Na Tabarang para si Matawera
3
Si kakunna keppay, ikkayu pay a bafabbayera a aggatawan e ilawayu nad yo pakandameno atattawayu takesi maski nu yo korwan sikwara e ammena makimoray so sapit i Dios e maangga-anggammanna a mangurug gumafu so mapiya a aggalangwayu. Ammeyu maawag a massapit si maski sanna. 2 Mangurugngera sike Kristo nu maitara a ilawayuwera anna awan pakaliwatan na katotoleyu. 3 Bakkan ino panlawan a baggiyu yo pakastan diyaw kakunna yo pattalapid si būk diyaw anna pangiyusa si bulawan ira a alahas anna manginginera a sinnun. 4 Imbes, yo kastayu e maita nad so katotoleyu a ammena makkupat. Mattaibbafa anna masinak a aggalangwa e ana sikwayu a antu yo kaawan ingke si aggita i Dios.5 Kunna sitaw yo pappakasta na bafabbayera a makimoray sike Dios siin nabayagin a tiyempu. Nappatangngal ira so atattawara. 6 Kakunna pay i Sara siin, nakimoray baggina anna inayanna i atawana a i Abraham a afu. Mebilang kayu so anak ira i Sara nu matunung yo aggangwayuwera anna nu awan ikataloyu.
7 Si kakunna keppay, ikkayu a lallakiyera a aggatawan, intindin diyawera anna makibulun si mapiya so atattawayu gumafu se mas makafuyera ammat sikwayu anna kakunnayu e erensiyandana pay yo angat a awan pakiyaranna a neyaddana i Dios sikwayu. Akwan diyaw iyaw si kunna sinay e awan makafuwad so dasal diyaw.
Paddiriyat Gumafu si Pangwa si Matunung
8 Na kainteruwan ino sinapitku e mattarata kayu nad a manolay si piya, maddidinnuffun anna makkaiddu-idduk a manilla mawwawayi, mappaita si simpat si korwan anna mattaibbafa kayu si siggatatan. 9 Ammeyu balattan si maral ino nangwa si maral sikwayu. Ammeyu insultun inoyera a minsu-insultu sikwayu. Imbes, arangngan diyaw sike Dios a akwannana a mapiya yo akkatolera gumafu se iyan yo nakapiliyan diyaw a akwan tapenu makaerensiya kayu si mapiya a akkatolay sikwana. 10 Meantu so neturak a sapit i Dios,
“Inoyera a manggam si maanggam a akkatolay
anna makapureba si mapiya a mededemmu si kinaaw,
ammera nad mabid si maral onnu mangilloku si korwan.
11 Lillikanda nad a mangwa si maral anna akwandeno mapiya.
anna panggammanda nad yo piya anna maumid a kumananda a manolay si piya a akkatolay a bulun ino korwan ira.
12 Na matera i Afu e nakalangngad so inoyera a mangwa si matunung,
anna dingngagganna yo dasaldera.
Udde tulyatanna inoyera a mangwa si maral.”
13 Sitoye, yanya kad pay yo mangwana sikwayu si maral nu pureban diyawengke a mangwa si mapiya? 14 Udde maski nu massufri kayu si pangwa si matunung, akwannana i Dios a mapiya yo akkatoleyu. Amme kayu mattalaw si tolayera a mappadiyat sikwayu anna amme kayu maburung meafu nu nenay a akwanda sikwayu. 15 Imbes, maawag a dayawan diyaw i Kristo si nakam diyaw a Afuyu. Siggaparang kayu nad a tumabbag nu wara maffuut sikwayu meantu so inanama a ana sikwayu gumafu sike Kristo. 16 Udde mattaibbafa anna minangilawa kayu nad a tumabbag sikwara. Itan diyaw a awan maral a akwan diyaw tapenu inoyera a massapit si maral meafu sikwayu e maatatallan gumafu so mapiya a pakibulun diyaw sike Kristo. 17 Se mas mapiya a massufri a mangwa si mapiya nu iyan e uray i Dios ammat a massufri a mangwa si maral.
18 Se nassufri anna natay pay i Kristo maipegafu si amminan a sinaliwat. Matunung baggina anna natay para sikwatam tapenu medalan etam sike Dios. Pinapatera baggina udde pinantotoleneno Espiritu i Dios baggina.
19 Nanuffun pay sikwaneno Espiritu i Dios a inang mangibalaggaw so lugar a nagyanan ino karalwa na natayera. 20 Siin nabayagin a tiyempu, so tiyempu a mangwa-angwa i Noah si arka, amme nakimorayeno maral a espirituwera sike Dios sin mapasensiyengke baggina a minda-indag sikwara a mangurug sikwana. Walu lamang a tolayera yo nesalak so linang. 21 Na danum e kaitan na bawtismu. Na bawtismu e ammena arin ino dakkut na baggi udde mepaiteno angngurugtam sike Afutam a Dios si malinis a konsensiya a matabbut etam si pammakomeno liwa-liwattam megafu so panantotolay i Jesu Kristo. 22 Inang baggina si langit a makipanangngal sike Dios so diwananna. Mappatul baggina sinay so anghel ira anna so mapakapangwera si langit.