I Pablo anneno Korwan a Apostol Ira
2
Nappasa si tafulu appat a dawun, inangngak imman so Jerusalem anna bulungku i Bernabe anna nebulungku pay i Titus. 2 Nuliyak gumafu se nepaammu sikwak i Dios a maawag a umangak sinay. Nakiinnitaak a ikkanak pelamang so matakkilalan a afu-afuwera na assimban, anna nebarifitku sikwareno Mapiya a Baga a nebalaggok so bakkan a Hudyuwera. Inangwak iyaw gumafu se ammek kanggam a maawanan si serbiyeno inangwak anna akakwangku kepay. 3 Udde maski i Titus a bulungku e ammera nelillin a mappabanggit maski Griyego baggina. 4 Udde ana yo sasan-minangikkurug ira a nakibulun a mespiya so akkelibretam megafu si pakisittatatam sike Kristo Jesus, takesi fuwersanda kamina a makimoray si katunungan ira i Moises. 5 Ammemi inumannung so kanggammanda maski si bisang a tiyempu se kanggammi a ibali-balin diyaw a kuruwan ino kagakkuruwan na Mapiya a Baga. 6 Anna inoyera a matakkilala a afu-afuwera, awan a medaggara so tunturuk ira, (ammena kaawan sikwak nu seanyera gumafu se parefu yo pattaratuna i Dios si tolayera). 7 Imbes, natakkilalandak a pinilinak i Dios takesi mangibalaggawak si Mapiya a Baga so bakkan a Hudyuwera, kakunna i Pedro a pinili pay a mangibalaggaw si Mapiya a baga so Hudyuwera. 8 I Dios ino nangadda sike Pedro si pakandama a tata apostol para so Hudyuwera anna baggina keppayeno nangadda sikwak si pakandama a apostol para so bakkan a Hudyuwera. 9 Anna sin natakkilalan da Santiago, Pedro anni Juan a nebilang a kaawan a afu-afuwera a masimpat i Dios sikwak si pangiyaddana sitaw a kaawan a aggangwa, inarasora kami anni Bernabe a bulunda si passerbi sike Jesu Kristo. Inumannung kami a tunturuwammmiyeno bakkan a Hudyuwera anna baggira so Hudyuwera. 10 Tata lamang ino arangnganda sikwami a ibali-balimmi a dandamman a maduffunan ino madidiyat ira so Jerusalem e gakkurug pay a ibali-balingku iyaw a akakwan.Pinassapitanna i Pablo i Pedro
11 Sin inang i Pedro so Antioka, pinassapitangku baggina gumafu se yo inangwana e ammena fustu, 12 se liye a dinumatang ino Hudyuwera a dinundun i Santiago, nakiakkan baggina so bakkan a Hudyuwera. Udde sin dinumatang ira, inumaroyu bagginan so bakkan a Hudyuwera anna ammenan nakiakkan sikwara gumafu si talona so damana sapitan ino Hudyuwera a mangilillin a mappabanggit ino bakkan a Hudyuwera. 13 Anna nebulun ino korwan a Hudyuwera a ana si Antioka e nakibulun sikwana si passalasasanna antu maski i Bernabe e nakibulun pay sikwara si passalasasanda. 14 Udde sin naitak a yo katotolera e amme inumannung si kagakkuruwan meafu si Mapiya a Baga, sinapitku sike Pedro so allanganda amminan, “Maski nu Hudyuka, manoleka a kakunna yo bakkan a Hudyuwera anna bakkan a tata a Hudyu. Kasannam kad a ilillin ino bakkan a Hudyuwera a manolay kakunna yo Hudyuwera.”
Natabbut ino Hudyuwera anna Bakkan a Hudyuwera si Angngurug
15 Neyanak kami a Hudyu anna bakkan a sinaliwat a Hudyuwera. 16 Kunnapay, ammumi a yo tata tolay e matunung si aggita i Dios bakkan si mapiya a aggalangwana udde gumafu si angngurug sike Jesu Kristo. Anna nangurug kami sike Kristo Jesus antu napatunung kami si aggita i Dios megafu si angngurugmi sike Kristo bakkan si pakimoray si katunungan. Se yo tolay e ammena napatunung si aggita i Dios gumafu si pakimorena si katunungan. 17 Nanonot ino korwan a Hudyuwera a nalliwat kami gumafu se mattalak kami sike Kristo tapenu mapatunung kami si aggita i Dios imbes si makimoray si katunungan. Kanggamma kad sapitan a palliwatan nakami i Kristo gumafu se ammemin a pakimorayan amminan ino katunungan ira na Hudyuwera? Ammena ay! 18 Se nu kuruwangku nad imman a arinna i Dios ino liwatkuwera gumafu si pakimorek si katunungan ira a namitta a tinalekkurangku, mepaita a sinaliwatak. 19 Se megafu si katunungan, nakalakammuk a bakkan si pakimorek si katunungan a nebilangak a matunung si aggita i Dios takesi sitoye manolayak a bulun i Dios. Manilla a nepatakak so kurut a bulun i Kristo. 20 Kunnantu, manilla ammekun a matolay, udde i Jesu Kristo ino siggatolay sikwak. Sikwak a matolay, manolayak megafu si angngurug sike Anak i Dios a nidduk sikwak anna natay baggina para sikwak. 21 Ammek sapitan a yo pattabbut i Dios sikwak megafu si simpatna e awan serbina. Se nu yo tolayera e mapatunungngera si aggita i Dios megafu si pakimoray si katunungan, yo akkapatay antu i Kristo e awan serbina.