Na Turak i Pablo so
Taga-Galacia
Na Akkidyot i Pablo
1
Ikkanak iyaw, i Pablo a matturak sikwayu a tata apostol i Jesu Kristo anna bakkan a nedundun ino tolayera onnuweno a ana pakandamara. Udde nadutukanak anna nedundun i Jesu Kristo anni Dios Ama a nantotolay sike Jesus.2 Amminan a kafamilya i Dios a ana sitaw a bulungku e makkidyot so amminan a grupu na minangikkurug ira sinay so Galacia.
3 Idasalku sike Dios a Amatam anni Afutam a Jesu Kristo a ibali-balinda a massimpat sikwayu anna indan dakayu si piya. 4 Natay i Kristo gumafu si liwa-liwattam takesi malibre etam sitaw a maral a talubaggan meantu so uray i Dios a Amatam 5 Madayaw sike Dios amu-amu. Amen.
Ana Tata Lamang a Mapiya a Baga
6 Nakkabbawak nu saay se malang kayu a nattalekkud sike Dios a nappili sikwayu a tolenera megafu si simpat i Kristo anna dinumandang kayu si tameta a mapiya a baga. 7 Bakkan a ana korwan a Mapiya a Baga udde ana korwan a tolayera a makkungkur sikwayu anna taliyandeno Mapiya a Baga meafu sike Kristo. 8 Arangngangku sike Dios a kastiguwanna seanya yo mangibalaggaw sikwayu a neduma so mapiya a baga a nebalaggomi sikwayu, maski nu ikkami a massapit onnu tata anghel a maggabwat si langit. 9 Sinapitmin iyaw sikwayu sinoy anna iyansasapitku a nu ana mangibalaggaw sikwayu a neduma so mapiya a baga a naarasoyu sikwami, kastiguwannana i Dios baggina amu-amu.
10 Ammeyu nonotan a sapitangku iyaw takesi dayawannak i Dios onnu kumanangku a mapaanggamman ino tolayera. Nu mapaanggammangku kepayeno tolayera, bakkanak a gumasserbi i Kristo.
Dinutukan i Dios i Pablo a Tata Apostol
11 Wawwayik ira si angngurug, kanggamku a maammuwan diyaw a yo Mapiya a Baga a nebalaggok e bakkan a naggabwat si tolayera. 12 Ammek inarasaw iyaw si tolayera anna awan a tolay a nangitunturu sikwak, udde i Jesu Kristo ingkepay yo nangipakaammu sikwak.
13 Awan pabbabang a nadingngag diyaw meafu si akkatolek so paddandangku so relihiyon na Hudyu. Ilupe-lupetkuwengkeno tolayera i Dios anna kinumanangku a darallan ira. 14 Anna meafu si pakimorek si relihiyon na Hudyuwera, mas oddu yo naangwak ammat so kadawunangkuwera, gumafu se mangikakwaak ingke so gagangayera na aggidiyafuwammiyera. 15 Udde si simpat i Dios, pinilinak anna dinutukannak liyek kepay a neyanak anna inayannak takesi masserbiyak sikwana. 16 Anna sin ipaammu sikwak ino Anaknga takesi mebalaggok baggina so bakkan a Hudyuwera, ammek narang si tabarang maski yanya a tolay. 17 Ammek pay inang so Jerusalem takesi makiinnita so palungu a apostol ira ammat sikwak udde siddarat a inangngak so Arabia, anna akkabalinna e nuliyak so Damascus.
18 Nappasa si tallu rawun, inangngak so Jerusalem takesi magannongku i Pedroa. Nakiigyanak sikwana si tafulu lima aw, 19 udde awan naitak a korwan a apostol nu bakkan i Santiago a wayi i Afutam a Jesu Kristo. 20 Gakkurug amminan ino sapi-sapitangku sitaw a turak, anna ammuna i Dios a ammek massissiri. 21 Antu inangngak so rehiyon na Syria anna Cilicia, 22 anna ammerak kepay kurwa ammu-ammuweno grupu na minangikkurug ira sike Kristo so Judea. 23 Nadingngagga lamang a nesapit, “Na dati a mangilupe-lupet sikwatam e sitoye mangibala-balaggawin meafu si angngurug sike Jesus a namitta e kinumananna a darallan.” 24 Anna dinayora i Dios gumafu sikwak.