Na Pakimoray so Gumattangngal Ira
13
Amminan etam nad e makimoray so inoyera a ana pakandamara si gubyernu. Awan pakandamara nu bakkan a iyannut i Dios. I Dios lamang yo nangiyadda si pakandama so manangngal ira. 2 Kunnantu, yo tolay a mattulyat so ana pakandamara e mattulyat so nadutukan i Dios anna gumafu sitaw e makastiguwan irana. 3 Na tolayera a mangwa si mapiya e ammera mattalaw so gumattangngal ira, udde so inoyera a mangwa si maral, baggira yo mattalaw so inoyera a ana pakandamara. Antu gafuna, nu kanggammu a amme mattalaw so gumattangngal ira, mangwaka si mapiya e dayawan dakana. 4 Se yo gumattangngal ira e baggira yo gumasserbi i Dios a mangwa si pammakapiyannu. Udde nu mangwaka si maral, maawag a mattalawka se ana pakandamara a mangastigu gumafu se nadutukan ira i Dios a mannunut so tolayera anna kastiguwanda inoyera a mangwa si maral. 5 Nabu, maawag a makimoray kayu so gumattangngal ira, bakkan lamang a gumafu si talaw si akkastigu i Dios udde gumafu se si konsensiyayu e ammuyu a iyaw yo maawag a akwan diyaw. 6 Se antuweyaw yo gafuna a maawag pay a mappaga kayu si biyenes so ana pakandamara se ira yo gumasserbi i Dios dengke a ibali-balinda a akwan ino tarabafura. 7 Mappaga kayu si amminan nu nenay yo nakagatutan diyaw sikwara. Nu nakagatut kayu sikwara si maski sanna a biyenes, maawag a pagan diyawera. Ilawayu inoyera a mepangngat a melawa, anna dayawan diyaw inoyera a mepangngat a medayaw,Na Aggidduk si Kasittolayera
8 Amme kayu makagatut maski yanya. Udde gatut diyaw a midduk a siggatatan. Se yo tolay a midduk si kasittolenera, akwanna amminan ino katunungan i Dios. 9 Dandamman diyaweno dundun ira a kunna, “Ammeka makikkarallaw, ammeka mamapatay, ammeka makkokot anna ammeka umifag.”a Amminan iyawera a dundun anneno korwan a dundun ira e gakkurug a tata lamang a dundun: “Iddukannu yo kasittolem a kakunna yo piddukngu si baggim ingkepay.”b 10 Se nu iddukantam ino kasittoletam, awan ingke maral si akwantam sikwara. Nabu, seanya yo midduk si kasittolena e naparulotneno katunungan i Dios.
11 Maawag a akwantam iyaw gumafu se ammuyu a matolay etam si kaawan a tiyempu. Malertu etam kakunna yo tolayera a siggagamya si gafi. Se yo aw na akketabbuttam e aranniyen ingke ammat sinoy sin palungu a nangurug etam sike Jesu Kristo. 12 Na tiyemputam a manolay sito lubag e aranniyen a mappasa kakunna yo appaseno gafi. Na aw a puli i Kristo sito lubag e aranniyen. Maawag a ibbattantam ino maral a aggangwera anna akwantam nad ino kiya-kiyan a makaduffunna sikwatam a kapakwan ino maral kakunna yo sundaluwera a nakapanangga a nakaparan a makipakwa si tiyempu na aw. 13 Manolay etam si fustu a manilla nakauliyen i Kristo sitaw, bakkan a pangwa si nafulotan a paffunsyon anna pakkabuk, makidurug si bakkantam a atawa anna manolay si kinamaral, bakkan a pakipakwa anna pafu si korwan a tolayera. 14 Imbes, tuntulantam nad ino aggangwera i Afu Jesu Kristo takesi maitaneno korwan ira a meyannung etam sikwana. Ammetam nad nonotan nu kasanna mapaanggamman yo sinaliwat a baggitam.