Na Abbing ira anneno Gagginafan Ira
6
Ikkayu a abbing ira, makimoray kayu so gagginafan diyaw gumafu si pakisittatayu sike Afu Jesu Kristo se iyaw e fustu. 2 Iyaw yo palungu a dundun a ana tambana: “Dayawan diyaw i ama anni inayu 3 takesi mammapiyaka anna matoleka si asoddag sito lubag.”a 4 Ikkayu a gagginafan ira, amme kayu mangwa si maski sanna a ikaallang ino anak diyawera. Imbes, disiplinan anna tunturuwan diyawera so tunturuwera i Afu Jesus Kristo.Na Imbut ira anna Amuwera
5 Ikkayu a imbut ira, makimoray kayu so amuyuwera sito lubag a ana talaw anna angngilawa. Serbiyan diyawera si gakkurug kakunna yo pakimoreyu sike Kristo. 6 Akwan diyaw iyaw, bakkan a gumafu se ana makaita onnu awan, anna tapenu mapaanggamman ino tolayera udde gumafu se imbut nakayu i Kristo a makurug a dumandan so uray i Dios 7 Mattalaginnay a masserbi sike Afu bakkan si lallakiyera anna bafabbayera. 8 Dandamman diyaw a indanna etam a sittata i Afu Jesus si pammakapiyan so mapiya a inangwatam maski imbut onnu bakkan a imbut etam. 9 Ikkayu a amuwera, mangwa kayu si mapiya so imbut diyawera. Ibbattan diyaw a manantalaw so imbut ira se parefu yo Amuyu si langit anna sikwana awan a pappeduma.
Na Kainteruwan a Armas i Dios
10 Si kauddiyanna, patuyaggan diyaw yo angngurug diyaw sike Afu anna si tuyag na pakapangwana. 11 Kakunna yo tata a sundalu, a usanna yo armasna a makaduffun sikwana a makilaban anna usan diyaw nad kada duffun a iyaddana i Dios tapenu malillikan ingke yo diyablu nu purebanna a mangontra sikwayu. 12 Se yo labantam e bakkan a metulyat so tolayera udde makilaban etam metulyat so maral a espirituwera a manangngal anna ana pakandamara anna pakapangwara sito maral a talubaggan anna langit. 13 Kunnantu, kakunna yo sundalu a usanneno armasna a kaduffunanna a makilaban, usan diyaw pay amminan a neyaddana i Dios sikwayu takesi malillikan diyawneno kapakwera so tiyempu na maral. Anna kapiyena naangwa amminan ammeyuna maaffut. 14 Kunnantu, mapparang kayu a malillikan diyaweno diyablu anna maral a espiritunera. Usan diyaw iyawera a iyaddana i Dios sikwayu kakunna yo usa-usan na sundaluwera. Iyuseno sundalu yo gayakat, anna antu manilla pasiggattan diyaw so abak diyaw tapenu maammuwan ino kagakkuruwan meafu sike Dios. Manolay kayu si matunung tapenu maimuran diyaweno baggiyuwera metulyat so makademonyu a aggalangwera kakunna yo sundaluwera a nangiyekwa si panangga so taggangga tapenu maimurandeno baggirera ingkepay. 15 Mapparang kayu a ibalaggaweno Mapiya a Baga meafu so piya a iyadda i Dios kakunna yo sundaluwera a maumid a nakaparan si pangiyusa si botasdera. 16 Anna medagga sitawera amminan e ana nad angngurug diyaw a mimudna si baggiyuwera ingkepay kakunna yo piggam si panangga a middiyof si manilla gumallayaf a pana a ikanna i Satanas sikwayu. 17 Maddepende kayu so kagakkuruwan na pannabbut i Dios takesi maimuran yo baggiyu ingkepay kakunna yo sundaluwera a nangiyusa si taddung takesi maimuran ira so kapakwara. Usan diyaw yo sapit i Dios a kakunna yo espada na Espirituna. 18 Siggadasal kayu sike Dios si amminan a tiyempu. Maddasal kayu si amminan a garannud na dasal ira anna marang kayu si amminan a maawag diyaw. Malertu kayu anna mattam kayu a maddasal para si amminan a tolayera i Dios. 19 Idasallandak pay takesi nu massapitak, tunturuwannaknga i Dios nu nenay sapitangku takesi mattuyagngeno nakamku a ipakaammuweno Mapiya a Baga a ammena nepakaammu sinoy. 20 Gumafu sito Mapiya a Baga nedundunak anna sitoye e nakafukukak. Idasalandak a mattuyagngeno nakamku a mepakaammu iyaw Mapiya a Baga gumafu se antu iyan yo maawag a itunduk.
Na Panguddi a Akkidyot
21 Takesi maammuwan diyaw amminan a kiyan patamu si akkekwak anna akakwangku, i Tiquico a iddu-iddukantam a wayi anna makurug a gumasserbi i Afu yo mangipakaammu sikwayu. 22 Antu idundungku baggina sikwayu takesi maammuwan diyaweno akkekwami anna mattuyag ino nakam diyaw. 23 Idasalku a i Dios Ama anna i Afu Jesu Kristo e mangaddana si piya anna idduk a ana angngurug si amminan a wawwayiyera sinay. 24 Idasalku a masimpat i Dios sikwayu amminan a midduk sike Afutam a Jesu Kristo anneno iddukda sikwana e awanna a pakiyaranna.