2
Kanggamku a maammuwan diyaw a pakadiyatangkuwengke a manuffun sikwayu anna so taga-Laodicea anna so amminan a amme nakaita sikwak. 2 Akakwangku iyaw tapenu mapatuyag ino nakamda anna mattatera si idduk takesi mapannuwera si kurwengke a anggam anna konfiyansa a maintindiyandeno mensahe a nepakaammuwen i Dios patamu sike Kristo. 3 I Kristo lamang ino makapaporay anna makapaintindi si mensahe i Dios a kaawan kakunna yo pakkukwa. 4 Itunduk iyaw sikwayu takesi awan a mangilloku sikwayu megafu si mapoporay a pangakiranda. 5 Se maski awanak sikwayu, sigganonot takayu. Anna maanggammak ingke so mapiya a akkatoleyu anna matuyag a angngurug sike Kristo.Na Fustu a Akkatolay sike Kristo
6 Gumafu se inarasoyun i Kristo Jesus a Afu, ibali-balin diyaw a manolay a dumandan sikwana. 7 Ibali-balin diyaw a paddattan a mangurug anna paoddun ino aggammuyu meafu sike Kristo. Ibali-balin diyaw a taddaggan ino angngurug diyaw sikwana a antu yo netunturu sikwayu anna maumid kayu a mappabalat sike Dios.
8 Mimud kayuwengke a amme kayu mailloku si tunturu a awan serbina. Iyan a tunturu e ammena naggabwat sike Kristo udde si gagangayera na tolayera anneno panuntulan sito talubaggan. 9 Se gagangay sike Kristo ino interu a akka-Dios maski nu nattabali a tolay baggina. 10 Anna megafu si pakisittatayu sike Kristo e ana sikwayu amminan a maawag diyaw para si bawu a akkatoleyu. Se baggineno kaatannangan si amminan a gumattangngal anna pakandama. 11 Gumafu si pakisittatayu sike Kristo, nebilang kayun a nabanggit. Iyaw a pabbanggit e bakkan a meantu si angwa na tolay udde meantu si Espiritu i Dios—yo pangari si maral a panggamman na baggi. Antuweyaw yo pabbanggit a naggabwat sike Kristo 12 Megafu si akkebawtismuyu, manilla kayu a netanam kayu a bulun i Kristo anna nantotolay kayu pay a bulunna gumafu si angngurug diyaw si pakapangwa i Dios a nappanantotolay sikwana. 13 Anna ikkayu a bakkan a Hudyuwera, nebilang kayu a natay gumafu si liwa-liwat diyaw anna gumafu se amme kayu a libre si sinaliwat a baggiyu. Udde sitoye, pinantotolena kayu i Dios a bulun i Kristo. Pinakomanna amminan a liwa-liwattam 14 Ana tabbantam nad sike Dios gumafu se ammetam a naparulot ino Katunungan. Udde inari iyaw i Dios megafu si akkapatak i Kristo so kurut. Antu ammetamun makastiguwan. 15 Megafu si akkapatena so kurut, inaffutna i Dios ino gumattangngal ira anneno ana pakapangwara anna nepaitana iyaw sinoy so allangan na tolayera a nangaffut baggina a antu yo kebalinanneno inangwa i Kristo.
16 Kunnantu, ammeyu iyannut a ana mangastigu sikwayu patamu si akkanan onnu inuman diyaw onnu nenay a maawag a akwan kada fiyesta, fiyesta na bawu a dakkag, onnu Aw na Aggimemmang. 17 Amme kayu maningngag sikwara gumafu se amminan inay a katunungan ira e manilla lamang a aninu. Awan serbira mas ingke simbuluwera na mapiya a netamba i Dios, udde i Kristo ino kaparulotan amminan iyawera. 18 Amme kayu maningngag so massalasasan a mappataibbafera anna maddaya-dayaw si anghel ira nu sapi-sapitanda a amme kayu fustu gumafu se ammeyu akakwan iyawera. lpannokalda a tan-atannang ira sikwayu gumafu si pangilillinda si paimatan a maita-itara. Udde awan kagakkuruwanneno sapi-sapitanda se antu lamang ino ana si agginonotanda. 19 Ammera mappasakup sike Kristo a baggina yo ulu anna ana pakapangwana si interu a baggina. Baggina keppay yo mangitubbud si partenera kakunna yo baggi a suportan anna pattatan na katutubburan anna kallat ira. Iyawera e mattuyag patamu so uray i Dios.
Na Bawu a Akkatolay sike Kristo
20 Manilla a natay kayu a bulun i Kristo anneno panuntulan ira na talubaggan e ammena kayun a magaggaddan. Saay se manolay kayu kepay a makalubag? Saay se ibali-balin diyaw kepay a makimoray sitawera a panuntulan kakunna yo 21 “Ammeta iggamman iyan! Ammeta tantaman iyan! Ammeta likkaran iyan?” 22 Iyawera e dundun anna katunungan lamang na tolayera anna patamu si kiya-kiyan a neyusa si ibbafa a tiyempu anna netappol. 23 Iyawera a panuntulan e ana angngammu gumafu se kaawandeno matuyag a pangikakwa, pappataibbafa anna kurwengke a paddisiplina si baggi. Udde ammera makaiyadda si paffuwad si maral a panggamman na baggi.