Na Palungu a Turak i Pablo so
Taga-Tesalonica
Meafu Sitaw a Libru
Kapiye nanaw da Pablo anneno bulunnera so Filipos inang ira so Tesalonica ino kapital na talubbunan na Macedonia. Nanunturuwera sinay so sinagoga si tallu a Sabadu. Ana pigya a Hudyuwera anna oddu a minangikkurug ira a bakkan a Hudyuwera. Udde yo Hudyuwera a bakkan a minangikkurug ira e ginulureno amminan a lugar gumafu si passilda, antu nafuwersa a nanaw da Pablo. Inang ira so Berea anna inang ira kepay so Atenas. Sin anera sinay, nadingngaggeno baga a yo minangikkurug ira so Tesalonica e nelupet pay, antu dinundunna i Pablo i Timoteo a bulunna sikwana a inang so Corinto. (Seanya yo manggam a mabbibbid sitaw a yayam e mabibbid so Angwa 17:1-15). Sikwana a ana i Pablo so Corinto, dinumatang da Timoteo anni Silas so Macedonia, anna nangibaga i Timoteo patamu si angngurug na taga-Tesalonica. Antu tinurakkanna i Pablo ino taga-Tesalonica takesi yo nonotdera anna angngurugga e mapatuyagnga.
Nappabalat i Pablo sike Dios patamu si angngurug anna idduk na taga-Tesalonica. Nepakaammuna pay sikwara patamu yo pannuli i Afu Jesus anna nenayneno medemmu so natay a minangikkurug ira. Gumafu se ana korwan a tolayera so Tesalonica a nassalasiri patamu so gakkad i Pablo a manunturu sinay, nebarifitneno gakkurug a gakkadda anna taddarera sikwara a nagyan so Tesalonica. Ana pay korwan a dundun ira a neyaddana takesi maammuwandana nu kasanna a manolay a kaangga-anggam sike Dios.