Na Angat a Makapaanggam sike Dios
4
Wawwayi, sitoye nakalakammuyu sikwami nu kasanna a manolay a kaangga-anggam sike Dios, e antu lud iyaweno akakwan diyaw. Ilelawitmi sikwayu si ngan i Afu Jesus a annanot kepay nad a akakwan diyaw iyaw si mapiya. 2 Se ammuyuweno netunturumi sikwayu a naggabwat sike Afu Jesus. 3 Se iyaweno uray i Dios a manolay kayu a awan pakaliwatan a yo kanggamma sapitan lillikan diyaw a mangwa si maral a pakidurug, 4 a kada tata sikwayu e gaggaddanna yo baggina ingkepay anna manolay a awan pakaliwatan anna madayaw, 5 bakkan si makalubag a panggamman na baggi kakunna yo akakwan ino bakkan a Hudyuwera a ammera makaammu sike Dios. 6 Sitaw a kiyan, ammeyu pangawawitan ino kasittoleyu anna ammeyu darogattan baggina si maski sanna a pakaangwan gumafu se kastiguwan i Dios inoyera a mangwa-angwa sitawera kakunna yo sinapitmi anna netaddami sikwayu sinoy kepay. 7 Inayanna etam i Dios a manolay a awan pakaliwatan, bakkan si maral a aggangwa. 8 Kunnantu, seanya yo ammena makimoray sitawera a tunturu e bakkan si tolay a mattulyat nu bakkan sike Dios a mangadda pay si Espirituna sikwayu.9 Sitoye, patamu so aggidduk diyaw so wawwayiyu si angngurug, ammemin maawag a matturak sikwayu se i Dios ingkepay yo nanunturu sikwayu a makkaiddu-idduk kayu. 10 E gakkurug a inidduk diyaw amminan a wawwayiyu a ana so interu a Macedonia. Maski nu kunna sinay, ilelawitmi sikwayu a wawwayiyera si angngurug a mas annanot a makkaiddu-idduk kayu si siggatatan. 11 Kumanan diyaw pay a manolay si masinak anna amme kayu makimete so akakwan ino korwan ira. Mattarabafu kayu si mapiya para so pakkatoleyu kakunna yo nedundummi a akwan diyaw. 12 Takesi nu kunna sinay, ilawara kayuweno ammena mangurug sike Jesu Kristo anna ammeyun maawag a maddepende si korwan a tolay.
Na Pannuli i Afu
13 Wawwayi, kanggammi a maammuwan diyaweno kagakkuruwan meafu so natayeran takesi amme kayu marraddam a kakunna yo korwan ira a awan inanama. 14 Se mangurug etam a i Jesus e natay anna nantotolay, mangurug etam kepay a so pannuli i Jesus, patolayan i Dios ino mangurug ira sike Jesus anna ibulunnera sike Jesus. 15 Antuweyaw yo netunturu i Afu Jesus a sapi-sapitammi sikwayu a ikkanetam a aggatolay kepay makiyad so pannuli i Afu e ammetam mapalungu so natayeran. 16 Sinay a aw, i Afu Jesus ingkepay yo dumassag a maggabwat si langit megindan a megiraweno tata a tun. Madingngagngeno payag ino afu-afu a anghel anneno puni na trumpeta i Dios. Na natayera a mangurug sike Kristo ino palungu a pantotolayan. 17 Akkabalinna, ikkanetam a aggatolay a nabattang e bulunda a metullu so dulam ira tapenu dafungan i Afu so kalawatan anna buluntamma i Afu amu-amu. 18 Antu, bannayan diyaweno siggatatan sikwayu megafu sitaw a sapit ira.