Na Turak i Pablo so
Taga-Filipos
1
Ikkami iyaw a mattura-turak, i Pablo anni Timoteo a gumasserbiyera i Kristo Jesus.Iyaw a turak e para sikwayu amminan a taga-Filipos a tolayera i Dios a nakisittata sike Kristo Jesus, mesapat pay yo afu-afu na minangikkurug ira anna inoyera a manuffu-nuffun sikwara.
2 Idasalku sike Dios a Amatam anni Afutam a Jesu Kristo a ibali-balinda a massimpat sikwayu anna indan dakayu si piya.
Na Dasal i Pablo so Taga-Filipos
3 Mabbalatak sike Diosku kada madandam takayu. 4 Maumirak a maddasal si anggam kada idasallan takayu amminan, 5 gumafu so pakisittatayu so pangibalaggaw si Mapiya a Baga meafu sike Jesu Kristo mamefu so palungu aw a nangurug kayu makiyad sitoye. 6 Siguraduwak a i Dios a namefu si mapiya a taddera sikwayu e ibali-balinnana makiyad si mabalinna so aw a mannuli i Jesu Kristo. 7 Ammuk a fustuwak a mannonot a kakunna sitaw meafu sikwayu amminan gumafu se iddukan takayuwengke. Ikkayu amminan a nangiballa-ballay a bulungku so simpat i Dios, sinoy kepay sin libreyak a mangidefensa anna mangibalaggaw si Mapiya a Baga meafu sike Jesu Kristo anna maski sitoye a nakafukukak. 8 Se i Dios yo testiguk e maanappak sikwayu amminan si allak i Kristo Jesus. 9 Idasalku a i Dios e duffunannana kayu a gakkurug a makkaiddu-idduk kayuwengke e anana aggammuyu anna pintindi si pidduk diyaw 10 takesi makapili kayuna nu nenay a mapiyengke. Antu malibre kayuna si amminan a maral a akakwan anna awan pakaliwatan so aw a pannuli i Kristo. 11 Si kunna sitaw, yo taddayuwera e matunungnga megafu sike Jesu Kristo para si kadayawan anna pammadayaw i Dios.
Na Mapiya a Kebalinanna yo Akkefukuk i Pablo
12 Wawwayik, kanggammangku a maammuwan diyaw a amminan a nedemmu sikwak e nakaduffun a newarak ino Mapiya a Baga meafu sike Jesu Kristo, 13 se nepaammuwen so amminan a guwardiyera so palasyu anna korwan a tolayera sitaw a yo gafuna akkefukukku e gumafu si asserbik sike Kristo. 14 E yo kaodduwan so wawwayiyera e annanot a nattuyag ino angngurugga sike Afu gumafu so akkefukukku. Bakkan lamang inay, annanot kepay a nattuyag ino nakamda a iballayeno sapit i Dios a awan talaw. 15 Ibalaggaweno korwan i Kristo gumafu si passilda anna pakipakwara sikwak udde akwan ino korwan ira iyaw para si mapiya a gakkad. 16 Ibalaggora meafu sike Kristo gumafu si idduk, se ammura a dinutukannak i Dios a idefenseno Mapiya a Baga meafu sike Afutam a Jesu Kristo. 17 Ibalaggaweno korwan ira meafu sike Kristo gumafu so makabaggi a panggammanda, ammena makurug gumafu se gakkadda a daggan kepay yo paddiriyatku so akkefukukku. 18 Udde awan iyan sikwak. Na kaawan e ibala-balaggora so tolayera meafu sike Kristo, makurug onnu bakkan yo gakkadda. Antu maanggammak a akakwanda iyaw.
Ibali-balingkuna a mammalamuwang, 19 se ammuk a megafu si dasal diyawera anneno duffun ino Espiritu i Jesu Kristo, makalawanaknga so paffukukan. 20 Se kanggammangkuwengke anna innanamangku a ammeknga a meyatatal si maski sanna, udde pattuyaggangkuweno nakamku a massapit meafu sike Kristo takesi madayawanna baggina megafu sito akkatolek, nu matolayak onnu matayak. 21 Para sikwak, matolayak a maddayaw sike Kristo anna maski patay e pammakapiyan. 22 Nu siggatolayak, damak a masserbi si oddu sike Kristo. Udde nenayna yo pilingku? Matolay onnu matay? Ammek ammu. 23 Ammek ammuweno pilingku sito adwa. Kanggammangku a matay anna migyanaknga sike Kristo se tammapiya iyaw para sikwak. 24 Udde maipegafu sikwayu, tammapiya a siggatolayak. 25 Gumafu se naanggammannak sitaw, ammuk a matolayaknga kepay anna bulun diyaw amminan takesi maduffunan takayu a mangibalin a ana anggam si angngurug diyaw sike Afu. 26 Nanu mannuliyak sikwayu, tattullot a mangiballayak si pannokal diyaw sike Kristo Jesus gumafu so inangwana sikwak. 27 Na mas kaawan ingke, kumanan diyaw a manolay meantu so Mapiya a Baga i Kristo. Si kunna sinay, makauliyak sikwayu onnu ammena, siguraduwak kepay a sigigyan kayu si tata a gakkad anna mabbafurulung kayu a duffunan ino korwan ira a mangurug si Mapiya a Baga meafu sike Afutam a Jesu Kristo. 28 Amme kayu mattalaw so inoyera a mattulyat sikwayu se iyaweno mangipruwebana sikwara a madaralnera, udde ikkayu, matabbut kayuna. Antuweyaw yo akakwan i Dios. 29 Masimpat ingke i Dios sikwayu a mangadda si pribilehiyu bakkan lamang a mangurug sike Kristo udde massufri pay gumafu sikwana 30 gumafu se nappakel kayu a pimemmakkan inoyera a nattulyat sikwayu dengkeyu a naita yo napurebangku sinoy e nadingngag diyaw a mapurebangku kepay makiyad sitoye.