Na Bawu a Akkatolay sike Kristo
12
Kunnantu, gumafu so dokal a aggikallak i Dios sikwatam, makilelawitak sikwayu a wawwayik a iwalliyu yo angat diyaw a tata aggatolay a sakrifisyu sikwana—a walli a para lamang sike Dios anna kaangga-anggam sikwana. Kunna sitaw yo fustu a paddayaw sike Dios. 2 Ammeyu tuntulan ino gagangayera na tolayera a amme makimoray sike Dios udde ipabulun diyaw a angkakwanna i Dios ino nonot diyaw takesi maintindiyan diyaweno uray i Dios a mapiya, kaangga-anggam anna awan pakkuranganna.3 Gumafu si pribilehiyu anna pakandama a neyaddana i Dios sikwak a tata a apostol, sapitangku sikwayu amminan a ammeyu nonotan a mapiya kayuwengke ammat nu nenay a fustu para sikwayu a mannonot. Imbes, pakanonotan diyaw si mapiya ino gakkurug a akkatoleyu meantu so gukud na angngurug a neyaddana i Dios sikwayu. 4 Na baggi e oddu yo partena anna amminan a partena e naddadarumeno keyusanda. 5 Kunnapay sikwatam, maski oddu etam a mangurug sike Kristo, manilla etam a tata baggi sike Kristo anna etam amminan etam e parte na siggatatan. 6 Naddadaruma yo pannakadamatam a neyaddana i Dios sikwatam megafu si simpatna. Antu nu inindanna etam i Dios si pannakadama a mallabbun, usantam nad meantu si angngurugtam. 7 Nu yo pannakadamatam e masserbi si korwan ira, serbiyantam nad ira si mapiya. Nu yo pannakadamatam e manunturu si sapit i Dios, tunturuwantam nad ira si mapiya. 8 Nu yo pannakadamam e mangangga-anggam, antu nad yo akwannu. Nu yo pannakadamam e mangadda, makurugka nad a mangadda. Nu yo pannakadamam e maggiya so minangikkurug ira, mattalaginnayka nad a maggiya. Nu yo pannakadamam e minaggikallak so korwan ira, maanggamka nad a akwan iyaw.
9 Makurug kayu nad a midduk si korwan ira. Ikallusoyu yo maral. Ibali-balin diyaw a mangwa si mapiya. 10 Makkaiddu-idduk kayu kakunnana gakkurug a mawwawayi anna ikengayuweno korwan ira mas ingke si pangikengara sikwayu. 11 Amme kayu makkayang udde mattalaginnay kayu so akakwan diyaw anna mattalaginnay kayu a masserbi sike Afu Jesus. 12 Mammalamuwang kayu si inanamayu sike Dios. Mappasensiya kayu si passufri anna mattam kayu si paddasal. 13 Duffunan diyaweno wawwayiyu a minangikkurug ira a makaawag si duffun anna paddulotan diyaweno dayuwera.
14 Arangngan diyaw sike Dios a pammapiyanna inoyera a mallupet sikwayu. Arangngan diyaw sikwana a pammapiyannera anna ammeyuwera a imamod. 15 Makimalamuwang kayu so mammalamuwang ira. Makiraddam kayu so marraddam ira. 16 Manolay kayu si piya a siggatatan. Amme kayuwengke mabbalagasay, udde makibumbulung kayu so madidiyat a tolayera. Ammeyu sapitan a nangngammu kayu ammat sikwara. 17 Nu wara mangwa si maral sikwayu, ammeyuwera balattan. Kumanan diyaw a mangwa si mapiya si aggita na amminan a tolayera. 18 Nu damana, akwan diyaweno amminan a damayu a manolay si piya si amminan a tolayera. 19 Ikkayu a iddu-iddukangku, ammeyu balattan inoyera a nangwa si maral sikwayu udde purayan diyaw i Dios a baggineno makkastigu, se neturak so sapit i Afu Dios,
“Akwak yo pabbalat, kastiguwangkuna inoyera a mangwa si maral, kunna i Afu Dios.”a