Na Panapparan para so Pannuli i Afu
5
Iddu-iddukangku a wawwayi, sitoye patamu so tiyempu anna nu nainsa amminan iyaw a medemmuna, ammenan a maawag a matturak sikwayu. 2 Se ammuyu ingkepay si mapiya a yo aw i Afu e dumatangnga a amme innanaman kakunna yo gumakkokot si gafi. 3 Nu sapitan ino tolayera, “Ana piya anna awan peligru,” lannat a medemmuweno akkadaral anna ammerana a makatamang. Sitan a tiyempu, siddarat a dumatangnga sikwareno akkadaral kakunna yo aggat ino tata bafay a manak.4 Udde ikkayu a iddu-iddukangku a wawwayi, amme kayu meyannung sito maral a talubaggan a manilla ana si kalammukan. Anna amme kayuna malaggat sitan a aw kakunna yo tiyempu na lannat a paddatang ino gumakkokot. 5 Sapitangku iyaw gumafu se ikkayu amminan a tolayera a mangwa si fustu e manilla aggatolay si baggaw anna meyannung sike Dios. Bakkang kami a tolayera a malliwat anna maggalangwa si kamarallan e manilla aggatolay si kalammukan anna meyannung sito maral a talubaggan. 6 Kunnantu, amme kayu nad a mekunna si korwan ira a manilla matu-maturug a ammera maginna yo pannuli i Jesus udde imbes malertu etam. E gaggaddantam nad yo baggitam ingkepay bakkan a kakunna yo tolayera a nabuk. 7 Se si gafina a maturug ino tolayera anna inoyera a mabuk e nabuk si gafina. 8 Udde gumafu se manilla etam a tolayera a aggatolay si tiyempu na aw, gaggaddantam nad yo baggitam ingkepay. Imurantam nad yo baggitam ingkepay kakunna yo sundalu. Na angngurug anna idduk e manilla pananggatam anneno inanama na akketabbuttam e manilla taddungtam. 9 Se pinilina i Dios a tabbutanna etam megafu sike Afutam a Jesu Kristo, ammena ibubbuweno allangnga sikwatam. 10 Natay i Kristo para sikwatam takesi maski nu siggatolay onnu natay etam nanu mannuli baggina sito lubag e makipanolay etamma sikwana amu-amu. 11 Antu mangangga-anggam anna maddidinnuffun kayu a mattuyag si angngurug kakunna yo akakwan diyaw.
Na Panguddi a Tabarang
12 Wawwayi, arangngammi a ilawayu inoyera a nappakel a afu-afuyuwera sike Afu Jesu Kristo anna manunturu sikwayu patamu si angngurug diyaw. 13 Ipaitayu sikwara amminan a pangilawayu anna idduk diyaw gumafu si taddarera. Manolay kayu nad si piya si siggatatan. 14 Ilelawitmi sikwayu wawwayiyera a palanán diyaweno makayang ira, patuyaggan diyaweno makafuy a ginakammanda, duffunan diyaweno makafuyera anna mappasensiya kayu sikwara amminan. 15 Ammeyu balattan ino nangwa si maral sikwayu udde maumid kayu a mangwa si mapiya si siggatatan anna si amminan. 16 Maumid kayu a mammalamuwang. 17 Maumid kayu a maddasal. 18 Mappabalat kayu si amminan a kiya-kiyan a medemmu sikwayu gumafu se antuweyaw yo uray i Dios para sikwayu si pakisittatayu sike Kristo Jesus. 19 Ammeyu gaggaddan ino Espiritu i Dios. 20 Ammeyu arariyan ino sapi-sapitan ino profetera 21 udde kira-kiran diyaw amminan a nesapit. Tuntulan diyaw nu nenayeno mapiya. 22 Lillikan diyaw amminan a garannud a maral. 23 Idasalmi a i Dios na piya e mangiyaddana sikwayu si masinak a ginanakam anna isinanana kayu si liwat. Idasalmi a yo espirituyu, karalwayu anna baggiyu e maimuranna anna awanna pakaliwatan diyaw makiyad si gumumwang i Afu Jesu Kristo. 24 Na nappili sikwayu e makurug anna akwannana iyaw.
25 Iddu-iddukangku a wawwayi, idasallan dakami. 26 Kumustan diyaw amminan a wawwayitam si nakristiyanuwan a idduk.a 27 Idundungku sikwayu si pakapangwa a neyaddana i Afu Jesus sikwak a mebibbid iyaw a turak si amminan a wawwayiyera si angngurug.
28 Idasalku a ipaitanana i Afu Jesu Kristo yo simpatna sikwayu amminan.