udde mangangkakwana iyan nu makumpletuweno bilang na bakkan a Hudyuwera a mangurug sike Dios. 26 Nu medemmu inay, oddu a Israelitera e matabbutna. Se kunna so neturak a sapit i Dios,
“Maggabwat si Zion ino Mannabbut e
arinnaneno kamarallan na gakera i Jacob.”
27 E kunna i Dios, “Antuweyaw yo anu-anuwangku sikwara
nanu aringkuweno liwa-liwatda.”e
28 Patamu so pammayeno Israelitera si Mapiya a Baga, nebilang ira a kapakwera i Dios a para si pammakapiyan diyaw, ikkayu a bakkan a Hudyuwera. Patamu so pappilina i Dios sikwara, iddukannera keppay gumafu so netambana si aggidiyafuwandera. 29 Se ammena angkakwan i Dios ino pappilina sikwara anna pangiyaddana si mapiya sikwara. 30 Ikkayu a bakkan a Hudyuwera, amme kayu nakimoray sike Dios siin, udde sitoye inallakkan nakayu gumafu se amme nakimorayeno Hudyuwera sikwana. 31 Amme nakimorayeno Hudyuwera sike Dios tapenu si allak a nepaita sikwayu e sitoye makaarasawera pena si allak. 32 Se pinurayan i Dios ino amminan a tolayera so pangibalinda a amme pakimoray sikwana tapenu mepaginnanna yo allaknga sikwara.
33 Na wara-waranera i Dios e awan kakunnana. Na angngammuna anna aggammuna e amme ingke maintindiyan. Awan a makabarifit si pannunut i Dios anna awan a makaintindi nu saay se akwanneno akakwanna.
34 Se yo neturak a sapit i Dios e makkun, “Yanya yo makaammu si nakam i Dios?
onnu yanya yo makaiyadda si pannabarang sikwana?”f
35 “Onnu yanya yo makaiyadda si maski sanna sikwana
a maawagnga a balattan.”g
36 Se amminan a kiya-kiyan e naggabwat sikwana, anna megafu sikwana anna para sikwana. Meyannung sikwaneno kadayawan amu-amu. Amen.