Na Bawu a Angat
4
Kunnantu, gumafu se nassufri i Kristo si baggi, patuyaggan diyaw penad yo baggiyu ingkepay kakunna yo agginonotanna, se seanya yo nassufri si baggi e nimemmak a malliwat. 2 Nabu, maawag a matolay kayu so nabuna kepay a angat diyaw sito lubag, bakkanin ino panggamman na tolayera udde meantu so uray i Dios. 3 Fustuwen ino tiyempuwera a sinayang diyaw si pangwayu so panggamman na tolayera a ammena mangurug sike Dios. Natolay kayu si kinamaral, maral a panggamman na baggi, maumid a pakkabuk, nafulotan a pammalamuwang anna pakkabuk anna paddayaw si sasan-dios ira a kurwengke ammena makapaanggam sike Dios.4 Anna inoyera a amme mangurug sikwayu, makkabbawera gumafu se amme kayun mebulun sikwara so taddarera a kurwengke maral a awanin a gaggadda anna atal so akakwanda. Nabu mabid ira si maral meafu sikwayu. 5 Udde dandamman diyaw a tallangngandana i Dios a nakaparan a mannunut so aggatolayera anna so natayera. 6 Se antuweyaw yo gafuna a yo Mapiya a Baga meafu sike Kristo e nebalaggaw maski so natayera takesi maski nu ira e nanunut ino korwan ira so akkatolera sito lubag, matolayera a bulun i Dios amu-amu.
7 Aranniyen ino tamfutna amminan a kiya-kiyan sito lubag. Nabu maawag a mannonot kayu si mapiya anna gaggaddan diyaweno baggiyu ingkepay takesi makadasal kayu si mapiya. 8 Na kaawan ingke si amminan e makkaiddu-idduk kayuwengke, se nu ana idduk mapakoman diyaweno oddu a liwa-liwat. 9 Mangadda kayu si maakkan anna lugar a patturuwan inoyera a umang so baleyu anna amme kayu marreklamu.
10 Kakunna yo mapiya a katalak ira si mapiya a kiya-kiyan a neyaddana i Afu Dios sikwayu, maawag a usan diyaw nu nenay a neyaddana sikwayu a massisinnerbi. 11 Seanya yo ana pannakadamana a manunturu, itunturuna nad yo sapit i Afu Dios. Yanya yo masserbi, akwanna nad amminan si tuyagnga a neyaddana i Dios sikwana. Antu mapadayawanna i Dios si amminan megafu sike Jesu Kristo. Meyannung sikwaneno kadayawan anneno pakapangwa amu-amu. Amen.
Na Passufri na Kristiyanu
12 Iddu-iddukangku a wawwayik, amme kayu malaggat so malowengke a passufriyera a ginna-ginnan diyaw. Pamureba iyawera si angngurug diyaw. Ammeyu nonotan a ana tame-tameta a mededemmu sikwayu. 13 Udde mammalamuwang kayu gumafu se mangiballa-ballay kayu so passufriyera i Kristo antu maanggam kayu pena nanu mepaammuweno kadayawanna. 14 Nu massapit si maral yo tolayera meafu sikwayu gumafu se nangurug kayu sike Kristo, dayawan diyaw i Dios a massufri kayu se yo Espiritu i Afu Dios a madayaw e migyan sikwayu. 15 Udde awan nad sikwayu a massufri gumafu se ikkayu e gumappatay, gumakkokot, kriminal anna mangwa si pappaparakwan ino tolayera. 16 Udde nu massufri kayu gumafu se Kristiyanu kayu, ammeyu iyaw a ikaatal. Imbes, dayawan diyaw i Dios gumafu se meyannung kayu sike Kristo.
17 Se dinumatangngin ino tiyempu a mamefu i Dios a mannunut e pefunanna sikwatam a tolenera. Nenay medemmuna so inoyera a ammera makimoray so Mapiya a Baga meafu sike Jesu Kristo? 18 Kunna so neturak a sapit i Dios,
“Nu madiyat a matabbut ino matunung a tolayera,
nenay antu pattabaliyanneno ammena makimoray so dundun ira i Dios anneno sinaliwat ira?”a
19 Kunnantu, nu kanggam i Dios a massufri kayu, maawag a italak diyaw yo angat diyaw sikwana. Baggineno namaratu sikwayu anna talakkan diyaw nad baggina. Antu ibali-balin diyaw a mangwa si mapiya.