Manolay si Baggaw
5
Kunnantu, gumafu se anaknga kayu i Dios a inidduknga, tuntulan diyaw baggina, 2 anna manolay kayu si idduk kakunna yo aggidduk i Kristo sikwatam anna natay baggina tapenu matabbut etam a kakunna yo mabangug a walli sike Dios.3 Amme kayu nad makidurug si bakkan diyaw a atawa anna korwan a maral a taddera a kunna sitan onnu maagum. Iyawera nad e ammena nad maawag a mabangngat sikwayu gumafu se iyawera e ammena mepangngat so tolayera i Dios. 4 Amme kayu massapit si kaddarakkut, illaw anna bulgar a sapit ira udde imbes mappabalat kayu sike Dios. 5 Se gakkurug a ammuyu a yo tolay a makidurug si bakkanna atawa, onnu mangwa si maral, onnu maagum (iyan e gumaddayaw si sasan-dios) e ammena mesapat so pappatulan i Kristo anni Dios.
6 Ammeyu purayan a illokun dakayuweno tolayera si sapit ira a bakkan a gakkurug gumafu se makaallang ingke i Dios so inoyera a amme makimoray sikwana. 7 Kunnantu, amme kayu makibumbulun sikwara. 8 Sinoy, ammeyu ammuweno kagakkuruwan meafu sike Dios dengke ino anera si kalammukan e ammera ammu yo nakalebut sikwara. Udde sitoye, manilla ana kayu si sirwat gumafu se ammuyuweno kagakkuruwan meafu sike Dios gumafu so pakibulun diyaw sike Afu Jesus. Antu akwan diyaweno akwan ino makaammuwera so kagakkuruwan i Dios. 9 Gumafu se yo kebalinanna yo nabaggawan a nonot e mapiya, kinamatunung anna kagakkuruwan. 10 Pureban diyaw a kalakammun ino makapaanggam sike Dios. 11 Amme kayu makibumbulun so tolayera a ammera ammuweno kagakkuruwan meafu sike Dios. Imbes, ipakaammuyu so korwan ira a yo taddera na tolayera e awan serbina. 12 Se kaatatal kepay a mabangngat meafu so kiya-kiyan a paimad a akakwanda, 13 udde nu melawan diyaweno maral a taddarera, maammuwandana a yo akakwanda e maral, 14 se amminan e maita gumafu si sirwat. Nabu, kunna,
“Ikka a aggaturug, magamyaka!
Manantotoleka so natayera,
e baggawannakana i Kristo.”
15 Mimud kayu nu kasanna kayu manolay. Amme kayu manolay a kakunna yo illawera, udde manolay kayu a kakunna yo mangngammuwera. 16 Usan diyaw si mapiyeno tiyempuyu gumafu se yo tolayera sito tiyempu e oddu yo akakwanda a maral. 17 Antu amme kayu millaw so akakwan diyaw udde intindin diyaw nu nenay yo uray i Afu Jesus. 18 Amme kayu mabuk gumafu se iyan yo paggabwatanna yo annanot ingke a panggamman na baggi udde ipabulun diyaweno Espiritu i Dios a manangngal sikwayu. 19 Makkannanta kayu si salmowera, imnuwera anna kantera a naggabwat sike Espiritu i Dios. Anna megafu sitaw a kantera e dayawan diyaw i Dios si nakam diyaw. 20 Maumid kayu a mappabalat sike Dios a Ama anna si amminan gumafu si pakisittatatam sike Afutam a i Jesu Kristo.
Na Tabarang para si Matawa
21 Sibubukkat kayu a akwan ino kanggamman ino korwan a tolayera ammat so kanggamman diyaw se iyan yo pemunuwan si pangilawa sike Kristo. 22 Ikkayu a naatawan a bafabbayera, sibubukkat kayu a akwan yo kanggamman ino atattawayu ammat si kanggamman diyaw kakunna a sibubukkat kayu a akwan yo kanggamman i Afu a akwan diyaw. 23 Se yo lalaki a naatawan e antu yo ulu na atawana, se ana pakandamana sikwana kakunna i Kristo e antu yo ulu na minangikkurug ira anna baggineno Mannabbut. 24 Kakunna yo minangikkurug ira a sibubukkat a akwan yo kanggamman i Kristo a akwanda, yo naatawan a bafabbayera e akwanda amminan a kanggamman ino atattawara.
25 Ikkayu a lallakiyera, iddukan diyaweno atattawayu kakunna yo pidduk i Kristo so minangikkurug ira anna natay para sikwara 26 takesi isinanera a akwa i Dios megafu si akkalinisna sikwara megafu si akkebaggua si danum anna si sapitna. 27 Inangwana iyaw i Kristo tapenu metallang ino minangikkurug ira sikwana ingkepay a kakkapallat a tolayera a awan pakaliwatan onnu liwa-liwat onnu korwan a maral a taddera udde imbes malibre irana si amminan a maral a aggalangwa anna awan pakaliwatan si allanganna. 28 Si kakunna keppay, iddukan nad ino lallakiyera yo atattawara kakunna yo piddukda si baggira ingkepay. Na lalaki a midduk si atawana e iddukanneno baggina ingkepay. 29 Se awan malussaw si baggina ingkepay, udde pakkananna anna tabburanna kakunna yo akakwan i Kristo so minangikkurug ira, 30 gumafu se ikkanetam ino nebilang a baggina. 31 Se neturak so sapit i Dios a makkun, “Antuweyaw yo gafuna a anawannaneno lalaki yo gagginafannera e mebulun so atawana anneno adwa e mattatenna si baggi.”b 32 Iyaw e dokal a misteryu udde sapitangku iyaw meafu so pakisittata sike Kristo anneno amminan a minangikkurug ira. 33 Kada lalaki e midduk nad si atawana a bafay kakunna yo pidduknga si baggina ingkepay anna ilawa nad yo naatawan a bafay yo atawana.