Pattabbud so Minangikkurug Ira i Dios
5
Ana yo kanggammangku a sapitan sikwayu a afu-afuwera so grupuyu. Tataak pay a afu-afu na minangikkurug ira, naitak ino passufri i Kristo e makaballayaknga so kadayawan i Kristo sin nepaammu baggina so interu a talubaggan. 2 Antuweyaw yo ilelawitku sikwayu. Tabburan diyaw nad yo tolayera i Dios a netalaknga sikwayu kakunna yo gumappastuwera a imurandeno karnerura. Akwan diyaw iyaw ammena gumafu se nafuwersa kayu a akwan iyaw udde imbes akwan diyaw iyaw a sibubukkat. Antu yo kanggamman i Dios. Akwan diyaw iyaw gumafu se maanap kayu a masserbi, ammena gumafu se kanggam diyaw a pirak. 3 Ammeyu tangngallan inoyera a netalaknga i Dios sikwayu. Udde mapiya kayu a pangngarigan sikwara. 4 E nanu muli i Kristo manilla afu a gumappastu na minangikkurug ira, makaarasaw kayuna si pammakapiyana a mabbayagnga amu-amu.5 Anna ikkayu a sulteruwera anna sulterera, ana kanggammangku a sapitan sikwayu. Maningngag kayu nad so pakandama na manannakam. Mattaibbafa kayu nad a makibumbulun si siggatatan. Se kunna so neturak a sapit i Dios,
“Kontranna i Dios ino mappeyatannang ira,
udde ipaitananeno simpatna so mattaibbafera”b
6 Kunnantu, mattaibbafa kayu nad so pakapangwa i Dios se dumatangngeno tiyempu a mapadayawang kayuna. 7 Italak diyaw sike Dios amminan a pakaburungan diyaw se tabburan nakayu.
8 Gaggaddan diyaweno baggiyu ingkepay anna malertu kayu. I diyablu ino kapakwayu kakunna yo uniyeno leon a manondoyug a mintufuk si akkananna. 9 Ammayan diyaw a dandanan baggina e mataddaggan diyaweno angngurug diyaw se ammuyu si bakkan a ikkayu pelamang yo massufri si kunna sitawera maski yo wawwayiyu si angngurug si interu a talubaggan. 10 E kapiyeyu a nassufri si ammena kurwa nabayag, i Dios a antu yo paggabwatan ino amminan a simpat a nayag sikwayu tapenu maballayang kayu so kadayawanna a awan pakiyaranna gumafu so pakibulun diyaw sike Kristo e itolinaneno interu a akkatoleyu, duffunannana kayu si amminan a akkekwayu, patuyaggannaneno angngurug diyaw anna maumid a pàattammannana kayu. 11 Ana sikwaneno pakapangwa a mattangngal amu-amu. Amen.
Na Panguddi a Akkidyot i Pedro
12 I Silas ino nanurak sitaw a turak para sikwak. Ibilangku a makurug a wayitam si angngurug. Neturakku iyaw tapenu patuyaggangkuweno angngurug diyaw anna sapitangku sikwayu a antuweyaw yo gakkurug a simpat i Dios. Ibali-balin diyaw a paddattan a kuruwan iyaw a mensahe.
13 Kidyotan dakayu yo minangikkurug ira so Babilonya. Ira anna ikkayu yo pinili i Dios. I Markus a ibilangku a anakku si angngurug e idutungnga pay yo akkidyotna sikwayu. 14 Makkaiddu-idduk kayu a mangipaita si mawwawayi kayu amminan.
Piya sikwayu amminan a nakisittata sike Kristo.