Na Aggatolay a Batu anneno Napili a Tolayera
2
Kunnantu, talekkuran diyaw amminan a maral a aggangwa, amminan a pangilloku, passalasasan, passil anna amminan a panandaral si kasittolay. 2 Kakunna yo bawu a neyanak a kalubit ira a mabisin si fulut a gattak, panggamman diyaw nad yo gakkurug a tunturu a sapit i Dios takesi sitaw e mannakam kayuna makiyad si amminan a netambana meantu so akketabbut diyaw e maparulotna 3 gumafu se napureban diyaweno simpat i Afu Dios.4 Umaranni kayu sike Jesus, baggineno paggabwatan na angat a mekunna so aggatolay a batu e baggineno fundasyon na balay. Inammayan ino tolayera baggina udde pinili i Dios baggina a kaawan si aggitana. 5 Kakunna kayu payeno aggatolay a batu e parte kayu so balena a yo Espiritu i Dios ino nangitaddag tapenu mattabali kayu a kakunna yo pariyera a nadutukan para sike Dios. Mangiwalli kayu sike Dios a kaangga-anggam sikwana megafu sike Jesu Kristo. 6 Kunna so neturak a sapit i Dios,
“Itan diyaw, iyekwa-ekwak so Zion ino tata batu a fundasyon
a pinili anna kaawan,
anna seanya yo mangurug sikwana e ammenana meyatatal.”a
7 Kunnantu, kaawan baggina sikwayu a minangikkurug ira. Udde so inoyera a ammena mangurug, nu nenay yo kunna so neturak a sapit i Dios e naparulotin.
“‘Na batu a inammayan ino gumappataddag ira si balay
antu yo nattabali si gakkurug a fundasyon na balay.”b
8 Anna neturak pay,
“Na batu a kesaraddulan na tolayera,
anneno dokal a batu a keduffuwanda.”c
Meduffuwera gumafu se ammera makimoray so sapit i Dios anna antuweyaw yo sinapit i Dios a medemmu sikwara.
9 Udde bakkang kayu a kunna sinay gumafu se ikkayu yo pinili a gaka i Dios, pari nakayu i Dios a Patul, tata talubaggan a nesina para sike Dios, tolay nakayu i Dios a mangibala-balaggaw si kakkapallat ira a inangwana. Baggineno nallibre sikwatam sin ana etam kepay si kalammukan antu yo maral a gagangetam a akkatolay anna ana etamun sitoye so makasta a sirwatna.
10 Siin, bakkang kayu a tolayera i Dios,
udde sitoye tolenera kayun,
siin, amme kayu nakaarasaw si allak,
udde sitoye nakaarasaw kayun si allak.d
Manolay a Gumasserbiyera i Dios
11 Iddu-iddukangku a wawwayik, makilelawitak sikwayu a ipping ira anna ikkayu a migigyan sito talubaggan a malan lamang, talekkuran diyaweno maral a panggamman na baggiyu ingkepay a metulyat so pakipanoleyu sike Afu Dios. 12 Ipaitayu so inoyera a ammena mangurug sike Dios a manolay kayu si mapiya a taddera se maski nu akusan dakayu a nangwa si maral, maitaraneno mapiya a taddayuwera e dayawandana i Dios so Aw na Pannunut.
13 Maipegafu sike Afu Kristo, ilawayu yo pakandameno amminan a ana pakapangwa so lubbun, nu sike Emperador a antu yo kaatannangan a gumattangngal, 14 onnu so gubernador ira a dinundunna a makkastigu so tolayera a mangwa si maral anna mapadayawan inoyera a mangwa si matunung. 15 Kanggam i Dios a megafu si fustu a akkatoleyu e mapaimemmak diyaweno awan serbira a sapi-sapitan na illawera. 16 Bilang gumasserbiyera i Dios, manolay kayu a kakunna yo libre a tolayera, udde ammeyu usan yo akkelibreyu a gafuna a mangwa si maral. 17 Ilawayu amminan a tolayera anna iddukan diyaweno wawwayiyu si angngurug sike Kristo. Manolay kayu a ana pangilawa sike Dios anna ana paddayaw so Emperador.
Tuntulan ino Paddiriyat i Kristo
18 Ikkayu a imbut ira, ilawayu yo pakandameno afu-afuyuwera bakkan lamang so inoyera a masimpat anna masinak udde maski so inoyera pay a marakkat. 19 Se nu maattamman diyaweno diyat na passufriyu maski amme kayu nangwa si maral, maanggamman i Dios sikwayu. 20 Nu maattamman diyaweno akkastiguyu gumafu so maral a inangwayu, awan gafuna a dayawannana kayu i Dios. Udde nu maattamman diyaweno paddiriyat diyaw gumafu se mangwa kayu si matunung, maanggam i Dios sikwayu. 21 Na pàattam si diyat e parte na payag i Dios sikwayu gumafu se sin mattam i Kristo para sikwayu, inindan dakayu si pangngarigan a maawag a tuntulan.
22 “Ammena nalliwat
anna ammena nassissiri.”
23 Sin ininsultura baggina, ammenera tinoliyan a insultun. Nassufri baggina, udde awan a tinantalona. Imbes, netalaknga yo baggina sike Dios a mannunut si fustu. 24 Sin natay i Jesus so kurut, inattammanna a sibabaggi yo akkastigu para so liwa-liwattam takesi ammetamun malliwat anna manolay etam si matunung meantu so uray i Dios. Pinammapiya nakayun megafu si biyadnera. 25 Gumafu se ikkayu e kakunna yo karneruwera a nawawan udde sitoye nantotoli kayun takesi dumandan so Gumappastu anna Gumattabbud na karalwayuwera.