Na Pattatarata na Minangikkurug Ira
4
Kunnantu, ikkanak a fukuk gumafu se masserbiyak sike Afu Jesus e makigumallakak sikwayu a manolay kayu si fustu se antu iyan yo pappilina i Dios sikwayu. 2 Si amminan a akwan diyaw, mattaibbafa anna matuluk kayu. Mappasensiya kayu, màiinnattam kayu gumafu si idduk. 3 Akwan diyaw amminan a damaramayu a ibali-balin a mattatarata si piya a inangweno Espiritu i Dios sikwayu. 4 Ana tata a baggi anna tata a Espiritu anna pinili nakayu i Dios a ana tata a inanama. 5 Tattateno Afutam, tattateno angngurugtam, anna tattateno bawtismutam. 6 Tattateno Diostam a Ama na amminan a tolayera. Baggineno manangngal si amminan anna mangwa megafu sikwatam amminan anna yo Espirituna e sigigyan sikwatam amminan.7 Udde kada tata sikwatam e naindan si naddadaruma a pannakadama a makweno kanggam i Dios a akwantam meantu so kanggam i Kristo a iyadda. 8 Nabu, neturak so sapit i Dios a makkun,
“Sin tinumullu baggina si langit, nangikangkalin baggina si oddu a fukuk,
anna inindanneno tolenera si mapiya a kiya-kiyan.”a
9 Nenay kanggamma sapitan a tinumullu baggina si langit? Kanggamma sapitan iyaw e inang abbu baggina so kaunaggan a parte na lubag. 10 Na naddassag sito lubag e antu keppayeno tinumullu si kaatannangan na langit takesi baggineno manangngal si amminan a naparatu. 11 Antuweyawera yo neduma a pannakadama a neyaddana i Kristo so minangikkurug ira: dinutukanneno korwan a mattabali si apostol ira, ino korwan a profetera, ino korwan ira a mangipakaammu si mapiya a baga, ino korwan ira a pastor anna mamestru. 12 Inangwana iyaw tapenu makapaserbiyerengke anna mapatuyag ino angngurug na tolayera a meyarig so baggi i Kristo. 13 Mebali-balin nad iyaw makiyad si amminan etam a minangikkurug e mattata si angngurug gumafu se mangurug etam amminan sike Anak i Dios anna gumafu se ammu-ammutam amminan baggina. Kanggamma a mannakam etam amminan makiyad si mekunna etam sike Kristo a awan pakkuranganna. 14 Ammetamun mekunna si abbing ira a malan a mailloku manilla palung na bebay a nesayyuk anna nepalled na leled. Ammetam kuruwan ino sasan-tunturuweno mangilloku a tolayera megafu si maral a agginonotanda. 15 Udde ibali-balintam a massapit si kagakkuruwan megafu si idduk takesi yo angngurugtam e mattuyagnga sike Kristo a antu yo ulutam. 16 Pattataratanneno tolenera kakunna yo parte na baggi a nattatarubbud. Anna nu kada parte na baggi e akwandeno fustu a kalangananda, dumokal anna mattuyag yo interu a baggi megafu si idduk.
Na Bawu a Angat sike Kristo
17 Inindannak i Afu Jesus si pakandama a massapit anna mappalán sikwayu a ibali-balin diyaw nad a manolay kakunna yo katotolayeno bakkan a Hudyuwera a amme mangurug sike Dios. Na agginonotanda e awan serbina. 18 Awan pintindira nu nenay a fustu onnu bakkan a fustu. Nesinera si akkatolay sike Dios gumafu se ammera ammu i Dios anna gumafu se mataggat ino nakamda. 19 Ammera maatal so maral a akwanda, nanolayera si kinamaral anna maumid a mangwera si kada garannud a kaatatal si baggi. 20 Bakkan a kunna sitan ino nakalakammuyu meafu sike Kristo! 21 Se gakkurug a nadingngag diyaw meafu sikwana anna nakalakammuyuweno kagakkuruwan a naggabwat sike Jesus. 22 Natunturuwang kayu a ibbattan diyaweno dadan a kinatoleyu. Ammeyun akwan ino dati a gagangeyu a akakwan diyaw a antu yo paggabwatan ino maral a panggamman ino baggiyu a manaral sikwayu. 23 Ipabulun diyaweno Espiritu i Dios a pabawunneno agginonotan diyaw, 24 anna nu nenay yo maawag a maita sikwayu e yo bawu a gagangeyu a naangwa meantu so kakunna i Dios a gakkurug a matunung anna manolay a awan pakaliwatan.
25 Kunnantu, ammetam massalasiri anna massapit etam si kagakkuruwan si kasittoletam gumafu se parte etam amminan si baggi i Kristo. 26 Nu makaallang kayu, ammeyu ipabulun yo baggiyu ingkepay a malliwat a antu yo kebalinanna yo allang diyaw. Ammeyu purayan a tumallap ino sinag a makaallang kayu kepay. 27 Ammeyu ipabulun i diyablu a pangwan nakayu si maral. 28 Na gumakkokot ira e ammeran nad a makkokot. Imbes, mallappat ira a mattarabafu takesi wara pappanda si pakkatolera anna makaduffun ira si madidiyat a tolayera. 29 Amme kayu massapit si maral udde inoy lamang a ana serbina a makaduffun si tolayera nu kaawanda a duffun, takesi yo sapit diyawera e pangangga-anggamma so makadingngag sikwara. 30 Ammeyu parraddaman ino Espiritu i Dios. Sin neyaddana i Dios sikwayuweno Espirituna, manilla minarkan nakayu a mangipaita a tabbutan nakayuwengkena nanu dumatang ino panguddi a aw. 31 Arin diyaw amminan yo low na nakam, bungut anna allang. Amme kayu makipakwa anna massapit si maral si korwan ira. Amme kayu mangwa si maral a makapalow so korwan a tolayera. 32 Imbes, massimpat anna maallak kayu so korwan ira, mamakoma kayu si siggatatan kakunna yo inangwa i Dios a namakoma sikwayu gumafu so inangwa i Kristo.