Na Palungu a Turak i Pablo so
Taga-Tesalonica
1
Ikkami a tallu, da Pablo, Silas anni Timoteo e matturak sikwayu a minangikkurug ira na taga-Tesalonica a meyannung sike Dios Ama anni Afu Jesu Kristo:Idasalmi sike Dios a Amatam anni Afutam a Jesu Kristo a ibali-balinda a massimpat sikwayu anna indan dakayu si piya.
Na Angngurug anna Pangngarigan na Taga-Tesalonica
2 Maumid kami a mappabalat sike Dios para sikwayu amminan anna bangnga-bangngatammi kayu si dasalmiyera. 3 Ibali-balimmi a dandamman so allangan i Dios a Amatam ino taddayuwera a mangipaita si angngurug diyaw, yo maidduk a taddayuwera anna mataddaggan a inanamayu sike Afutam a Jesu Kristo. 4 Wawwayimiyera si angngurug a iddu-iddukan i Dios, ammumi a pinili nakayu i Dios a mattabali a tolenera 5 gumafu se nepakaammumi sikwayuweno Mapiya a Baga meafu sike Jesu Kristo bakkan lamang si sapit udde kunnapay si pakapangwa anna si Espiritu i Dios anna ana siguradu a aggammu a gakkurug inay. Kunnapay ammuyu nu kasanna kami a nakiigyan sikwayu anna iyaw e para si pammakapiyan diyaw ingkepay. 6 Tinuntul dakami anni Afu Jesu Kristo si akkatolemi, se maski si pallupet inarasoyuweno sapit i Dios si anggam megafu si Espiritu i Dios, 7 takesi nattabali kayu a pangngarigan so amminan a minangikkurug ira so Macedonia anna si Acaya. 8 Gumafu sikwayu, yo tunturuwera meafu sike Afu Jesu Kristo e newarak bakkan lamang so Macedonia anna Acaya udde si kada lugar a nepakaammuweno angngurug diyaw sike Dios takesi ammemi maawag a massapit meafu sitaw. 9 Se yo tolayera sinay e nangibaga patamu so paarasoyu sikwami sin ginannommi kayu anna nu kasannayu a pinamemmak a maddaya-dayaw si sasan-dios ira takesi passerbiyan diyaweno aggatolay anna gakkurug a Dios. 10 Anna inindaggan diyaweno anaknga si langit a i Jesus a pinantotolena anna manabbut sikwatam so paggumwang a akkastigu i Dios gumafu si allangnga sikwatam.