Na Turak i Pablo so
Taga-Colosas
1
Ikkanak i Pablo a apostol i Kristo Jesus si uray i Dios anna bulungku i Timoteo a wayitam si angngurug a mattura-turak sikwayu 2 a tolayera i Dios anna makurug a wawwayiyera sike Kristo so Colosas.Idasalku sike Dios a Amatam anni Afutam a Jesu Kristo a ibali-balinda a massimpat sikwayu anna indan dakayu si piya.
Na Appabala-balat anna Dasal i Pablo
3 Kada idasallammi kayu, maumid kami a mappabalat sike Dios a Ama i Afutam a i Jesu Kristo, 4 se nadingngagmiyeno angngurug diyaw sike Kristo Jesus anneno idduk diyaw si amminan a tolayera i Dios, 5 gumafu si inanama a maarasoyu a neparan para sikwayu si langit. Nadingngag diyaweno meafu so inanama sin palungu a nepakaammu sikwayuweno sapit na kagakkuruwan, yo Mapiya a Baga.
6 Antu keppay iyaw a Mapiya a Baga a nadingngag diyaw e nebalaggaw so oddu a naddadaruma a luga-lugar. Na gakkurug a mensahe e annanot a maangkakwan ino akkatolayeno tolayera, kakunna yo pangangkakweno akkatoleyu sin palungu a nadingngag diyaw anna naintindiyan diyawengkeno kagakkuruwan meafu si simpat i Dios. 7 Nakalakammuyuweno meafu so Mapiya a Baga sike Epafras a iddu-iddukammi a kagumasserbi. Makurug baggina a gumasserbi i Kristo anna duffunan nakami para si pammakapiyammia, 8 anna nepakaammuna sikwatam ino iddukngu si korwan a naangwayu megafu so Espiritu i Dios.
9 Antu kiyad sin nadingngagmi iyaw, ibali-balimmi kayu a idasallan. Arangngammi sike Dios a indan nakayu si angngammu anna pintindi a naggabwat sike Espirituna takesi maammuwan diyawengkeno urena, 10 takesi maggalangwa kayu kakunna yo tolayera i Afu a maggalangwa nad, tapenu yo akkatoleyu e mamunga si mapiya a aggangwera si kada garannud anna tapenu gakkurug a maammu-ammuyunengke i Dios. 11 Idasalmi a i Dios megafu si pakapangwanengke e patuyaggan nakayunengke si angngurug takesi maindang kayuwengkena si pàattam anna pasensiya sikwayu a mangga-anggam 12 a mappabalat sike Dios a Amatam a napangarasaw nakayu si kiya-kiyan a neparanna si langit a iyaddanana si tolenera. 13 Tinabbutna etam si pakapangwa i Satanasb anna yo iddu-iddukanna a Anak e sitoye tangnga-tangngallanna etam. 14 Anna gumafu sike Jesus, natabbut etam nu sintaw pinakomanna yo liwa-liwattam.
Na Akkatolay anna Aggangwa i Kristo
15 Awan makaita sike Dios, udde sin nattabali a tolay i Kristo, nepaammuna i Dios so tolayera. Anen baggina liye naparatu yo maski sanna, 16 se sikwana amminan a kiya-kiyan si langit anna sito lubag e naparatu, maita anna ammena maita, gumattangngal ira onnu pakapangwera—amminan e naparatu megafu sikwana anna para sikwana. 17 Anen i Kristo liye kepay naparatuweno amminan a kiya-kiyan, anna megafu sikwaneno amminan e ana si mainggud a akkekwa. 18 Baggineno ulu na minangikkurug ira a kakunna yo baggina. Baggineno pefuna, yo palungu a neyanak a nantotolay so natayera takesi bagginaneno kaatannangan si amminan. 19 Se i Dios ingkepayeno naddesisyon a yo Anaknga e ana amminan nad sikwaneno amminan a gagangena. 20 Anna megafu sike Kristo, naanggamman i Dios a mepakoli amminan sikwana a ana sito lubag onnu si langit megafu si akkapatena so kurut.
21 Dati, nesina kayu sike Dios anna yo agginonotan diyaw e metulyat sike Dios gumafu si maral a taddera a inangwayu, 22 udde megafu si akkapatay i Kristo, nepakoli nakayu sike Dios takesi kunna sitan metallang kayu a matunung si aggita i Dios, malinis anna awan pakaliwatan. 23 Udde maawag a makurug anna mataddang kayu si angngurug diyaw anna ammeyu purayan a maawan ino inanama a netamba i Dios si Mapiya a Baga a nadingngag diyaw patamu sike Kristo. Kinanggamman i Dios a ikkanak a i Pablo e antu yo mangibalaggaw sitaw a Mapiya a Baga so oddu a tolayera so naddadaruma a lugar.
Na Taddera i Pablo para so Minangikkurug Ira
24 Mangga-anggammak si paddiriyatku maipegafu sikwayu, se megafu sitaw mebali-balingkuweno paddiriyat a maawag kepay a akwanna i Kristo para si amminan a minangikkurug ira a antu yo baggina. 25 Dinutukanak i Dios a gumasserbi na minangikkurug ira takesi mebalaggawengke sikwayuweno mensahe i Dios. 26 Iyaw a mensahe e ammena nepaammu sin nabayagin a tiyempu so nappasa a diyafuwan ira kiyad so daggun a diyafuwan ira udde sitoye e nepaammuwen si tolenera. 27 Ninonot i Dios a mepakaammuna so tolenera nu kasanna a kakkapallat ingkeno planuna para so bakkan a Hudyuwera. Na neyimad a plinanuna a mepakaammu e sigigyan i Kristo sikwayu a bakkan a Hudyuwera. Anna yo kebalinanna e siguradu kayu a maarasoyuneno kadayawan i Dios a netambana. 28 Antuweyan yo gafuna nu saay se ipakaammumi i Kristo si amminan a tolayera, palanán anna tunturuwan ira si angngammu a neyaddana i Dios sikwatam. Akwammi iyaw tapenu amminan a tolayera a nakisittata sike Kristo e mannakamma si angngurugga nu itallangmiyera sike Dios. 29 Antuweyaw yo kinumanangku a maangwa megafu si pakapangwa a neyaddana i Kristo sikwak.