Na Pattallung i Jesus so Jerusalem
11
Sin aranniyen i Jesus anneno disipulunera so Jerusalem, nimemmak ira so lugar na Betfage anna Betania so idagngeno Dangutul na kakayuwan a Olibu. Nepapalunguna i Jesus ino adwa a disipulunera. 2 Kunna sikwara, “Umang kayu so tarabbunan a metufad sikwayu, paddatang diyaw sinay, siddarat a matumpalan diyawneno tata ubbun a asno a nakasiggut a ammena kepay nataka-takayan. Uttaran anna iyang diyaw sitaw. 3 Se nu ana maffuut sikwayu, ‘Saay se utta-uttaran diyaweno ubbun a asno? Kun diyaw, ‘Maawag inay i Afu e siddarat a itolinana.’ ”4 Antu sin nanawera, natumpalandeno tata ubbun a asno a ana so idag na dalan a nakasiggut so lenab na balay. Sin utta-uttarandeno ubbun a asno, 5 kundeno korwan a tolayera a nakataddag sinay, “Nenay akakwan diyaw sitan? Saay se utta-uttaran diyaw iyan a ubbun a asno?”
6 Antu netundura sikwareno sinapit i Jesus e nepabulun ino tolayera sikwara a appanda iyan. 7 Neyangga sike Jesus ino ubbun a asno. Inappinanda si tafál ino addag na ubbun a asno e nattakay i Jesus sitaw. 8 Oddu yo tolayera a nangiyappin si tafáldera so dalan anna nangiwarannak pay yo korwan ira si panga-panga na kayuwera a napannu si dōn a kinattura so umara.
9 Antu inoyera a napalungu anna inoyera a dinumandan sike Jesus e naggira-girawa,
“Hosanna!a
Mapiya i Dios sikwana a dumatang si pakapangwa i Afu!
10 Mapiya i Dios sike aggidiyafuwantam a i David a umang a mattangngal sikwatam!
Hosanna a ana si kaatannangan si langit!”
11 Sin tinumallung i Jesus so lubbun na Jerusalem, inang baggina so lawan na Templu e initana amminan ino ana so unagnga. Udde massillapin, antu inang baggina so Betania bulunneno tafulu adwa a apostolnera.
Na Nakalakammu so Kayu a Igos
12 So tumuntufad a aw, sin naggabwat ira so Betania, nabisinan i Jesus. 13 Nakaita baggina si kayu a igos a napannu si dōn so ammena kurwa aroyu, inaranniyanna a inita tantaro nu ana bunganera. Udde passi dōn ino naita i Jesus gumafu se ammena kepay tiyempuweno igos ira a mamunga si nalutu a bunga.
14 Anna kunna i Jesus so kayu a igos, “Mamefu sitoye, awan a mangnganna so bungam gumafu se ammekanna mamunga!” Nadingngag na disipulunera yo sinapitna.
Pinatamangnga i Jesus ino Gumallakuwera a Ana so Templu
15 Sin dinumatang i Jesus anneno disipulunera so Jerusalem, inang baggina so lawan na Templu. Pinatamangngeno gumallakuwera anneno gumaggatang ira sinay. Binakolluneno lamesera na gumattaliyera si pirak, anneno pattutturan ira na gumallakuwera si guruk ira. 16 Ammena ipabulun inoyera a nangikangkalin si lakurera a mattalebad so lawan na Templu. 17 Tinunturuwanneno tolayera a nakkun, “Neturak so sapit i Dios a kunna, ‘Na balek e maayanna si balay a paddasallan na tolayera.’b Udde inangwayu si pattawan na gumakkokot ira.”c
18 Sin naammuwan ino afu-afu a pariyera anna mapoporay si katunungan ino inangwera i Jesus, pinefunanda a nintufuk si pangakiran a mapapatay i Jesus se mattalawera sikwana gumafu se nalaggat amminan ino tolayera a naningnga-ningngag so tunturunera 19 Anna sin massillapin, nanaw da Jesus anneno disipulunera so Jerusalem.
Na Kalakammu meafu so Nangu a Kayu a Igos
20 Kadaddaramatanna, sin mallaka-lakad ira so dalan, naitareno kayu a igos a nanguwen makiyad so gamutnera. 21 Antu nadandam i Pedro ino sinapitna i Jesus so kayu a igos e kunna sike Jesus, “Mestru, itannu! Nanguwen ino kayu a nemamodnu!”
22 Tinumabbag i Jesus, “Mangurug kayu sike Dios. 23 Gakkurug yo itunduk sikwayu, nu sapitan diyaw sitaw a bakulud, ‘Metulluka anna metappolka so bebay!’ anna amme kayu karen mabbabang anna mangurug kayu a medemmuna inay e makwana pay sikwayu. 24 Nabu itunduk sikwayu, maski sanna yo arangngan diyaw sike Dios si dasal diyaw anna kuruwan diyaw a maarasoyuna e gakkurug ingkena a meyadda sikwayu. 25 Anna nu maddasal kayu, pakoman diyaweno tolayera a nangwa si maral a taddera sikwayu, takesi pakoman pena i Amayu si langit ino liwa-liwat diyaw. 26 Udde nu amme kayu mamakoma, ammena pena pakoman i Amayu si langit ino liwa-liwat diyaw.”
Na Fuut meafu so Pakandama i Jesus
27 Nuliyera imman so Jerusalem. Sin mallaka-lakad i Jesus so lawan na Templu, inang sikwaneno afu-afu a pariyera, mapoporay si katunungan anneno manannakam na Hudyuwera. 28 Anna finuutda baggina, “Sintaw naggabwatanna yo pakandamam a akwan iyawera a kiya-kiyan? Yanya yo nangadda sikwam sitaw a pakandama?”
29 Kunna i Jesus sikwara, “Ana fuutangku sikwayu, nu matabbag diyaw iyaw, itunduknga sikwayu nu sintaw a naggabwatan ino pakandamak. 30 Itunduyu sikwak nu sintaw nangappan i Juan si pakandamana a mabbawtismu? Sike Dios kad onnu si tolayera?”
31 Antu nattataretabbag ira e kunda, “Nu kuntam a naggabwat sike Dios, kunnana sikwatam, ‘Saay se amme kayu nangurug sikwana?’ 32 Anna nenay antu mekuntam? ‘Naggabwat si tolayera?’ Mattalawera so tolayera gumafu se mangurug ira amminan a i Juan e gakkurug a profeta.” 33 Antu tinabbagga i Jesus, “Ammemi ammu nu sintaw a naggabwatanna.”
Kunna pay i Jesus sikwara, “Ammek pay antu itundu sikwayu nu yanya yo nangadda si pakandamak a mangwa sitawera a kiya-kiyan.”