Na Fustu a Taddera na Tata a Minangikkurug
3
Ipadandammu so minangikkurug ira so Creta a mappatangngal ira so afu-afuwera anna so inoyera a ana pakapangwa si gubyernu. Maawag a makimorayera anna nakaparan ira a mangwa si maski sanna a mapiya a aggangwa. 2 Ammera massapit si maral si kasittolera, lillikanda a makipakwa, maawag a masinak ira anna mangilawera si amminan a tolayera. 3 Se maski ikkanetam ingkepay sinoy e illaw, ammetam a makimoray, nailloku etam, imbut etam si naddadaruma a maral a panggamman na baggi. Pinappasatam ino tiyempu si maral a gakkad anna passil. Ikalussora etam ino korwan ira anna ikalussawtam payera. 4 Udde sin nepaita i Dios a Mannabbuttam ino simpatna anna idduknga, 5 tinabbutna etam bakkan a gumafu so matunung a inangwatam ira udde si allaknga sikwatam. Tinabbutna etam megafu si Espirituna a nallinis si liwa-liwattam anna nangadda sikwatam si bawu a akkatolay.6 Neyaddana i Dios sikwatam ino Espirituna a awan pabbabang megafu sike Jesu Kristo a Mannabbuttam, 7 takesi megafu si simpatna, nebilang etam a matunung anna tantaro maarasotam ino akkatolay a bulun i Dios amu-amu a innanamantam dengkena netamba sikwatam. 8 Iyaw a kasapitan e gakkurug.
Antu kanggammangku a ilillinnu a itunturum iyawera a kiya-kiyan takesi inoyera mangurug sike Dios e mimud ira a mangikakwa si baggira ingkepay a mangwa si mapiya a aggangwera. Mapiya amminan iyawera anna makapammakapiya si amminan a tolayera. 9 Udde lillikannuweno awan a serbina a pakitinnulyat meafu so allistan ino ngan ira na aggidiyafuwan ira, passasarina anneno pappaparakwa meafu si katunungan gumafu se iyawera e awan balorna anna awan serbina. 10 Passapitannu yo tolay a manandaral si pattataratayu. Akkabalinna tata onnu adwa a pappalán e ammena kepay a makimoray, purayannun baggina 11 se ammum a yo kunna sitan a tolay e tinalekkuranneno kagakkuruwan anneno liwatnera antu yo makkastigu sikwana.
Na Panguddi a Akkidyot
12 Paumangangku sitan i Artemas onnu i Tikikus. Nu dumatang maski yanya sikwara adwa, kumanannu a makaumang siddarat sikwak so Nicopolis se dinesisyonangku a sinay a migyan si tiyempu na labbat. 13 Kumanannu a maduffunan da Zenas a abugadu anni Apolos so paddoyugga anna itannu si mapiya a ammera makkurang si maawaggera. 14 Anna tunturuwannu yo wawwayitam si angngurug a mangikakwa si baggira ingkepay a mangwa si mapiya a aggangwera tapenu makaduffun ira so gakkurug a makaawag si duffun takesi ana serbina yo akkatolera.
15 Kumustan dakeno bulungkuwera sitaw. Ikumustanak pay so wawwayitam a midduk sikwami si angngurug.
Idasalku a masimpat i Dios sikwayu amminan.