Na Turak i Pablo sike
Tito
1
Naggabwat iyaw sikwak, i Pablo a gumasserbia i Dios anna apostol i Jesu Kristo. Nedundunnak i Dios takesi patuyaggan ino angngurug na tolayera a pinilina anna ipaintindi sikwareno kagakkuruwan a manolayerana meantu si uray i Dios. 2 Si pangwa sitaw, inanamara a manolay a bulun i Dios amu-amu. I Dios a ammenengke massalasiri e netambana iyaw liye a naparatuweno talubaggan. 3 Anna si fustu a tiyempu, nepakaammuneno mensahena. I Dios a Mannabbuttam e netalakngeno mensahena sikwak a mebalaggaw so tolayera meantu si dundunna.4 Iturakku iyaw sikwam, Tito a ibilangku a gakkurug a anakku gumafu se parefuweno angngurugta.
Idasalku sike Dios a Amatam anni Kristo Jesus a Mannabbuttam a ibali-balinda a massimpat sikwayu anna indan dakayu si piya.
Na Aggangwera i Tito so Creta
5 Na gafuna a nebattang taka so Creta e takesi ibali-balinnu a akwan ino maawag kepay a makwa anna maddutukka si afu-afuwera na minangikkurug ira a mammu-ammung so kada lubbun meantu so nedundungku sikwam. 6 Maddutukka si afu-afu a awan pakaliwatanna, namitta lamang a nangatawa anna ana anakngera a minangikkurug ira anna amme mapaliwat si kalokuwan anna ammera marrebelde. 7 Na afu-afu na minangikkurug ira e antu yo nangitalakkan i Dios a mangwa so aggangwana. Awan nad pakaliwatanna, ammena nad a mammangut onnu malan a mabbungut onnu ammena nad a gumàinum onnu gumakkipakwa onnu maagum si pirak. 8 Imbes, mapappadulot nad baggina, maidduk si kapiyanan, mangngammu, mangwa si fustu si aggita i Dios, mangikakwa sike Dios anna minangigaggad si baggi. 9 Kuruwannengke nad ino Mapiya a Baga a matalakkan a meafu sike Jesu Kristo a nakalakammuna takesi maangga-anggammanneno korwan ira so fustu a tunturu anna mepaita so inoyera a mattulyat so Mapiya a Baga a ammera a fustu.
10 Se oddu pay a tolayera a amme makimoray so fustu a tunturu. Awan a serbina yo sapi-sapitanda anna illokundeno korwan ira. Akakwan iyaw annanot yo Hudyuwera a mangurug sike Jesus a ilillin a mabanggit nad ino bakkan a minangikkurug a Hudyuwera. 11 Pimemmakkannuwera nad gumafu se dara-darallandeno interu familyera si sasan-tuntururera a ammena nad metunturu. Kaatatal ingke iyaw sikwara makaappera lamang si pirak. 12 Si kagakkuruwanna, tata so profetarera a taga-Creta a nassapit,
“Inoyera a taga-Cretan e maumid a massalasiri. Kakunnara yo madungit a aggayam ira. Makayang ira e malamot.”
13 Gakkurug yo netunduna. Antu gafuna a ngangngaddannu a passapitan ira tapenu mapatuyag ino angngurugga. 14 Mimemmak irana a maningnga-ningngag so awan serbina a yayam ira na Hudyuwera anna yo dundun ira na tolayera a mattulyat si kagakkuruwan. 15 So tolayera a mapiya yo gakkadda, mapiya amminan a kiya-kiyan sikwara. Udde so inoyera a maral a agginakammanda anna ammera a minangikkurug awan a mapiya sikwara. Na nonotdera anna konsensiyara e nadaral. 16 Kunda a ammura i Dios udde ambafagganda baggina si agguyuwanda. Na akakwanda e makapalussaw anna ammera makimoray anna ammera mepangngat a mangwa si maski sanna a mapiya.