Na Bawu a Akkatolay sike Kristo
3
Gumafu se manilla pinantotolena kayu i Dios sin pinantotolena i Kristo anna inindan nakayu si bawu a akkatolay, antu yo pakanonotan diyaw e yo kiya-kiyan a ana si langit, nu sintaw a nakatuttud i Kristo so lugar na kadayawan anna pakandama so diwanan i Dios. 2 Nonotan diyaweno kiya-kiyan a ana si langit bakkan ino ana sito lubag, 3 se natay kayu so dadan a akkatoleyu anna ana bawu a akkatoleyu sike Dios gumafu si pakisittatayu sike Kristo. Amme kepay maintindiyan ino tolayera yo bawu a akkatoleyu. 4 I Kristo ino paggabwatan na bawu a akkatoleyu. Nanu mulina baggina, mappadda kayu pena a bulunna so kadayawanna.5 Kunnantu, talekkuran diyaw nad ino dadan a akkatoleyu anna maral a aggalangwayu: makidurug si bakkan a atawayu, mangwa si kaatatallan na baggi, umifag, maral a agginonotan, anna pàagum (a antu yo maddaya-dayaw si sasan-dios ira). 6 Gumafu sitawera a liwa-liwat, kastiguwannana i Dios inoyera a amme makimoray sikwana. 7 Inangwayu pay iyawera. Kunna sinayeno akkatoleyu sinoy. 8 Udde sitoye, ibbattan diyawin nad amminan iyawera: amme kayu makaallang si sanna a pakaangwan onnu panggamman a mangwa si maral, panandaral anna massapit si madakkut a sapit ira. 9 Amme kayu massissiri si siggatatan, se inariyuweno dadan a kinatoleyu anna maral a taddayuwera. 10 Anna naantataliyang kayu si bawu a tolay. Napabawu kayu si pintindiyu sike Dios a namaratu sikwayu. Annanot a mekunna kayu sikwana. 11 Na kebalinanna inay, awanin a padduman ino Hudyuwera anna bakkan a Hudyuwera, nabanggit onnu ammena nabanggit, ipping onnu bakkan, imbut onnu bakkan a imbut. Udde i Kristo e kaawan si amminan anna sigigyan baggina sikwatam amminan.
12 Gumafu se pinili nakayu i Dios a tolenera anna iddukan nakayu, kunna sitaw nad yo aggangwa a tuntulan diyaw: maallak, masimpat, mattaibbafa, matuluk anna mapasensiya kayu. 13 Attamman diyaweno pakkurangan na siggatatan anna mamakoma kayu nu wara nalliwat sikwayu. Pakoman diyaw penad ino korwan ira kakunna yo pammakoma i Kristo sikwayu. 14 Na kaawan ingke si amminan e makkaiddu-idduk kayuwengke, gumafu si pangwa sitan mattatarata kayunengke amminan. 15 Parennad a yo piya a neyaddana i Kristo sikwayu e ipatamuna amminan a desisyon diyaw se antuweyaw yo gafuna a pinili nakayu i Dios a mattata a manolay. Maumid kayu a mappabalat sikwana. 16 Anna ibali-balin diyaw a yo mensahe meafu sike Kristo e maimfluwensyan yo agginonotan anna aggangwayuwera. Tunturuwan anna mannutunan diyaweno sittata sikwayu si amminan a angngammu. Mappabalat kayu sike Dios si akkansyon si salmowera, imnuwera anna kansyon ira a iyaddeno Espiritu i Dios sikwayu. 17 Anna maski sanneno akakwan onnu sapitan diyaw, se antu yo mangibaggi sike Afu Jesu Kristo onnu akwan diyaw a mangipaita a i Afu Jesus e Afuyu anna mappabalat kayu sike Dios Ama megafu sikwana.
Na Pannabarang i Pablo so Katabbalayera
18 Ikkayu a bafabbayera, makimoray kayu so atattawayu se antuweyan yo fustu a akwan ino minangikkurug ira i Afu Jesus. 19 Ikkayu a lallakiyera, iddukan diyaweno atattawayu anna taratun diyawera si mapiya.
20 Ikkayu a anak ira, maumid a makimoray kayu si gagginafan diyaw, se antuweyan yo panggamman i Afu Jesus. 21 Ikkayuwera a ama, ammeyu fulotan a pallangngan ino anak diyawera takesi ammerana malaffayan.
Na Pannabarang para so Imbut ira anneno Amuwera
22 Ikkayu a imbut ira, pakimorayan diyaw amminan a sapitan ino amuyuwera sito lubag bakkan lamang nu aggalangngad dakayu anna tapenu maanggamman ira sikwayu, udde akwan diyaw iyaw gumafu se makurug kayu anna ana taloyu sike Afu Jesus. 23 Maski sanneno akwan diyaw, akwan diyaw iyaw si makurug a manilla i Afu yo passerbiyan diyaw anna bakkan si tolayera. 24 Se ammuyu a maerensiyayuna sike Afu Jesus ino pammakapiyan a netambana sikwayu gumafu se i Kristo a Afutam ino gakkurug a passerbiyan diyaw. 25 Seanya yo mangwa si maral e makastiguna meantu so maral a inangwana, se awan a pappeduma i Dios.