Na Panguddi a Tabarang i Pablo
4
Kunnantu, iddu-iddukangku a wawwayik, iddukan takayu anna anappan takayu, ikkayu yo anggamku anna pammakapiyangkua so tarabafuk. Paddattan diyaw a mangurug sike Afu meantu so netunturuk sikwayu. 2 Makilelawitak sikwayu Evodia anni Sintike a makipiya kayu a mabbulun si siggatatan gumafu se parefu kayu a mangurug sike Afu. 3 Anna arangngangku pay sikwam a matalak a bulungku a duffunannu iyawera adwa a bafabbayera. Se bulungkuwera a nappakel si asserbi a mangibalaggaw si Mapiya a Baga meafu sike Jesu Kristo bulunda i Clemente anneno korwan a katarabafuwangkuwera a yo ngandera e nakaturak so libru na angat.b4 Maumid a mammalamuwang kayu gumafu se ana pakibulun diyaw sike Afu. Sapitangkuna imman, Mammalamuwang kayu! 5 Ipaitayuweno simpat diyaw si amminan a tolayera. Aranniyen ino paddatang i Afu. 6 Amme kayu a maburung si maski sanna. Imbes, arangngan diyaw sike Dios yo amminan a maawag diyaw megafu si dasal a ana appabala-balat. 7 Anna imurannana i Dios ino ginanakam anna ginna-ginnan diyaw gumafu se nakisittata kayu sike Kristo Jesus. Kunna sitan a masinak a agginonotan a iyaddana i Dios e amme maintindiyan ino tolayera.
8 Kauddiyanna, iddu-iddukangku a wawwayik, nu nenay yo gakkurug, madayaw, matunung, awan pakaliwatan, kaangga-anggam, mepangngat a medayaw, mapiyengke anna nu ana yo mapadayawan, antuweyawera yo dandamman diyaw.
9 Ibali-balin diyaw a akakwan ino nakalakammuyu anna naarasoyu sikwak anna nadingngag diyaw anna naitayu sikwak, anneno piya i Dios e anana sikwayu.
Nappabalat i Pablo so Duffun na Taga-Filipos
10 Mammalamuwangak ingke sike Afu! Kapiyena nabayag a tiyempu imman, nadandamdak sin nangadda kayu si duffun sikwak. Gakkurug a dandadammandak udde awan makasta a tiyempuyu a ipaita iyaw. 11 Itunduk iyaw sikwayu ammena gumafu se maawagku a duffun. Nakalakammuk a makuntentu nu nenay ana sikwak. 12 Ammuk nu kasanna yo ginnana yo makkurang, anna ginnana yo massobra-sobra. Si kada akkekwa e nakalakammuk nu kasanna a makuntentu nu bastanteyak si maakkan anna nu mabisinanak, nu wara amminan a maawagku onnu nu maawananak. 13 Damak akwan amminan megafu sikwana a mappatuyag sikwak. 14 Udde maski nu kunna sitan, mabbalatak sikwayu se dinuffunandak so paddiriyatku. 15 Ikkayu a taga-Filipos, madandam diyaw sin palungu a netunduk ino Mapiya a Baga meafu sike Jesu Kristo sinay. Sin nanawak so Macedonia, awan korwan a minangikkurug ira so korwan a luga-lugar a nangadda sikwak si pirak a duffun nu bakkan a ikka lamang. 16 Se maski anaak so Tesalonica, namimpigya a tinubugandak si maawagku. 17 Ammek kanggam a marang si duffun sikwayu udde kanggammangku a ana sikwayuweno pammakapiyan a maggabwat si annuffun. 18 Napagannak si fustu e sobra kepay. Nakuntentuwak ingke sitoye so naarasok sike Epafrodito amminan a netubug diyaw anna manillera pabangug a walli, sakrifisyu a kaangga-anggam sike Dios. 19 Anna iyaddanana i Diosku amminan a maawag diyaw so wara-waranera a ammena matamfut meantu so pakibulun diyaw sike Kristo Jesus. 20 Madayaw sike Dios a Amatam amu-amu. Amen.
Na Panguddi a Akkidyot i Pablo
21 Ikumustarak so amminan a tolayera i Dios a mangurug sike Kristo Jesus anneno kolaktam ira a bulungkuwera sitaw. 22 Amminan a tolayera i Dios e idutunggeno akkidyotda sikwayu metalwaring so amminan a masserbi so balay i Emperador.
23 Idasalku a ipaitanana i Afu Jesu Kristo yo simpatna sikwayu amminan.