Katunungan onnu Angngurug
3
Illaw kayu a taga-Galacia! Yanya yo nangilloku sikwayu? Mabaggaw a nebarifitin sikwayu nu kasanna natay i Jesu Kristo so kurut! 2 Ana tata lamang a kanggamku a maammuwan sikwayu: Naarasoyu kad yo Espiritu i Dios megafu si pakimoray si katunungan onnu mangurug si Mapiya a Baga meafu sike Jesu Kristo a nadingngag diyaw? 3 Illaw kayuwengke! Pinefunan diyaweno Kristiyanu a akkatoleyu megafu si pakimoreyu si Espiritu i Dios, anna sitoye kanggam diyaw kad a ibali-balin ino angngurug diyaw makiyad so uddina megafu si tuyag diyaw ingkepay? 4 Oddu yo napureban diyaw a kiya-kiyan. Amminan kad inoyera a pamureba e awan a serbina? Awan pabbabangku a yo paddiriyat diyaw e awan a serbina. 5 Kunnantu, neyaddana kad i Dios sikwayuweno Espirituna anna nangwa si milagruwera gumafu se nakimoray kayu si katunungan a neyaddana sike Moises onnu gumafu se mangurug kayu si Mapiya a Baga meafu sike Jesus a nadingngag diyaw?6 Na neturak a sapit i Dios e kakunna keppay a nesapit meafu sike Abraham, “Kinurugnga i Abraham i Dios anna nebilang i Dios baggina a matunung si aggitana.”a 7 Antu, maintindiyan diyaw nad a inoyera a mangurug sike Dios e ira yo nebilang a gakera i Abraham. 8 Kunnapay, sin nabayagin a tiyempu, kunna i Dios megafu so neturak a sapitna a ibilangngeno bakkan a Hudyuwera a matunung nu mangurug ira sikwana. Sinapit i Dios iyaw a Mapiya a Baga sike Abraham liye a nedemmu e kunna i Dios, “Megafu sikwam, pammapiyangkuneno akkatolay na amminan a bakkan a Hudyuwera si amminan a luga-lugar.”b 9 Kunnantu, amminan a mangurug sike Dios e pammapiyanneno akkatolera kakunna i Abraham a nangurug.
10 Gumafu se amminan a mannonot a mebilang ira a matunung si aggita i Dios megafu si pakimoray si katunungan e nemamod. Se yo neturak a sapit i Dios e makkun, “Seanya yo amme mangibali-balin a makimoray si amminan a dundun ira a neturak so sapit i Dios e nemamod.”c 11 Gakkurug a awan a tolay a matunung si aggita i Dios megafu si pakimorena si katunungan gumafu se kunna so neturak a sapit i Dios, “Na tolay a ibilang i Dios a matunung gumafu si angngurugnga e matolena a bulun i Dios amu-amu.”d 12 Udde yo katunungan e awan pakaammuwanna si angngurug se kunna so neturak a sapit i Dios, “Na tolay a makimoray so amminan a sapitan ino katunungan e matolena megafu sitawera.”e 13 Tinubbutna etam i Kristo si akkastigu so ammetam pakimoray si amminan a katunungan. Sin nebassin baggina so kurut, nemamod baggina maipegafu sikwatam gumafu si maral a aggangwatam. Se yo neturak a sapit i Dios e makkun, “Kada tolay a nebassin si kayu e nemamod.”f 14 Inangwana iyaw i Kristo takesi mesapat ino bakkan a Hudyuwera so mapiya a tamba i Dios sike Abraham, anna takesi maarasotam ino Espiritu i Dios a netambana megafu so angngurugtam sikwana.
Na Tamba sike Abraham
15 Wawwayik ira si angngurug, indan takayu si pangngarigan si kinaaw a akkatolay: Mannonot kayu meafu si katurakkan a akwan na tata tolay si korwan ira. Kapiye a napirman na adwa a tolay iyan a katurakkan, awan a makapaimemmak onnu makapanagga si maski sanna anna awan a makapamammay sitaw. 16 Neyaddana i Dios ino tambera sike Abraham anneno gakana. Ammena sinapit so neturak a sapit i Dios a “Anna so gakanera,” kanggamma sapitan e oddu a tolayera. Udde kunna, “Anna si gakam,” a yo kanggamma sapitan e awan a korwan nu bakkan i Kristo. 17 Antuweyaw yo kanggamku a sapitan. Palungu a nangwa si katurakkan i Dios sike Abraham. Antu, yo katunungan a neyaddana i Dios sike Moises akkabalinna appat a tatut anna tallufulu a rawun e ammena maari iyan a katurakkan sike Abraham. 18 Na tamba i Dios si pannabbut e bakkan a pammakapiyan para si pakimoray si katunungan, udde gumafu si tamba i Dios sike Abraham megafu si gakana a i Jesus.
Na Gakkad na Katunungan
19 Nenay antu yo gakkad na katunungan? Neyaddana i Dios iyaw takesi maammuwan na tolayera a sinaliwat ira gumafu se ammera pakimorayan ino katunungan. Sigigyan ino katunungan makiyad si dumatang ino gaka i Abraham a nakaiyaddan iyaw a tamba. Neyaddana i Dios ino katunungan megafu so anghel ira anna neyaddara sike Moises a taga-panangnga si tolayera anna sike Dios. 20 Na taga-panangnga e makaduffun nu adwa yo mangwa si katurakkan. Udde i Dios ingkepay yo nangwa e awan a taga-panangnga sin neyaddaneno tamba sike Abraham.
21 Kanggamma kad a sapitan a yo katunungan e metulyat so netamba i Dios? Ammena dama! Nu yo katunungan e damana mangadda sikwatam si bawu a akkatolay, mattabali etam si matunung si aggita i Dios megafu si pakimoretam si katunungan. 22 Udde kunna so neturak a sapit i Dios a amminan a tolayera e sinaliwat, antu maarasotam ino tamba i Dios a akkelibre si akkastigu na liwat megafu si angngurug sike Jesu Kristo.
23 Liye a dinumatang ino tiyempu a mangurug ino tolayera sike Kristo, nekunna etam so fukuk ira a nafuwersa a makimoray si katunungan makiyad si mepaammuweno angngurug sike Kristo. 24 Kunnantu, yo katunungan e manilla tolay a mangita sikwatam makiyad si gumumwang i Kristo takesi mapatunung etam megafu si angngurugtam sikwana. 25 Mangurug etamun sike Kristo sitoye, bakkan ino katunungan a maggiya sikwatam. 26 Gumafu si angngurug diyaw sike Kristo Jesus, anaknga kayu amminan i Dios. 27 Se nabawtismuwang kayu amminan anna nakisittata sike Kristo anna nanolay kayu a kakunnana. 28 Awanin a nedumanna yo Hudyu anna bakkan a Hudyu, yo imbut anna bakkan a imbut, lalaki anna bafay, se tattata kayun amminan sike Kristo Jesus. 29 E nu meyannung kayu sike Kristo, nebilang kayu so gakera i Abraham anna taga-erensiya so tamba i Dios sikwana.