Na Palungu a Turak i
Pedro
1
Ikkanak i Pedro a apostol i Jesu Kristo.Antuweyaw yo turakku sikwayu a pinilina i Dios a tolayera a nassiwarak so interu a talubbunan na Ponto, Galacia, Capadocia, Asia, anna Bitinia. 2 Pinilina anna nanonotna kayu i Dios Ama siin nabayagin a tiyempu anna neyaparte kayu para sikwana megafu so Espirituna takesi makimoray kayuna sike Jesu Kristo anna takesi mapakomanneno liwa-liwat diyaw megafu si dāna.
Idasalku a tattullot a masimpatna i Dios sikwayu anna pammapiyannanengke yo akkatoleyu.
Na Inanamami megafu so Akketabbutmi
3 Dayawantam i Dios anna Ama i Afutam a Jesu Kristo. Gumafu so dokal a allaknga, inindanna etam si bawu a akkatolay a napannu si inanama megafu so panantotolay i Jesu Kristo. 4 Sitoye, maerensiyatammeno pammakapiyan ira a maggabwat sike Dios a mabbayagnga amu-amu, awan pakadakkutanna anna ammena makkupat anna maimfunan si langit para sikwatam.
5 Anna megafu si angngurug diyaw, imuran nakayu i Dios si pakapangwana makiyad si maarasoyu iyaw a pannabbut a mepakaammuna si amminan a tolayera so uddi na aw. 6 Gumafu sitaw, mammalamuwang kayu maski nu massufri kayu si naddadaruma a pamureba si ibbafa a tiyempu. 7 Mepaitana iyawera a pamureba a yo angngurug diyaw e gakkurug. Maski yo bulawan a damana madaral e mapureban so afuy anna malunag makiyad si mattabali a puru. Kunnapay, yo angngurug diyaw e mas kaawan ammat si bulawan anna mapureban pena megafu si diyat takesi mepakaammuna nu yo talak diyaw sike Dios e gakkurug. Gumafu sitaw, mapadayawang kayuwengkena nanu mepaammu i Jesu Kristo.
8 Maski nu ammeyu naita i Jesu Kristo, inidduk diyaw baggina anna maski ammeyu maita baggina sitoye, mangurug kayu sikwana anna mammalamuwang kayuwengke si anggam a ammeyu kurwa mebangngat si sapit ira, 9 se ara-arasawan diyaweno kebalinan na angngurug diyaw antu yo akketabbut na karalwayuwera.
10 Kinalakammu si mapiya yo profetera anna pinurebanda a intindin meafu sitaw a pannabbut. Nelabbunda meafu so simpat i Dios para sikwayu. 11 I Espiritu i Kristo e ana so profetera. Nàimbestigera meafu so netunduna sikwara meafu nu kasanna a massufri i Kristo anneno kadayawan a dumatang akkabalinna inoyera a passufriyera. Antu, pinurebanda a intufukan si fustu nu yanya i Kristo anna nainsana iyaw a medemmu.
12 Nepakaammuna i Dios so profetera a yo passerbira sikwana e bakkan a para sikwara ingkepay udde para sikwayu. Anna sitoye iyaw a Mapiya a Baga, inoyera a nanunturu si pakapangweno Espiritu i Dios a nedundun a naggabwat si langit e nepakaammu sikwayu. Maski yo anghel ira, kanggamdengke a maammuwan meafu sitawera a kiya-kiyan.
Na Akwan nad yo Minangikkurug Ira
13 Iparan diyaw antu yo nonot diyaw a masserbi. Disiplinan diyaweno baggiyu ingkepay anna iyekwayu amminan ino inanamayu a maarasoyuweno simpat a iyaddanana i Jesu Kristo sikwayu nanu mepaammu baggina. 14 Gumafu se makimoray kayu a anak ira i Afu Dios, ammeyu akwan ino maral a akakwan diyaw sinoy sin ammeyu kepay ammuweno kagakkuruwan meafu sike Afu Dios. 15 Imbes, kakunna i Dios a nayag sikwayu e awan liwatna, amme kayu penad malliwat si amminan a akwan diyaw, 16 se kunna i Dios so neturaknga a sapit, “Amme kayu nad malliwat se awan liwatku.”
17 Nu maddasal kayu sike Dios anna ayan diyaw baggina si Ama a mannunut si amminan a tolayera a awan faboranna meantu so naangweno sittata sikwara, antu mappaita kayu si dokal a pangilawa para sike Dios sikwayu a migyan sito lubag a kakunna yo ipping ira. 18 Ammuyu a tinubbut nakayu i Dios so awan serbina a akkatoleyu a nedawawa sikwayuweno aggidiyafuwan diyawera. Anneno pannubbutna e bakkan a kakunna yo pirak onnu bulawan a damana a madaral 19 udde megafu so mabalor a dā i Kristo. Kakunnana yo ubbun a karneru a awan pakkuranganna onnu dakkutna. 20 Pinilina i Dios baggina a mannubbut diyaw liyena naparatu yo talubaggan anna nepaammu sito uddi a awera maipegafu sikwayu. 21 Megafu sike Kristo nattalak kayu sike Dios. Pinantotolena i Kristo anna inindanna baggina si dayaw takesi yo angngurug anna inanamayu e ana sike Dios.
22 Sitoye a napakoman ino liwa-liwat diyaw gumafu so pakimoreyu so kagakkuruwan anna ana yo gakkurug a pidduk diyaw so wawwayiyu, antu ibali-balin diyaw a makkaiddu-idduk kayuwengke si aggifutuwan diyaw. 23 Neyanak kayu imman si bawu a angat. Iyaw a bawu angat e ammena naggabwat si sanna a matay. Naggabwat iyaw si sanna a ammena matay. Neyanak kayu imman megafu si sapit na aggatolay anna ammena mangangkakwa a Dios. 24 Se kunna so neturak a sapit i Dios,
“Amminan a tolayera e kakunna yo kaddat a matena,
anna amminan a kadayawan a ana so tolayera e ammenana mabbayag amu-amu,
kakunna yo lappawera a mattalofu so kaddat e ammena mabbayag.
Manguweno kaddat ira, anna matayeno lappawera,
25 udde yo sapit i Dios e mabbayag amu-amu.”
Iyan a sapit e antu yo Mapiya a Baga meafu sike Jesu Kristo a nepakaammu sikwayu.