4
Ikkayu a amuwera, taratun diyaw si fustu anna mangwa kayu si mapiya so imbut diyawera. Dandamman diyaw a ana pay Amuyu si langit.Na Pannabarang so Amminan a Minangikkurug Ira
2 Mangikakwa kayu a maddasal. Sikwayu a maddasal, aggalangngad anna mappabalat kayu sike Dios. 3 Idasallan dakami pay takesi indan dakami i Dios si makasta a tiyempu a mebalaggaweno kagakkuruwan meafu sike Kristo a amme nepaammu i Dios sinoy. Na pangibalaggok meafu sitaweno gafu na akkefukukku. 4 Idasallandak takesi mebarifitku si mapiya anna malanda a maintindiyan se antuweyan yo maawag a akwangku.
5 Langngaddan diyaweno aggalangwayu so allangan ino bakkan a minangikkurug ira anna nakaparang kayu si amminan a tiyempu a makiabid sikwara meafu sike Kristo. 6 Nu massapit kayu, maumid nad a massimpat anna mangngammu kayu takesi ammuyu nu kasanna tabban ino kada tata sikwara.
Na Panguddi a Akkidyot
7 Itundunana i Tiquico sikwayu amminan ino bagera meafu sikwak. Baggina yo iddu-iddukammi a wayi si angngurug, makurug a taga-duffun anna kagumasserbik sike Afu. 8 Nedundungku baggina sikwayu para sitaw a gakkad takesi maammuwan diyaweno akkekwami anna angganggammanna yo nakam diyaw. 9 Na bulunna e i Onesimo a makurug anna iddu-iddukantam a wayi a katalubbunan diyaw. Ireno mangipakaammuna sikwayu meafu so mededemmu sitaw.
10 Kumustan nakayu i Aristarco a bulungku a fukuk. I Markus a kapitta i Bernabe e kumustan nakayu pay. Naammuwan diyawin ino pannunturuk ira sikwayu meafu sike Markus a nu gumumwang sitan e arasawan diyaw si mapiya baggina. 11 Kumustan dakayu pay i Jesus a minganan si Justo. Ira pelamang ino tallu a Hudyuwera a bulungku a mangibalaggaw meafu so pattangngalan i Dios anna ireno nappatuyag si nakamku.
12 Kumustan dakayu pay i Epafras a katalubbunan diyaw a gumasserbi i Kristo Jesus. Maumid a idasallan dakayuwengke takesi mattuyag ino angngurug diyaw anna awan a pakkurangan diyaw anna siguradu kayuwengkena so amminan a kanggamman i Dios a akwan diyaw. 13 Taddangku a malappat baggina a mattarabafu para sikwayu anna para so minangikkurug ira si Laodicea anna si Hierapolis. 14 Kumustan dakayu pay i Demas anni Lukas a iddu-iddukantam a gumà uru.
15 Ikumustarak so wawwayiyera si angngurug so Laodicea anna sike Nimfas anneno minangikkurug ira a mammu-ammung so balena. 16 Anna nu nebibbirin iyaw a turak sikwayu, ipabibbid diyaw pay so grupu na minangikkurug ira so Laodicea. Bibbiran diyaw payeno turakku a naggabwat so Laodicea. 17 Sapitan diyaw sike Arkipo a balinanna nad yo aggangwa a netalaknga i Afu Jesus sikwana.
18 Ikkanak iyaw, i Pablo a mattura-turak sitaw a akkidyot. Dandamman diyaw a nakafukukak.
Idasalku a masimpat i Dios sikwayu.