Tito 2

Na Fustu a Annunturu

Udde ikka, itunturum nu nenay yo meantu so fustu a annunturu. 2 Itundum so manannakam a lallakiyera a ana nad pangigaggad si baggira, melawera nad na tolayera anna mangngammuwera. Gakkurug ira nad si angngurugga sike Kristo, midduk so korwan ira anna minaggiyattam ira.

3 Kunnapay, itundum so manannakam a bafabbayera a manolayera a mangipaita a mangikakwera sike Dios. Ammera nad a manandaral si kasittolera onnu gumàinum. Itunturura nad yo mapiya 4 takesi maangga-anggammandeno abbing a bafabbayera a midduk si atattawara anna anakdera. 5 Ana nad pangigaggad si baggira anneno katotolera e awan pakaliwatan, malappat a gumattarabafuwera na katabbalay, masimpat ira, makimorayera so atattawara takesi awan a massapit si maral metulyat si sapit i Dios.

6 Kunnapay, ilelawitnu so tan-abbing a lallakiyera a gaggaddandeno baggira. 7 Anna ikka Tito, si amminan a pakaangwan, mappangngarigangka nad a mangwa si mapiya a taddera. Nu manunturuka, mappaitaka nad si mapiya a gakkad ira anna gakkurugka nad so itunturum. 8 Itunturum ino kagakkuruwan takesi awan a makaarari tapenu inoyera a mattulyat sikwam e meyatatalna a awan a massapitna si maral meafu sikwatam.

9 Itundum so imbut ira a maumid a makimorayera so amunggera takesi maanggamman iyawera. Anna ammera nad a tabba-tabban 10 onnu makkokot so amunggera udde matalakkan irengke nad takesi yo tunturuwera meafu sike Dios a Mannabbuttam e kaangga-anggam.

11 Nepaita i Dios ino simpatna takesi matabbutna amminan. 12 Na simpatna e tunturuwanna etam a manalekkud si maral a kiya-kiyan a ammena kaangga-anggam sike Dios anna si panggamman na talubaggan. Manolay etam nad sito maddaggun a tiyempu a ana pangigaggad si baggi anna mangwa si fustu si aggita i Dios, 13 sikwatam a minda-indag so kakkapallat a aw a innanamantam antu yo kakkapallat ingke a pannuli i Jesu Kristo a kaatannangan a Diostam anna Mannabbuttam. 14 Neyaddana ingkepay yo baggina sikwatam takesi tubbutanna etamma si amminan a kamarallan anna linisanneno tolena ingkepay a mattalaginnay a mangwa si mapiya a taddera.

15 Itunturum iyawera a kiya-kiyan so minangikkurug ira. Patuyaggannuweno nakamda anna passapitannuwera si amminan a pakandamam. Ammem ipabulun maski yanya a mangarari sikwam.