3
Kunnantu, sin amme kamin makaattam, naddesisyon kami a mappabattang so Atenas, 2 anna dinundummi i Timoteo a wayitam anna katarabafuwantam sike Dios a mangibalaggaw si Mapiya a Baga meafu sike Jesu Kristo tapenu mapatuyag anna mapaanggammang kayu maipegafu si angngurug diyaw, 3 Dinundummi baggina takesi awan nad a mesina gumafu sitawera a pallupe-lupet. Ammuyu a yo pallupe-lupet e partena nakam i Dios para sikwatam. 4 Si gakkuruwanna, sin bulummi kayu kepay, netundumi sikwayu sinoy a massufri etam si pallupet, e ammuyu si gakkurug a nakwa. 5 Nabu, sin ammekun makaattam, dinundungku i Timoteo takesi maammuwangkuna nu manantaw yo angngurug diyaw. Maburungak a nakakkap nakayu i Satanas. Nu kunna sitan yo nedemmu, amminan a nappakelammi e awan serbina.6 Sitoye, nakauliyen i Timoteo sikwami. Netunduna sikwamiyeno mapiya a baga meafu so angngurug anna idduk diyaw. Sinapitna kepay sikwami a maumid a dandamman dakami si mapiya anna anappan dakami a maita kunnapay anappammi kayu a maita. 7 Antu gafuna, wawwayi, maski nu oddu yo paddiriyatmi anna passufrimi, nalampawan ino nakammi meafu sikwayu megafu si angngurug diyaw. 8 Se sitoye, nattuyag ino ginanakammi a ibali-balin diyaw a paddattan a mangurug sike Afu. 9 Kasannami kad a mappabalat sike Dios para sikwayu si amminan a anggam a naginnami so allangan i Diosmi gumafu sikwayu. 10 Gafi anna aw a maddasal kamiyengke sike Dios takesi makkakainnita etamma anna duffunammi kayuna nu nenay yo makurang si angngurug diyaw.
11 Sitoye, idasalmi sike Dios a Amatam anna sike Afutam a Jesus a megiya kamina sikwami a muli sikwayu. 12 E idasalmi sike Afu Jesus a duffunannana kayu a madaggan anna mallifiyengke si idduk si siggatatan anna amminan a tolayera kakunna yo iddukmi sikwayu a mallifiyengke. 13 Idasalmi iyaw takesi yo nakam diyaw e mapatuyagnga takesi nu manolay kayu a nesina para sike Dios a Amatam e awan pakaliwatan diyaw so allanganna nanu mannuli i Afu Jesus bulunneno tolenera.