Kinamatunung megafu si Angngurug sike Kristo
3
E sitoye, wawwayik, mammalamuwang kayu gumafu so inangwa i Afu para sikwayu. Ammena makatalantan sikwak a matturak si mapparefu a kiya-kiyan sikwayu a neturakku sinoy takesi aroyu kayu si peligru. 2 Mimud kayu so tolayera a manilla atuwera yo agguyuwanda anna mangwa si maral anna massapit pay a maawag kayu nad a mabanggit tapenu matabbut. 3 Ikkanetam ino nangarasaw si gakkurug a appabanggit a maddaya-dayaw sike Dios megafu si Espirituna. Na ipannokaltam e yo angattam sike Kristo Jesus. Ammetam a mattalak si baggitam onnu sanna a akwa-akwantam. 4 Maski nu pakatalakkangkuweno baggik ingkepay, ammek kepay akwan.Nu ana mannonot a ana gafura a mattalak si baggira ingkepay, ammura nad a ana dokal a gafuk a akwa-akwan iyawera. 5 Nabanggitak so ikawalu aw kapiyek a neyanak, naggabwatak so tolayera na Israel anna so tribu i Benjamin. Tataak a gakkurug a Hudyu anna kunnapay yo gagginafangkuwera. Tataak a miyembru na Fariseowera a mangilillin si istriktuwengke a pakimoray si katunungan na Hudyuwera. 6 Dinirangkuwengke a defensan yo katunungan na Hudyuwera a nelupetkuweno minangikkurug ira i Jesu Kristo. Anna awan a matumpalan a pakaliwatan so pakimorek si katunungan na Hudyuwera.
7 Udde inoyera a ibilangku a kaawan sinoy e nebilang a awan serbina sitoye gumafu sike Kristo. 8 Bakkan lamang iyan, ibilangku a awan serbina amminan a kiya-kiyan meyarig si kaawan ingke a maammuwan i Kristo Jesus a Afuk. Gumafu sike Kristo, amminan a kiya-kiyan e awan serbina sikwak, ibilangku inoyera a amak takesi maammuwangkungkena i Kristo 9 anna meyannungak sikwana. Gumafu sike Kristo e matunungak sike Dios, udde yo akketunungku e ammena a naggabwat so pakimorek si katunungan a neyaddana i Dios sike Moises. Naggabwat sike Dios megafu si angngurug sike Kristo tapenu mapatunungak sikwana. 10 Kanggammangku a maammuwan i Kristo anneno pakapangwa a nakapanantotolay sikwana anna makiballay so passufrinera anna matay kakunna yo inangwana, 11 anna pantotolayannaknga kapiyek a natay.
Mebali-balin Makiyad si Uddi
12 Ammek sapitan si naappakun amminan iyawera onnu awan a nakkurangangku, udde ibali-balingku a madutung iyaw gumafu se inangwanak i Kristo Jesus a akwana. 13 Wawwayik, ammek sapitan a nadutungkun iyaw udde iyaweno akwangku – kalyawangku nu nenay yo naangwak sinoy anna kumanangku a akwan nu nenay kanggam i Dios a akwangku so gumumwang a tiyempu. 14 Kuma-kumanangku a mattabali a kakunnengke i Kristo makiyad so uddi na angatku tapenu maarasok ino pammakapiyan a akwak gumafu se inayannak i Dios megafu sike Kristo Jesus a matolay si langit. 15 Ikkanetam amminan a nannakam si angngurug e makkakunna nad a mannonot. E nu tameta yo agginonotan diyaw, ipaintindi i Dios sikwayu nu nenay yo fustu. 16 Na kaawan e makimoray etam nad nu nenay a nepakaammuwen i Dios sikwatam.
17 Wawwayik, mebulun kayu nad so korwan ira si annuntul so pangngarigangkuwera anna imammatan diyaw si mapiya inoyera a manolay meantu so nepaitami sikwayu. 18 Se maumid a netunduk iyaw sikwayu sinoy e iyansasapitku a mattangit a oddu yo mappaita si aggalangwara a gakkurug a ikalussoreno mensahe meafu sike Kristo a matay so kurut. 19 Kastiguwannengkenera i Dios. Na diosda antu yo panggamman na baggira anna ipannokaldeno pakaatatallanda a taddera. Nonotanda lamang meafu so makalubag a kiya-kiyan. 20 Dandamman diyaw a katalubbunan etam na langit. Innanamantam sinayeno tata a Mannabbut a i Afu Jesu Kristo. 21 Angkakwannaneno makafuy a baggitam ira si kakunna yo kakkapallat a baggi a naarasawna sin pinantotolay baggina i Dios. Akwannana iyaw si pakapangwana a matangngalanna pay amminan a kiya-kiyan.