Na Turak i Pablo so
Taga-Filipos
Meafu Sitaw a Libru
Neturak i Pablo iyaw a turak so taga-Filipos so Macedonia a palungu a nangurug sike Kristo Jesus. Nakafukuk i Pablo sin neturaknga iyaw. Naburungan ino nonotna gumafu se yo korwan ira a nanuntu-tunturu so sapit i Dios e tulyatanda baggina. Nassapit ira si maral meafu sikwana. Maburung pay baggina so minangikkurug ira na taga-Filipos gumafu se ana inoyera a nanunturu si sasan-tunturuwera. Udde maski nu kunna sitan, nammalamuwang keppay i Pablo anna nattalak baggina sike Dios gumafu si angngurugnga sike Kristo e damana mabibbid sitaw a turak.
Na gafuna a neturaknga iyaw e tapenu mappabala-balat sikwara gumafu so duffunda sikwana. Tata kepay gafuna e tinabarangnganneno minangikkurug ira na taga-Filipos takesi ammerana mailloku inoyera a manunturu a maawagga a tuntulan ino gagangay na Hudyuwera kakunna yo pakkabanggitda.
Tinunturuwannera pay a mappataibbafera nad ingkepay kakunna yo inangwa i Kristo Jesus ingkepay sin nappataibbafa baggina. Nonotanda penad yo pammakapiyan na bulundera anna bakkan lamang ino baggira ingkepay. Nimannutunannera a natabbut ira megafu so allak i Dios anna megafu lamang so angngurugga sike Kristo. Ammera nad maddepende so katunungan i Moises onnu so gagangera a kunneno tolayera a matuntul nad. Netunduna pay sikwara meafu si piya a iyaddana i Dios so inoyera a maddasal sikwana so passufri na nakam anneno mapiya a pammakapiyan a iyaddana i Dios si amminan a mangurug sike Kristo nanu anerana sikwana si langit.