Na Akkelibre na Minangikkurug Ira
5
Nelibrena etam i Kristo takesi gakkurug nad a libre etam. Kunnantu, gakkurug a defensan diyaweno pangilibre i Kristo sikwayu, anna ammeyu ipabulun ino korwan ira a pulin dakayu a manolay kakunna yo imbut ira a mangilillin a makimoray kayu si katunungan.2 Maningngag kayu, ikkanak i Pablo a mangitundu sikwayu a nu ipabulun diyaw yo baggiyu ingkepay a mabanggit gumafu se nonotan diyaw a maawag a akwan iyaw takesi mebilang kayu a matunung si aggita i Dios antu ammeyu ikabeng ino akkapatay i Kristo para sikwayu. 3 Mamitta imman, palanángku amminan seanya yo mappabanggit, maawag nad antu a pakimorayanneno amminan a katunungan a neyaddana i Dios sike Moises. 4 Nu kumanan diyaw a mappatunung si aggita i Dios megafu si pakimoreyu si katunungan, nesinayu yo baggiyu ingkepay sike Kristo anna inammayan diyaweno simpat i Dios.
5 Dengke sikwami, yo Espiritu i Dios e siniguraduna sikwami a ibilangnga kamina i Dios a awan nakaliwatammi sikwami a mindag sitaw a inanama megafu si angngurugmi sike Kristo. 6 So nakisittaten sike Kristo Jesus, ammenan kaawan nu yo tata tolay e nabanggit onnu ammena. Na kaawan e yo angngurugtam a mepaita si aggidduktam sike Dios anna si korwan a tolayera.
7 Mapiyen nad yo akakwan diyaw. Yanya yo maffuwad sikwayu si pakimoreyu si kagakkuruwan? 8 Inoyera a mangangga-anggam sikwayu e bakkan a naggabwat sike Dios a nappili sikwayu. 9 Dandamman diyaw a yo bisang a sapit e makailloku si oddu a tolayera, manilla bisang a labadura a makaalsa si namasa a arina. 10 Gumafu si pakisittatatam sike Afu Jesus mattalakak a ammeyuna mannonot si korwan ammat so netunduk sikwayu. Mattalakak pay a i Dios e baggineno mangastiguna so seanya yo makkungkur sikwayu.
11 Wawwayik ira si angngurug, nu gakkurug a mangibalaggawak kepay a maawag yo pabbanggit, saay kepay se melupe-lupetak makiyad sitoye? Nu gakkurug inay, ammeran nad a iyallang ino pangibalaggok meafu so akkapatay i Kristo so kurut. 12 Kanggamku a inoyera a maggulu sikwayu e ammerana lamang a nabanggit udde makafun ira nad kepay.
13 Wawwayik ira si angngurug, pinili nakayu i Dios takesi ammeyuna mappaimbut si katunungan ira i Moises. Udde ammeyu usan ino akkelibreyu a pakegafuwan a mangwa si maral a panggamman na baggiyuwera. Udde megafu si idduk, massisinnerbi kayu. 14 Na kainteruwan na katunungan e gakkurug a tata lamang a dundun: “Iddukannuweno kasittolem kakunna yo aggiddukngu si baggim ingkepay.”a 15 Makiyad sin maddidinnambal anna mappipinnalow kayu megafu si kiya-kiyan a sapitan diyaw, mimud kayu gumafu se awan pabbabang a maddidinnaral kayuna.
Manolay si Pakapangwa na Espiritu i Dios
16 Antu itunduk sikwayu, manolay kayu a megiya kayuna megafu si Espiritu i Dios anna ammeyu akwan ino maral a panggamman na baggiyuwera. 17 Se nu nenay yo panggamman na baggi e metulyat so panggamman ino Espiritu i Dios, anneno panggamman ino Espiritu i Dios e metulyat so maral a panggamman na baggi. Maumid a mappaparakwa iyawera adwa antu ammeyu makwaneno kanggam diyaw a akwan. 18 Udde nu yo Espiritu i Dios e maggiya sikwayu, ammeyu antu maawag a makimoray si amminan a katunungan ira a neyaddana i Dios sike Moises tapenu mebilang a matunung si aggita i Dios. 19 Na maral a kiya-kiyan a akakwan na sinaliwat a baggi e maita si mapiya: makidurug si bakkanna atawa, mangwa si kaatatallan na baggi, mangwa si naddadaruma a kaatatal a kiya-kiyan meafu si bafay anna lalaki, 20 paddayaw si sasan-dios, pattamay, pakkalussaw si korwan ira, maggulu, pafu, allang, pappaparakwa, pattitinnulyat, pakkakaratway, 21 passil, pakkabuk, nafulotan a paffunsyon anna mangwa si korwan a kiya-kiyan a kunna sitawera. Palanán takayu sitoye kakunna si pappalángku sikwayu sinoy. Inoyera a mangwa si kunna sitawera a kiya-kiyan e ammerana maappeno mapiya a kiya-kiyan a plinanu i Dios para si anakngera.
Na Kebalinanneno Paggiya na Espiritu i Dios
22 Udde yo Espiritu i Dios e ipaangwana sikwatam iyawera a kiya-kiyan: Iddukantam ino korwan ira. Mangga-anggam etam. Maimammak etam. Mapasensiya etam. Masimpat etam. Mapiya etam. Matalakkan etam ino korwan ira. 23 Masinak etam. Magaggaddantam yo aggalangwatam. Awan a katunungan a massapit a ammera maawag a mannonot anna mangweno tolayera si kunna sitawera a pakaangwan. 24 Anna ikkanetam a meyannung sike Kristo Jesus e nimemmak a makimoray si sinaliwat a kinatoletam anna nimemmak etam a mangwa si amminan a maral a kiya-kiyan a panggammantam a akwan, manilla nepataktam ira so kurut! 25 Nu manolay etam si Espiritu i Dios, megiya etam nad si Espiritu i Dios. 26 Ammetam nad mappakkaw. Ammetam nad indan si kaawan ingkeno baggitam ingkepay ammat si korwan ira. Ammetam nad a mappipinnassil.