Nadandam i Pablo ino Aggannonna so Tesalonica
2
Wawwayi, ikkayu ingkepay yo makaammu a ammena nasayang ino aggangmi sitan sikwayu. 2 Ammuyu a napadiyatan anna napaatallang kami a namaltratu so Filipos liyemi a dinumatang sitan lubbun diyaw. Maski nu kunna sinay, inindan nakami i Dios si tuyag na nakam a ipakaammuweno Mapiya a Baga meafu sike Jesu Kristo sikwayu maski oddu yo maffuwad sikwami. 3 Na apilami sikwayu e bakkan a pangilloku, maral a gakkad onnu massapit si ammena gakkurug. 4 Imbes, massapi-sapit kami meantu so panggamman i Dios gumafu se netalaknga sikwamiyeno Mapiya a Baga meafu sike Afutam a Jesu Kristo. Ammemi akakwan iyaw tapenu angga-anggamman dakamiyeno tolayera udde i Dios a mamureba si nakammi. 5 Si aggammuyu anni Dios yo testigumi, amme kami inang sikwayu a makilalammu onnu massalasasang kami a kolak diyawera takesi lamang maappamiyeno pirak diyaw! 6 Amme kami mintu-intufuk si dayaw a maggabwat si tolayera, sikwayu onnu si korwan a tolayera, 7 maski nu ana damaramami a ilyawan iyaw sikwayu gumafu se apostoles kami i Kristo. Udde masimpat kami sikwayu sikwami a nigigyan sikwayu kakunna yo ina a mappasusu a manabbud si anakngera. 8 Gumafu se iddukammi kayuwengke, iballemi sikwayu bakkan lamang ino Mapiya a Baga meafu sike Jesu Kristo udde maski yo angatmi ingkepay gumafu se kaawang kayuwengke sikwami. 9 Wawwayi, madandam diyaweno pakel anna diyatmi a mattarabafu. Gafi anna aw kami a mattarabafu takesi amme kami makadammat sikwayu sikwami a mangibalaggaw si Mapiya a Baga meafu sike Afutam a Jesu Kristo. 10 Testigumi kayu anni Dios a awan a maral a gakkadmi, matunung anna awan kamarallan yo akakwammi sikwayu a minangikkurug ira. 11 Ammuyu a tinabbudmi kayu a sittata kakunna yo pattabbud na ama si anakngera, 12 tinabarangammi kayu, inanggammammi kayu anna nakilelawit kami sikwayu a manolay kayu a kaangga-anggam sike Dios a nayag sikwayu so pattangngallanna anna kadayawanna.13 Maumid kami pay a mappabalat sike Dios gumafu sin naarasoyuweno sapit i Dios a nadingngag diyaw sikwami, inarasoyu bakkan a sapit na tolay udde yo gakkurug a sapit i Dios a antu yo nappaangangkakwa so akkatoleyu a minangikkurug ira. 14 Wawwayik ira si angngurug, kakunnayu yo tolayera i Dios so Judea a ana sike Kristo Jesus gumafu se nassufri kayu kakunna yo paddiriyat ino kalubbunan diyawera a inangwa pay na Hudyuwera sikwara. 15 Pinatera i Afu Jesus anneno profetera anna pinatamang dakami. Ammena naanggamman i Dios so akakwanda anna tulya-tulyatandeno tolayera 16 si paffuwadda sikwami a ipakaammuweno sapit i Dios so bakkan a Hudyuwera takesi matabbut ira. Gumafu sitaw, nadagga-daggan ino liwa-liwatda e sitoye dumatang yo tiyempu sikwara a massufri so allang i Dios.
Na Gakkad i Pablo a Maggannon Imman so Tesalonica
17 Wawwayik, para sikwami, sin nesina kami sikwayu si malan a tiyempu, maanap kamiyengke a maita kayu imman. Nesina kami lud sikwayu udde bakkan yo nakammi. 18 Gumafu se kanggammi a maggannon sikwayu—annanot ikkanak a i Pablo, namimpigyak a plinanu a maggannon sikwayu sitan udde maumid a fuwaddan nakami i Satanas. 19 Ikkayu yo inanamami, yo anggammi anneno pammakapiyammia a mepannokalmi so allangan i Afu Jesu Kristo so pannulina. 20 Gakkurug, ikkayu yo kadayawammi anna anggammi!