Na Pakaidundunan na Pitufulu-Adwa a Disipuluwera
10
Akkabalinna iyaw, nappili i Afu Jesus si pitufulu adwa a disipulunera. Dinundunnera a mapparit a mapalungu a umang so kada lubbun nu sintaw pay yo anganna. 2 Liyera inang, kunna sikwara, “Gakkurug a oddu a tolayera a nakaparan a mangarasaw so tunturu udde bisang lamang yo manuntu-tunturu so sapitkuwera. Manillera a nalutu a bungera a magani udde bisang lamang yo inang a maggani.a Kunnantu, maddasal anna arangngan diyaw si Afu na aggani a manundun si oddu kepay a tolayerab a manunturu si sapitkuwera. 3 Umang kayu! Dundunan takayu kakunna yo karneruwera so tangnga na simaron a aggayam ira. 4 Amme kayu mangikangkalin si pirak anna pangiyekwanan si oddu a kiya-kiyan anna maski daggana sandalyat ira anna ammeyu tamfutan yo tiyempuyu a makitetabbag so tolayera so dalan.5 Nu maddulot kayu si tata balay a maffundu sinay, palungu a sapitan diyaw, ‘Na piya i Dios e ana sikwayu sitaw a balay!’ 6 Nu ana tolay sitan a balay a manggam si piya, yo piya i Dios e mabattangnga sitan a tolay, udde nu bakkan, yo piyana e mulina sikwam. 7 Magyang kayu sitan a balay makiyad si manaw kayu sitan a tarabbun. Amme kayu makaakka-akkat si balay. Akkanan anna inuman diyaweno iyaddara, kakunna yo gumattarabafu a maawag a mapagan antu maawag a makaarasaw kayu pay si akkanan anna inuman sikwayu a masserbi para sike Dios.
8 “Kada umang kayu si tata lubbun e padulotan dakayuweno tolayera, akkanan diyaw nu nenay a itallangga sikwayu. 9 Pammapiyan diyaweno matakit ira a ana sitan a lubbun e kun diyaw sikwara, ‘Aranniyen a dumatang ino pattangngalan i Dios sikwayu.’ 10 Udde nu tumallung kayu si tata lubbun e ammera kayu padulotan ino tolayera, mallawang kayu so dala-dalan e kun diyaw, 11 ‘Maski yo girafuk na lubbun diyaw a gumafut so takkimi e pappaggammi a mangipaita a metulyat sike Dios ino akakwan diyaw sikwami. Udde dandamman diyaw iyaw, aranniyen a dumatang ino pattangngalan i Dios sikwayu.’ 12 Itunduk sikwayu a nanu Aw na Pannunut sito lubag, mas dokalneno akkastiguna i Dios so tolayera sitan a lubbun ammat so tolayera so lubbun na Sodoma.c ”
Na Tolayera a Ammena Mabboboli
13 Kunna i Jesus, “Madammat ingkeno akkastigu a medemmuna sikwayu a taga-Corazin anna taga-Betsaida gumafu se amme kayu nabboboli! Nu yo oddu a milagru a naangwa sikwayu e naangwa sinoy so maral a tolayera na Tiro anna Sidon, nabayagin nad a nabbarasiyera si langgotse anna nakatuttud so lallang a pakaitan na pabbobolira. 14 Udde so Aw na Pannunut, mas madammatneno akkastiguna i Dios sikwayu ammat so tolayera so Tiro anna Sidon. 15 Ikkayu a taga-Capernaum,
arig diyaw kad nakuy a mapadayawang kayuwengkena si langit?
Ammena! Metappol kayuna so infiyernu.”
16 Anna kunna i Jesus so disipulunera, “Seanya yo maningngag sikwam e maningngag sikwak, anna seanya yo mammay sikwam e mammay sikwak, anna seanya yo mammay sikwak e pammayanna pay yo nanundun sikwak.”
Na Pannuliyeno Pitufulu adwa sike Jesus
17 Ammena nabbayag, mangga-anggam a nantotoliyeno pitufulu adwa a disipuluwera. Kunda, “Afu, maski yo demonyuwera e nangurug sin neyusamiyeno pakandamad a neyaddam sikwami a mappaanaw sikwara.”
18 Kunna i Jesus sikwara, “Naitak i Satanas a siddarat a nadannag a naggabwat si langit a manilla kilat. 19 Maningngag kayu, inindan takayu si pakandama a mappimpin so irawera a magita anna malagamera anna affutan amminan a pakapangwa i Satanas anna awan a mappalowna sikwayu. 20 Maski nu gakkurug iyan, amme kayu mammalamuwang gumafu se nakimorayeno demonyuwera sikwayu udde mas mammalamuwang kayu se nakaturak ino ngan diyaw si langit.”
Nappabala-balat i Jesus sike Amana
21 Sitan keppay a orat, pinannuna i Espiritu i Dios i Jesus si anggam e kunna, “Mabbalatak sikwam, Ama, Afu na langit anna lubag gumafu se ammem nepakaammu iyawera a kiya-kiyan so mangngammuwera anna so nakakalakammuwera udde imbes nepakaammum so tolayera a malan a mangurug kakunna yo bawissang a abbing ira. On, Ama, inangwam iyan se iyaweno nakammu a kaangga-anggam sikwam.”
22 Kapiyena naddasal i Jesus, kunna so tolayera, “Neyaddana i Amak sikwak ino pakapangwa si amminan a kiya-kiyan. I Ama lamang a makaammu sikwak a anaknga anna awan makaammu sike Ama nu bakkan ikkanak a anaknga anna inoyera a mapilik a mangipaammu sike Ama.”
23 Nilangngi i Jesus ino disipulunera e kunna sikwara lamang, “Mapiya sikwayu se maitayuweno mededemmu sitoye. 24 Itunduk sikwayu se oddu yo profetera anna patul ira a natolay siin nabayagin a tiyempu e kinumananda a maiteno naitayu udde ammera naita anna nadingngag ino madingnga-dingngag diyaw.”
Na Pangarig ino Mapiya a Samaritano
25 Antu nattaddag ino tata tolay a maporay si katunungan na Hudyuwera a mamureba sike Jesus e naffuut, “Mestru, nenay maawag a akwangku takesi matolayaknga a bulun i Dios amu-amu?”
26 Kunna i Jesus sikwana, “Nenay a neturak so dundun ira i Dios a neyaddana sike Moises? Nenay yo mabibbidnu sinay?”
27 Tinabbagnga i Jesus a nakkun, “Iddukannu i Afu a Diosnu si amminan a nakammu, si amminan a karalwam, anna si amminan a tuyagngu anna si amminan a poreme anna iddukannuweno kasittolem kakunna yo piddukngu si baggim ingkepay.”f
28 Anna kunna i Jesus sikwana, “Fustu yo netabbagngu, akwannu iyaw e manolekana a bulun i Dios amu-amu.”
29 Udde si anggamma a defensan yo baggina, naffuut sike Jesus, “Yanya yo karebbingku?”
30 Nangarig i Jesus, “Ana tata tolay a naggabwat so Jerusalem anna paumang so Jerico. So dalanna nadafungngeno gumakkokot ira a nallubbung anna nanuntuk sikwana. Inanawanda baggina a gammamatay.
31 “Sitoye, ana tata pari a nattalebad so dalan udde sin naitaneno tolay, nilillikanna e nallakad so tafik a dalan. 32 Antu kunnapay, sin inang ino tata Levita sitan a lugar e naitaneno tolay, nilillikanna pay anna nallakad so tafik a dalan.
33 “Udde sin nattalebad ino tata Samaritano, inaranniyanna baggina, naitaneno tolay e naallakan. 34 Sin inaranniyanna baggina, binubbuwanna si binarayan anna lana ino barya-baryan ino tolay anna binabbattanna. Netakena so aggayamma anna neyangnga so tata paffunduwan e tinaronna sinay. 35 Kadaddaramatanna, nangappa baggina si adwa a dinaryu anna neyaddana so makambalay e kunna, ‘Ikka abbu a makaammu sikwana takesi nanu muliyak pagan takana nu nenay kepay a nagastum.’ ”
36 Kunna i Jesus so mapoporay si katunungan na Hudyuwera, “Si nakammu yanya sikwara a talluweno gakkurug a ana aggidduknga si kassittolenera a pinadiyatan na gumakkokot ira?”
37 Kunna, “Na tolay a nappaita si allak.”
Kunna i Jesus sikwana, “Ingkan anna kunnapay yo akwannu.”
Na Paggannon i Jesus sike Marta anni Maria
38 Dengkera naddoyu-doyug so Jerusalem, nadutung da Jesus anneno disipulunera yo tata tarabbunan e sinay ana bafay a minganan si Marta a nappadulot sikwara so balena. 39 Ana wayina a bafay a minganan si Maria a nattuttud so dunan na takki i Afu anna naningngag nu nenay a ituntu-tunturuna. 40 Udde natalantan i Marta si odduwengke yo mepara-paran antu inaranniyanna i Jesus e naffuut, “Afu, ammem kad ikabeng a inanawannak i wayik a tattatak a mangiparan? Damam a itundu sikwana takesi duffunannak?”