Galacia 4

Antuweyaw yo kanggamku a sapitan: sikwana a abbing kepay a taga-erensiya, awan nedumanna so imbut ira maski nu akwaneno amminan a pakkukwera, 2 se metalak kepay baggina so tolayera a manabbud sikwana anna manangngal so pakkukwanera makiyad si dumatang ino tiyempu a iyaddana i amana iyaw. 3 Anna kakunna keppay iyan sikwatam liyena ginumumwang i Kristo. Manilla etam abbing ira, tuntulantam ino gagangayera anna pangurug ira na tolayera patamu so ammena maita a ana pakandamara sito talubaggan. Ginaggaddanda etam kakunna yo paggaggad ino amuwera si imbutdera. 4 Udde sin dinumatang ino fustu a tiyempu, dinundunna i Dios ino Anaknga a neyanak na tata bafay so Hudyuwera a nakimoray si katunungan a neyaddana i Dios sike Moises, 5 tapenu matubbut inoyera a nanolay si katunungan, takesi mebilang etam nad a anak ira i Dios. 6 Anna gumafu se anaknga kayu i Dios, dinundun i Dios ino Espiritu na Anaknga si nakamtam anna si kunna sinay e makaayag etam sike Dios si, “Ama, Amak!” 7 Antu bakkang kayun a imbut udde anak, anna gumafu se ikkayu e anak, inangwana kayu pay i Dios a taga-erensiyana.

Na Pangikalow i Pablo so Taga-Galacia Ira

8 Sin ammeyu kepay ammu-ammu i Dios, imbut kayu na sasan-dios ira. 9 Udde sitoye a ammu-ammuyun i Dios, onnu tammapiya a sapitan, sitoye a ammu-ammu nakayun i Dios, saay se muli-uli kayu so tunturuwera a tinalekkuran diyaw a amme makatabbut anna awan a pammakapiyan a meyaddana? Saay kad se kanggam diyaw imman a mappaimbut sitawera? 10 Paanggamman diyaw i Dios megafu si pangipaimammat si kaawan a awera, dakkag ira, tiyempuwera anna dawun ira. 11 Maburungak a tantaro yo paddiriyatku a manunturu sikwayu e awan serbina.

12 Wawwayik ira si angngurug, makilelawitak sikwayu a manolay a kakunnak se mekunnaak pay sikwayu a bakkan a Hudyuwera a libre si katunungan i Moises. Awan maral a inangwayu metulyat sikwak. 13 Ammuyu a gumafu si takitku e palunguk a nebalaggaweno Mapiya a Baga sikwayu. 14 Maski nu yo ginnangku e makatentasyon sikwayu a mangarari onnu mammay sikwak, ammeyu inangwa. Imbes, inarasorak a kakunna yo anghel i Dios onnu kakunna yo panangarasoyu sike Jesu Kristo. 15 Ope mangkeno anggam a nepaginnayu sikwak sinoy? Taddangku a nu damana e kulotan diyaw nad ino matayu ingkepay anna iyaddayuwera sikwak. 16 Kapakwarakun kad gumafu se massapitak si kagakkuruwan sikwayu?

17 Ana tolayera a mangikalow sikwayu udde yo gakkadda e ammena mapiya. Kanggammanda lamang a iyaroyurak sikwayu takesi ira lamang yo ikaloyu anna tuntulan diyaw. 18 Mapiya a mangikalow si siggatatan nu yo gakkad diyaw e maumid a mapiya anna bakkan lamang nu katallanggak. 19 Ikkayu a ibilangku a anakkuwera, nadidiyatak imman gumafu sikwayu manilla ina a manak. Ibali-balingku iyaw a paddiriyat makiyad si kakunnayuna yo gagangay i Kristo. 20 Kanggamku nad a anaak sikwayu sitoye takesi angkakwangkuna yo aggabirangku se maburungak meafu sikwayu.

Na Keyamparigan i Hagar anni Sara

21 Sapitan diyaw sikwak, ikkayu a manggam a makimoray si katunungan a neyaddana i Dios sike Moises, ammuyu kad nu nenay kanggamma sapitan ino katunungan i Moises? 22 Se neturak so sapit i Dios a ana adwa lallakiyera a anak i Abraham. Na tata e anaknga sike Hagar a imbutna, anneno tata e anaknga sike Sara a gakkurug a atawana. 23 Na anaknga so imbut e neyanak meantu si planu na tolay, uddeno anaknga so gakkurug a atawana e neyanak gumafu si tamba i Dios. 24 Damatam a usan iyawera a adwa bafabbayera a keyamparigantam. Na adwa a bafabbayera e mangibaggi si adwa a katurakkan ira. Na palungu a katurakkan e antu yo katunungan a neyaddana i Dios sike Moises so bakulud a Sinai a nebaggi i Hagar anneno anakngera a nattabali si imbut. 25 I Hagar e mangibaggi so bakulud a Sinai si Arabia anna mekunna si Jerusalem a ana si pakkaimbut, bulunneno kalubbunannera. 26 Udde yo gakkurug a atawana a i Sara e mangibaggi si bawu a Jerusalem a ana si langit anna mekunna baggina si ina a bakkan a imbut a baggineno ina sikwatam a minangikkurug ira. 27 Se neturak si sapit i Dios a makkun,

“Mammalamuwangka, ikka a lupat a bafay a ammena makaanak.

Igirawam si anggam, ammem kepay napureban yo low na panak.

Se odduwengke yo anakngera yo bafay a inanawan na atawana,

ammat so bafay a migigyan sike atawana.”

28 Wawwayik ira si angngurug, anaknga kayu i Dios gumafu si tambana, kakunna i Isaac a neyanak meantu si tamba i Dios. 29 Uddeno korwan a anak i Abraham a i Ismael a neyanak gumafu si planu na tolay e nelupetneno korwan a anak i Abraham a i Isaac a neyanak megafu si pakapangwa i Espiritu i Dios. Kunnapay sitoye, so inoyera a makimoray si katunungan e pakadiyatanda etam. 30 Udde kunna so neturak a sapit i Dios, “Patamangannuweno masina a imbut ira, se yo anak na imbut e ammenana makiballay si erensiya so anak na bakkan a imbut.” 31 Kunnantu, wawwayik ira si angngurug, bakkan etam a anak na imbut udde anak etam ino bakkan a imbut.