Annuntul so Pappataibbafa i Kristo
2
Antu lud, nu ana pangangga-anggam ino akkatolay sike Kristo, ana pakabannayan ino idduk, ana pakisittateno Espiritu i Dios, anna ana pangikallak anna pangikalow, 2 pinaanggammandak ingke si pakkakarunnayu si agginonotan, yo pakkaiddu-idduk diyaw, yo masiggat a pattataratayu, anna manolay kayu si piya si siggatatan. 3 Amme kayu mituk onnu mabbalagasay, udde mappataibbafa anna ibilang diyaweno korwan ira a mas kaawan ammat si baggiyu ingkepay. 4 Ammeyu nad lamang a itan ino pammakapiyan diyaw ingkepay, udde tabburan diyaw penad yo pammakapiyan ino korwan ira. 5 Mannonot kayu nad a kakunna i Kristo Jesus.6 Maski ana sikwaneno akka-Diosna,
ammena ninonot a yo pakkaparefuna sike Dios
e usanna si pammakapiyanna ingkepay.
7 Imbes, pinurayanna amminan.
Metalwaring, nattabali baggina a tolay anna nattabali a kakunna yo tata imbut.
Neyanak baggina a kakunna yo ordinaryu a tolay.
E sin nattabali a tolay i Kristo,
8 nappataibbafa baggina anna nakimoray makiyad si akkapatena, maski si akkapataknga so kurut.
9 Kunnantu, pinadayawanna i Dios baggina si kaatannangan,
anna neyadda sikwaneno ngan
a ana kaatannangan a dayaw anna pakandama ammat si amminan a korwan a ngan ira.
10 Inangwa iyaw i Dios takesi medayawneno ngan i Jesus
si langit, sito lubag anna so dolam na lubag.
11 Anna amminan a tolayera e sapitandana
a i Jesu Kristo e Afu,
takesi i Dios Ama e mapadayawanna.
Na Panuntulan a Anak i Dios
12 Kunnantu, iddu-iddukangku a wawwayik, gumafu se maumid a makimoray kayu sikwak sin bulundak kepay, annanot kayu kepay a makimoray sitoye a awanakun sikwayu. Antu maawag a kumanan diyawengke a mangwa si pakaitabbutan diyaw. Akwan diyaw iyaw a ana pangilawa anna pidduk sike Dios. 13 Se i Dios yo pakegafuwan ino medemmu sikwayu takesi akwan diyawna yo panggammanna anna nu nenay yo makapaanggam sikwana.
14 Akwan diyaw amminan a kiya-kiyan a awan marrekla-reklamu anna mattitinnulyat 15 takesi malibre kayuna si amminan a maral a akakwan anna awan pakaliwatan a anak ira i Dios sikwayu a migigyan so tangngeno maral anna sinaliwat a tolayera. Mabbaggaw kayu nad sikwara a kakunna yo bitun ira a manirwa-nirwat so kalawatan. 16 Ipakaammuyu sikwareno sapit i Dios a mangadda si angat amu-amu takesi ana maipannokalku nanu mannuli i Kristo nu sintaw ipaitayuna a yo inangwak e ammena nasayang anna mapiya yo kebalinanna. 17 Udde mammalamuwangaknga maski nu maawangku yo angatku, mebubbu a manilla likidu a walli sike Dios. Na makurug a panasserbiyu e manilla pay a walli sike Dios. E kanggammangku a iballeyu amminan iyan a anggam. 18 Si kakunna keppay, maanggam anna mammalamuwang kayu penad sikwak.
Da Timoteo anni Epafrodito
19 Innanamangku sike Afu Jesus a medundungkuna siddarat i Timoteo sikwayu takesi maanggammannaknga meafu sikwayu nu maammuwangku sikwaneno akkekwayu. 20 Awan korwan a ammuk a kakunnana a gakkurug a mangikalow sikwayu. 21 Se yo korwan ira nonotanda lamang yo pammakapiyanda ingkepay bakkan yo meafu so panggamman i Jesu Kristo. 22 Ikkayun ino makaammu so pattalak i Timoteo. Nasserbi baggina sikwak a kakunna tata anak a lalaki sike amana a mangibala-balaggaw si Mapiya a Baga meafu sike Jesu Kristo so tolayera. 23 Kunnantu, innanamangku a medundungkuna baggina sikwayu siddarat dengke a ammuk ino medemmuna sikwak. 24 Anna mattalakak sike Afu a makaumangak pena si malan.
25 Ninonotku a pulingku nad sikwayu i Epafrodito a wayik si angngurug, katarabafuwangku a masserbi sike Jesu Kristo anna ka-sundaluwangku sike Dios. Nedundun diyaw baggina sikwak a masserbi nanu kaawangkuweno duffun. 26 Se maanap ingke baggina sikwayu amminan e maburung ingke baggina gumafu se nadingngag diyaw a matakit baggina. 27 Gakkurug a nattakit baggina anna maggi natay. Udde inallakkan baggina i Dios anna bakkan lamang baggina maski kepay ikkanak, takesi ammenan madaggan kepay yo raddamku. 28 Dirangkungke a pulin i Epafrodito gumafu se ammuk a maanggammang kayu a maita imman baggina anna takesi ammenan a madaggan ino raddamku. 29 Arasawan diyaw nad baggina nu kasanna yo pangarasaweno minangikkurug ira so kaminangikkuruggera. Dayawan diyaweno tolayera a kakunnana 30 gumafu se maggi natay baggina si asserbi sike Kristo. Nepustana yo angatna takesi maduffunannak. Iyaw a duffun a ammeyu meyadda sikwak.